তিনিচুকীয়া জিলাৰ মাৰ্ঘেৰিটা সমষ্টিৰ অন্তৰ্গত জাগুন ঘাটত এখন দলং নিৰ্মাণ কৰাৰ দাবীৰে কথাচেমা গাঁৱৰ শতাধিক ৰাইজে ওলাই আহি আজি তীব্ৰ প্ৰতিবাদ সাব্যস্ত কৰে।
প্ৰতিবাদকাৰী সকলৰ দাবী যে, আগন্তুক ২০২১ ৰ বিধানসভা সাধাৰণ নিৰ্বাচনৰ আগে আগে দলং নিৰ্মাণৰ বাবে অন্ততঃ আধাৰশিলা হলেও স্থাপন কৰিব লাগে।
উল্লেখ্য যে, তিনিচুকীয়া জিলাৰ ১২৪ নং মাৰ্ঘেৰিটা বিধানসভা সমষ্টিৰ অন্তৰ্গত লেখাপানী থানাৰ অধীনৰ জাগুনৰ অসমঘাটৰ বুঢ়ীদিহিং নৈৰ ওপৰত এখন দলং নিৰ্মাণ কৰি দুটাকৈ ৱাৰ্ড থকা অঞ্চলটোৰ সৈতে আন ঠাইৰ যাতায়াত সুচল কৰি দিয়াৰ দাবী উত্থাপন কৰি আহিছে।
স্বাধীনতাৰ ৭৪ বছৰে অসমৰ সীমামূৰীয়া অঞ্চলটো অৱহেলিত হৈ আহিছে।
উক্ত অঞ্চলত সুদীৰ্ঘ দিনে স্থাপন নহল এখন দলং, ইপিনে অঞ্চলটোত নাই বিশুদ্ধ খোৱা পানীৰ সু-ব্যৱস্থা নাইবা চিকিৎসালয়।
উক্ত অঞ্চলত কোনো লোকৰ বেমাৰ-আজাৰ হলে নাৱৰীয়া নাথাকিলে ৰোগীক চিকিৎসালয়লৈ নিব নোৱাৰে।
ফলত বহু সময়ত ৰোগী মৃত্যুমুখত পৰিব লগা হোৱা শোকাবহ ঘটনাও সংঘটিত হৈ আহিছে।
অঞ্চলবাসীয়ে কংগ্ৰেছ চৰকাৰৰ দিনতে উক্ত ঘাটত এখন “ফুটব্ৰীজ” হলেও স্থাপন কৰাৰ দাবী উত্থাপন কৰিছিল যদিও সেয়া সেই সময়ৰ বিধায়ক তথা কংগ্ৰেছী মন্ত্ৰী প্ৰদ্যুৎ বৰদলৈৰ হেমাহি তথা অমনোযোগিতাৰ বাবে হৈ নুঠিল বুলি প্ৰতিবাদকাৰী সকলে ক্ষোভেৰে ব্যক্ত কৰে।
অসমৰ ৰাইজে কংগ্ৰেছৰ দিনত সংঘটিত হোৱা দুৰ্নীতি, অপশাসন, ভ্ৰষ্টাচাৰ বিৰুদ্ধে প্ৰতিবাদ জনাইয়েই বিজেপিৰ পৰিৱৰ্তনকামী চৰকাৰক শাসনৰ গাদীত অধিষ্ঠিত কৰিছিল যদিও শাসন ভাৰ সম্পূৰ্ণ কৰিবলৈ আৰু কেইটামান মাহ আছে যদিও আজিলৈকে অঞ্চলটোত ৰাইজে দলং নিৰ্মাণ দূৰৰ কথা আধাৰশিলাও স্থাপন নকৰিলে।
গাওঁখনৰ উন্নয়নৰ প্ৰতি মাৰ্ঘেৰিটাৰ বিধায়ক ভাস্কৰ শৰ্মাই কোনো ধৰণৰ আগ্ৰহেই নেদেখুৱালে বুলি অভিযোগ কৰিছে অঞ্চলটোৰ গঞাই।
আগন্তক নিৰ্বাচনৰ পূৰ্বে যদি দলং নিদিয়ে ভোট বিচাৰি নাহিব, দলং আমাক লাগিবই আদি শ্ল’গানেৰে আজি পৰিবেশ উত্তাল কৰি তোলে প্ৰতিবাদকাৰী সকলে।
জাগুণৰ কথাছেমা গাঁৱৰ ৰাইজে মাৰবান্ধি ওলাই আহি দলং নিৰ্মাণৰ দাবীত জাগুনঘাটত তীব্ৰ প্ৰতিবাদ সাব্যস্ত কৰি আগন্তুক বিধানসভা নিৰ্বাচনৰ আগতে এই অঞ্চলটো চৰকাৰৰ দৃষ্টি গোচৰ নহ’লে ভোট বৰ্জন কৰাৰো হুংকাৰ প্ৰদান কৰে।