অৰ্শদীপ সিঙক খালিস্তানী দলৰ ক্ৰিকেটাৰ সজাই বিপদত পৰিছে ৱিকিপিডিয়া।ভাৰতীয় পেচাৰ অৰ্শদীপ সিঙে ভাৰত-পাক হাই-ভল্টেজ মেচত এটা সহজ কেচ হেৰুৱাই সমালোচিত হৈছে। দেওবাৰৰ খেলখনৰ ঠিক পিছতে ৱিকিপিডিয়াই লিখিছে যে পঞ্জাৱৰ খেলুৱৈজন খালিস্তানীসকলৰ সৈতে জড়িত আছিল। পিছদিনা অৱশ্যে সেই তথ্য ৱিকিপিডিয়াৰ পৰা ডিলিট কৰা হৈছিল। ঘটনাটোৰ পিছত ৱিকিপিডিয়াৰ বিষয়াসকলক কেন্দ্ৰীয় তথ্য প্ৰযুক্তি মন্ত্ৰালয়ে চমন জাৰি কৰিছে।
দেওবাৰৰ ভাৰত-পাকিস্তান খেলৰ পিছতে ৱিকিপিডিয়াত অৰ্শদীপৰ বিষয়ে এনে তথ্য প্ৰকাশ পায়। সেই খেলখনত বলাৰ অৰ্শদীপ সিঙে এটা অতি সহজ কেচ মিছ কৰিছিল। সেই সময়ত খেলপথাৰত থকা ভাৰতীয় দলৰ সদস্যসকলেও অৰ্শদীপৰ ওপৰত ক্ষোভ ব্যক্ত কৰিছিল। কিন্তু খেলখনৰ পিছত, বিৰাট কোহলীয়ে সংবাদমেলত স্পষ্ট কৰি দিছিল যে অৰ্শদীপে এই ঘটনাটো পাহৰি আগবাঢ়ি যাব। দলৰ সকলোৱে তেওঁক সহায় কৰিব। কিন্তু দেওবাৰে খেলখন সমাপ্ত হোৱাৰ অলপ পিছতে অৰ্শদীপৰ বিষয়ে ৱিকিপিডিয়াৰ পৃষ্ঠাত এই বুলি লিখা হয় যে তেওঁ ২০১৮ চনৰ অনুৰ্ধ-১৯ বিশ্বকাপত খালিস্তানৰ হৈ খেলিছিল।
অৱশ্যে, সোমবাৰে পুৱা ইয়াক সম্পাদনা কৰি সেই তথ্য আঁতৰাই দিয়া হয়। কিন্তু তেতিয়ালৈকে বহুলোকে অৰ্শদীপৰ সেই ভুল তথ্যৰ বিষয়ে জানিব পাৰে। এই তথ্য বিভিন্ন সামাজিক মাধ্যমতো বিয়পি পৰিছে। তথ্য প্ৰযুক্তি মন্ত্ৰালয়ে ৱিকিপিডিয়াৰ ভাৰতীয় বিষয়াসকলক এই ঘটনাৰ পিছতে মাতি পঠিয়াইছে।তথ্য প্ৰযুক্তি সচিব অলকেশ কুমাৰ শৰ্মাৰ নেতৃত্বত শীৰ্ষ চৰকাৰী বিষয়াসকলে ৱিকিপিডিয়াৰ প্ৰতিনিধিসকলক প্ৰশ্ন কৰিব।
নাম উল্লেখ কৰিব নিবিচৰা এজন চৰকাৰী বিষয়াই কয়: “এইটো এটা অতি গুৰুত্বপূৰ্ণ কথা। প্ৰথম অৱস্থাত, এইটো জনা গৈছে যে ৱিকিপিডিয়াৰ তথ্য চুবুৰীয়া দেশৰ পৰা সলনি কৰা হৈছে। এই ঘটনাটোৰ দীৰ্ঘম্যাদী প্ৰভাৱ থাকিব পাৰে। দেশৰ আভ্যন্তৰীণ শান্তি বিঘ্নিত হ’ব পাৰে। ৱিকিপিডিয়াৰ বিষয়াসকলক সোধা হ’ব, তেওঁলোকক ইমান কম সময়ৰ ভিতৰত তথ্য সলনি কৰিবলৈ কিয় অনুমতি দিয়া হৈছে?”
দৰাচলতে, পৃথিৱীৰ যিকোনো প্ৰান্তৰ যিকোনো লোকে ৱিকিপিডিয়াৰ তথ্য সম্পাদনা কৰিব পাৰে। গতিকে এই ৱেবছাইটৰ তথ্য কিমান সঁচা সেই বিষয়ে আগতে কেইবাবাৰো প্ৰশ্ন উত্থাপন হৈছে। ২৪ বছৰীয়া ভাৰতীয় তাৰকা অৰ্শদীপ সিঙে ৰাতিটোৰ ভিতৰতে খলনায়ক হৈ পৰিছে। ইপিনে পঞ্জাৱৰ শিক্ষা মন্ত্ৰীয়ে যুৱ ক্ৰিকেটাৰজনৰ কাষত থিয় দিছে। তেওঁ অৰ্শদীপৰ মাকৰ সৈতে ফোনত কথা পাতিছে। পঞ্জাৱৰ প্ৰাক্তন মুখ্যমন্ত্ৰী কেপ্টেইন অমৰিন্দৰ সিঙেও যুৱ ক্ৰিকেটাৰজনৰসপক্ষে মাত মাতিছে।
