লোকসভা নিৰ্বাচনৰ প্ৰথম পৰ্য্যায়ৰ ভোটগ্ৰহণৰ কিছুদিন পূৰ্বে বিশ্বনাথ চাৰিআলিৰ চাওকাত আলী নামৰ মুছলমান সম্প্ৰদায়ৰ এজন লোকক গৰু মাংস বিক্ৰী কৰাৰ অপৰাধত কিছু সংখ্যক নিকৃষ্ট মানসিকতাৰ দুষ্টচক্ৰই ‘গাহৰি’ৰ মাংস জোৰ কৰি খুৱাই দিয়া ভিজুৱেল ভাইৰেল হৈ পৰিছিল।
ঘটনাটো ৰাজহুৱা হোৱাৰ পাছতেই সকলোৱে এই ঘটনাক একেমুখে নিন্দা কৰাৰ লগতে দোষীক উপযুক্ত শাস্তিৰ দাবী তুলিছিল।
শাসক-বিৰোধী সকলোৱে এই ঘটনাক একেমুখে নিন্দা কৰাৰ সময়তে জামাত উলেমা-ই-হিন্দৰ ৰাষ্ট্ৰীয় সভাপতি মৌলানা চুহেব কাছামিয়ে এই ঘটনাত ‘বিৰোধীৰ চক্ৰান্ত’ থকাৰ গোন্ধ পালে।
আজি ভাৰতীয় জনতা পাৰ্টীৰ হেঙেৰাবাৰীস্থিত ৰাজ্যিক কাৰ্য্যালয়ত এখন সংবাদমেল দি এই মন্তব্য কৰিছে মুছলমান নেতাজনে। তেওঁ বিজেপিৰ ভোট ভাঙিবলৈকে বিৰোধীয়ে এনে কাম কৰা বুলি অভিযোগ কৰে।
“ৰাজনৈতিক মুনাফা লাভৰ বাবে এই ঘটনা সংঘটিত কৰিছে, সেয়া সকলোৰে সন্মুখত স্পষ্ট হৈ পৰিছে। ভাৰতীয় জনতা পাৰ্টীক বিৰোধিতা কৰাৰ অন্য বিষয় নাই, সেয়েহে এনে কাৰ্য্যৰ আশ্ৰয় লৈছে।” কাছামিয়ে কয়।
ইয়াৰোপৰি, ইছলাম ধৰ্মীয় নেতাজনে অসমত উপস্থিত হৈয়ে কোনো আঁতি-গুৰি নজনাকৈ বিৰোধীলৈ দোষ ঠেলা কথাটোৱে বিশেষ তাৎপৰ্য্য বহন কৰিছে।
এজন সাংবাদিকে উলেমাৰ সভাপতিজনক “আপুনি কংগ্ৰেছ জড়িত থকা বুলি ক’ব বিচাৰে নেকি?” বুলি সোধাত তেওঁ কয় “সমগ্ৰ দেশেই এই কথা জানে। ৭০ বছৰ ধৰি এনেধৰণৰ কামসমূহ কৰি আহিছে, কিন্তু এতিয়া এইবোৰে কাম নিদিয়ে, দেশৰ জনতাই কংগ্ৰেছক বুজি পালে।”
আনহাতে, সংখ্যালঘু লোকসকলে বিজেপি চৰকাৰৰ দিনত অধিক সা-সুবিধা পোৱা বুলি দাবী কৰে কাছামিয়ে।
উলেমাৰ সভাপতিজনে কৰা এই মন্তব্যৰ পাছতে সৰৱ হৈ উঠিছে বিৰোধী দলপতি দেবব্ৰত শইকীয়া।
“মই কেতিয়াও নাভাবো এইটো কংগ্ৰেছে কৰিছে। আমি ইয়াৰ তদন্ত বিচাৰিছো, মানৱ অধিকাৰ আয়োগৰো কাষ চাপিছো। ইমান বছৰে এনে ঘটনা অসমত হোৱা নাছিল।” শইকীয়াই নৰ্থ-ইষ্ট নাওৰ আগত প্ৰতিক্ৰিয়া প্ৰকাশ কৰি কয়।
বিৰোধী দলপতিগৰাকীয়ে বিশ্বনাথ চাৰিআলিত সংঘটিত এনেধৰণৰ ঘটনা বিজেপি চৰকাৰৰ দিনতে প্ৰথমবাৰ হোৱা বুলি কয়।
তেওঁ কয়, “বিজেপিশাসিত প্ৰদেশসমূহত যোৱা সময়ছোৱাত এনে ঘটনা সংঘটিত হোৱা দেখা গৈছিল। অসমলৈয়ো তেওঁলোকে এনে ধৰণৰ বিসবাষ্প আনিবলৈ যত্ন কৰি আছে। মই এই ঘটনাৰ বাবে শাসক দলকে দোষ দিম।”
উল্লেখযোগ্য যে আজি নতুন দিল্লীতো এখন সংবাদমেল দি বিজেপিৰ মুছলমান নেতা তথা ৰাষ্ট্ৰিয় মুখপাত্ৰ ছাহনাৱাজ হুছেইনে অসমৰ প্ৰসংগ উত্থাপন কৰে। তেওঁ বদৰুদ্দিন আজমলক বাংলাদেশী মুছলমানৰ নেতা আখ্যা দিয়।
