জৰ্জিয়া মেলোনি ইটালীৰ ৰাজনীতিত এগৰাকী সোঁপন্থী নেত্ৰী হিচাপে পৰিচিত। এইবাৰ তেওঁৰ নেতৃত্বত মিত্ৰজোঁট দেশখনৰ ৰাষ্ট্ৰীয় নিৰ্বাচনত জয়ী হৈছে।
জৰ্জিয়াক শুকুবাৰে ইটালীৰ প্ৰধানমন্ত্ৰী হিচাপে ঘোষণা কৰা হৈছে। ৪৫ বছৰীয়া জৰ্জিয়া হ’ল দেশৰ প্ৰথম গৰাকী মহিলা প্ৰধানমন্ত্ৰী। দ্বিতীয় বিশ্বযুদ্ধৰ পিছত প্ৰথমবাৰৰ বাবে দেশখনত এটা কট্টৰ সোঁপন্থী দলে চৰকাৰ গঠন কৰিছে।
যোৱা ছেপ্টেম্বৰত ইটালীত নিৰ্বাচন অনুষ্ঠিত হৈছিল। বুথ ৰিটাৰ্ণ জৰীপৰ পৰা এইটো স্পষ্ট হৈছিল যে জৰ্জিয়াই জিকিবলৈ গৈ আছে। সেইদৰেই তেওঁ এইবাৰ চৰকাৰ গঠন কৰিলে।
এই বিজয়ে ইউৰোপৰ ৰাজনৈতিক দৃশ্যপটত এক বৃহৎ পৰিৱৰ্তন আনিলে বুলি অনুমান কৰা হৈছে। যোৱা মাহত চুইডেনত কট্টৰ সোঁপন্থী দলে এখন চৰকাৰ গঠন কৰিছিল। ইটালীতো একেই ঘটনা ঘটিল।
জৰ্জিয়াৰ ‘ব্ৰাদাৰ্ছ অৱ ইটালী’য়ে ইটালীৰ প্ৰাক্তন প্ৰধানমন্ত্ৰী চিলভিঅ’ বাৰ্লুস্কোনিৰ ‘ফৰ্জা ইটালিয়া’ আৰু মাটেও চালভিনিৰ দলৰ সৈতে মিত্ৰতা গঢ়ি তোলে। দেশখনৰ ৰাষ্ট্ৰপতি চাৰ্জিও মাট্টাৰেল্লাই জৰ্জিয়াক বিজয়ী মিত্ৰজোঁটৰ নেতা হিচাপে প্ৰধানমন্ত্ৰীৰ দায়িত্ব ল’বলৈ আহ্বান জনায়।
জৰ্জিয়াৰ কেবিনেট মন্ত্ৰীসকলে শনিবাৰে শপত গ্ৰহণ কৰিব বুলি আশা কৰা হৈছে। নিৰ্বাচনৰ ফলাফলে দেখুৱাইছে যে জৰ্জিয়া নেতৃত্বাধীন মিত্ৰজোঁটে চিনেটত ১১৪ খন আসন লাভ কৰিছে। ইটালীৰ চিনেটক সংখ্যাগৰিষ্ঠতাৰ বাবে ১০৪ খন আসনৰ প্ৰয়োজন।
ইপিনে, জৰ্জিয়া নিজেই ইউৰোপীয় ইউনিয়নত থকাৰ পক্ষপাতী নহয়। এই পৰিস্থিতিত ইটালীৰ শাসন পৰিৱৰ্তনে ইউৰোপীয় ইউনিয়নে আন এক সদস্য হেৰুৱায় নেকি তালৈ বহুতেই দৃষ্টি ৰাখিছে।
উল্লেখ্য যে ইটালী ইউৰোপীয় ইউনিয়নৰ অন্যতম প্ৰতিষ্ঠাপক দেশ। সেইদৰে, ইউৰো পৰিসৰ অঞ্চলত ইটালী হৈছে তৃতীয় সৰ্ববৃহৎ অৰ্থনীতি। অৱশ্যে, কোভিডৰ বাবে ইটালীত বৰ্তমান দেশখনৰ জিডিপিৰ ১৫০ শতাংশৰ সমান ঋণৰ বোজা আছে।
