পাকিস্তানৰ নিষিদ্ধ উগ্ৰপন্থী সংগঠন জইছ-ই-মহম্মদ ভাৰতৰ অপাৰেচন সিন্দুৰত ভাঙি গৈছিল। সেই ক্ষয়-ক্ষতিৰ পৰা উদ্ধাৰৰ বাবে তেওঁলোকে আপ্ৰাণ চেষ্টা চলাইছে। ভাৰতৰ বিৰুদ্ধে সন্ত্ৰাসবাদী কাৰ্যকলাপ বৃদ্ধিৰ বাবেও এই উগ্ৰপন্থী সংগঠনটোৱে এক বেলেগ পথ গ্ৰহণ কৰিছে।
পূৰ্বে জনা গৈছিল যে জইছ-ই-মহম্মদৰ মুৰব্বী মাছুদ আজহাৰে মহিলা উগ্ৰপন্থী শক্তি সৃষ্টি কৰিবলৈ ওলাইছে। এই শক্তিক ‘জামাত-উল-মমিনাত’ বুলি কোৱা হয়। ইয়াৰ নেতৃত্বত আছে মাছুদ আজহাৰৰ দুই ভগ্নী সাদিয়া আৰু সামাইৰা।
অপাৰেচন সিন্দুৰৰ সময়ত মৃত্যু হয় সাদিয়াৰ স্বামীৰ। ভাৰতীয় বায়ুসেনাই বাহাৱালপুৰ জইছৰ মুখ্য কাৰ্যালয়ত বিমান আক্ৰমণত তেওঁক নিহত কৰে।
এতিয়া জনা গৈছে যে জইছে মহিলাসকলক উগ্ৰপন্থী কাৰ্যকলাপৰ ব্ৰেইনৱাছিং আৰু প্ৰশিক্ষণৰ বাবে অনলাইন পাঠ্যক্ৰম আৰম্ভ কৰিবলৈ ওলাইছে। পাঠ্যক্ৰমটোৰ নাম তুফাত আল-মুমিনাত ৰখা হৈছে। ইয়াৰ জৰিয়তে মাছুদৰ দলটোৱে এক গুলীত দুই চিকাৰ কৰিবলৈ চেষ্টা চলাইছে। ইয়াৰ দ্বাৰা কেৱল নতুন উগ্ৰপন্থী নিযুক্তি দিয়াই নহয়, ধন সংগ্ৰহও হ’ব।
অহা ৮ নৱেম্বৰৰ পৰা অনলাইনযোগে আৰম্ভ হ’ব এই প্ৰশিক্ষণ ‘ক্লাছ’। প্ৰতিদিনে ৪০ মিনিট ধৰি চলিব। প্ৰশিক্ষণত যোগদান কৰা সকলো মহিলাৰ পৰা পাকিস্তানী ৫০০ টাকা (ভাৰতীয় মুদ্ৰাত ১৫৭ টাকা) লোৱা হ’ব।
পুলৱামা চি আৰ পি এফৰ কনভয় আক্ৰমণৰ লগত জড়িত উগ্ৰপন্থীৰ পত্নীয়ে মহিলা সদস্যসকলক প্ৰশিক্ষণ দিয়াৰ কামত নিয়োজিত হ’ব। এই পাঠ্যক্ৰমত ইছলাম আৰু জেহাদৰ বিষয় উত্থাপন কৰি অংশগ্ৰহণকাৰীসকলৰ ব্ৰেইনৱাছিং কৰা হ’ব।
ইপিনে, ভাৰতীয় চোৰাংচোৱা সংস্থাসমূহে সমগ্ৰ বিষয়টোৰ ওপৰত তীক্ষ্ণ দৃষ্টি ৰাখিছে। ইয়াৰ উপৰিও উগ্ৰপন্থীৰ কোনো ধৰণৰ আক্ৰমণ ৰোধ কৰিবলৈ সীমান্তত সাজু হৈ আছে জোৱানসকল।
