২০২১ বৰ্ষত ভাৰতীয় মহাকাশ গৱেষণা সংস্থাই ভূটানৰ কৃত্ৰিম উপগ্ৰহ মহাকাশলৈ প্ৰেৰণ কৰিব।
প্ৰধান মন্ত্ৰী নৰেন্দ্ৰ মোদীয়ে শুকুৰবাৰে দ্বিতীয় পৰ্যায়ৰ ‘RuPay’ কাৰ্ড আঁচনি মুকলি কৰাৰ সময়ত আনুষ্ঠানিকভাৱে এই কথা ঘোষণা কৰে।
ভাৰত আৰু ভূটানে সহযোগিতাৰে শান্তিপূৰ্ণভাৱে মহাকাশৰ ব্যৱহাৰৰ ক্ষেত্ৰত আগবঢ়াৰ বাবে এখন চুক্তিত স্বাক্ষৰ কৰে বুলিও প্ৰধান মন্ত্ৰী নৰেন্দ্ৰ মোদীয়ে লগতে কয়।
আনহাতে, ভূটানৰ চাৰিগৰাকী মহাকাশ অভিযন্তাই ডিচেম্বৰ মাহৰ পৰা ভাৰতীয় মহাকাশ গৱেষণা সংস্থাত মহাকাশ গৱেষণা সম্বন্ধীয় প্ৰশিক্ষণ গ্ৰহণ কৰিব বুলিও প্ৰধান মন্ত্ৰীয়ে সদৰী কৰে।
উল্লেখযোগ্য যে, ভাৰতীয় মহাকাশ গৱেষণা সংস্থাই নিজ দেশৰ উপৰিও বিভিন্ন দেশৰ উপগ্ৰহ মহাকাশলৈ প্ৰেৰণ কৰি আহিছে।
আগন্তুক বৰ্ষত ইছৰোই মহাকাশলৈ প্ৰথমবাৰৰ বাবে ভূটানৰ কৃত্ৰিম উপগ্ৰহ প্ৰেৰণ কৰিব।
ভাৰত আৰু ভূটানে শিক্ষা, গৱেষণা, বিজ্ঞান আদিৰ ক্ষেত্ৰত বহুদিনৰ পৰা সহযোগিতাৰে কাম কৰি আহিছে।