জগত প্রকাশ নড্ডা ভাৰতীয় জনতা পাৰ্টিৰ (বিজেপি) নতুন অধ্যক্ষ হিচাপে নিৰ্বাচিত হৈছে। দলৰ ৰাষ্ট্ৰীয় নিৰ্বাচনী বিষয়া ৰাধামোহন সিঙে সোমবাৰে জে পি নড্ডা অধ্যক্ষ নিৰ্বাচিত হোৱাৰ কথা ঘোষণা কৰে।
ৰাষ্ট্ৰীয় অধ্যক্ষ পদৰ বাবে সোমবাৰে মনোনয়ন পত্ৰ দাখিল কৰা হৈছিল। মনোনয়ন পত্ৰ দাখিলৰ অন্তিম সময় আছিল দুপৰীয়া ১২.৩০ বজালৈকে।
মনোনয়ন পত্ৰ প্ৰত্যাহাৰৰ অন্তিম সময় ধাৰ্য কৰা হৈছিল আবেলি ২.৩০বজাত।
জে পি নড্ডাক বাদ দি আন কোনোৱেই মনোনয়ন পত্ৰ দাখিল নকৰিলে।
প্ৰধান মন্ত্ৰী নৰেন্দ্ৰ মোদীয়ে বিজেপিৰ কাৰ্যালয়ত উপস্থিত হৈ জে পি নড্ডাক দলৰ সভাপতি হিচাপে নিৰ্বাচিত হোৱাৰ বাবে শুভেচ্ছা জনায়।
হিমাচল প্ৰদেশৰ বিজেপি নেতা জে পি নড্ডাই এবিভিপিৰ পৰা আৰম্ভ কৰি ভাৰতীয় জনতা পাৰ্টিৰ যুৱ মৰ্চালৈকে সকলো স্তৰতে সফলতাৰে কাৰ্যভাৰ চলাই আহিছে।
জে পি নড্ডা মোদী চৰকাৰৰ প্ৰথমটো কাৰ্যকালত এগৰাকী সফল স্বাস্থ্য মন্ত্ৰী হিচাপে কাৰ্যনিৰ্বাহ কৰিছিল।
সোমবাৰে নিৰ্বাচনী প্ৰক্ৰিয়াৰ সময়ত বিজেপি ৰাষ্ট্ৰীয় মুখ্য কাৰ্যালয়ত অমিত শ্বাহ, ৰাজনাথ সিঙকে ধৰি বিজেপি শাসিত ৰাজ্যসমূহৰ মুখ্য মন্ত্ৰীসকলো উপস্থিত আছিল।
ইপিনে জে পি নড্ডা সভাপতি নিৰ্বাচিত হোৱাৰ পাছতে পত্নী মল্লিকা নড্ডাই কয়,’’আমাৰ সকলোৰে বাবে আজি এটা বহুত গুৰুত্বপূৰ্ণ দিন। পৰিয়াল, বিলাসপুৰ আৰু আমাৰ হিমাচল প্ৰদেশকে ধৰি সকলোৱে আজি বহু আনন্দিত কিয়নো ইমান সৰু ৰাজ্য এখনৰ এজন ব্যক্তিক ডাঙৰ দায়িত্ব অৰ্পণ কৰা হৈছে।‘’