সোমবাৰে বাণিজ্য আৰু উদ্যোগ মন্ত্ৰী পীয়ুষ গোৱেলে লোকসভাত উত্থাপন কৰিব জন বিশ্বাস (সংশোধনী) বিধেয়ক, ২০২৫। এই বিধেয়কখনৰ মূল লক্ষ্য হৈছে বিভিন্ন আইনত অন্তৰ্ভুক্ত ৩৫০টাতকৈও অধিক বিধানৰ মাজেৰে সৰু সৰু অপৰাধক অপৰাধমুক্ত কৰা অৰ্থাত নিম্নস্তৰৰ অপৰাধৰ সৈতে জড়িত অপৰাধমূলক শাস্তি আঁতৰাই, তাৰ ঠাইত জৰিমনা, সতৰ্কবাণী বা সামূহিক সেৱাৰ দৰে দেৱানী বা প্ৰশাসনিক নিষেধাজ্ঞাৰ ব্যৱস্থা কৰা হ’ব।
ইতিপূৰ্বে ২০২৩ চনৰ জন বিশ্বাস আইনত ১৮৩টা বিধানক অপৰাধমুক্ত কৰি সৰু সৰু উলংঘনকাৰী কাৰ্যৰ বাবে কাৰাদণ্ড আঁতৰাই তাৰ ঠাইত জৰিমনা বা বিকল্প শাস্তি প্ৰদানৰ ব্যৱস্থা কৰা হৈছিল। নতুন সংশোধনী বিধেয়কখন সেই আইনৰ ওপৰতে নিৰ্মাণ কৰা হৈছে বুলি সদৰী কৰিছে।
ইফালে প্ৰধানমন্ত্ৰী নৰেন্দ্ৰ মোদীয়ে স্বাধীনতা দিৱসৰ ভাষণত তুচ্ছ বিষয়ৰ বাবে কঠোৰ শাস্তি দিয়া আইনসমূহ অপসাৰণৰ প্ৰয়োজনীয়তাৰ কথা উল্লেখ কৰিছিল। তেওঁ উল্লেখ কৰিছিল যে চৰকাৰে এতিয়ালৈকে ১৫০০ৰো অধিক অচল আইন আৰু প্ৰায় ৪০ হাজাৰ অপ্রয়োজনীয় বিধি বাতিল কৰিছে, যাতে নিয়ম-কানুন সৰল কৰি জনস্বাৰ্থক অগ্ৰাধিকাৰ দিয়া যায়।
এই বিধেয়কখন ভাৰতৰ ব্যৱসায়িক পৰিৱেশ উন্নত কৰাৰ লগতে ন্যায়ালয়সমূহৰ ওপৰত থকা অধিক বোজা হ্ৰাস কৰাৰ অংশ হিচাপে আগবঢ়োৱা হৈছে বুলি সদৰী কৰিছে। সৰু সৰু অপৰাধক দণ্ডবিধি পৰিৱৰ্তে দেৱানী শাস্তি বা প্ৰশাসনিক ব্যৱস্থালৈ স্থানান্তৰিত কৰি সাধাৰণ নাগৰিকে সৰু ভুলৰ বাবে কাৰাদণ্ডৰ ভয় নোপোৱাকৈ আইন মানি চলিবলৈ উৎসাহিত হ’ব বুলি আশা প্ৰকাশ কৰিছে চৰকাৰে। অৱশ্যে চৰকাৰৰ এই পদক্ষেপে তেওঁলকে উল্লেখ কৰা সমস্যাসমূহৰ সমাধান কৰিব নে ই অপৰাধীক উদগনি যোগাব সেয়া লক্ষ্যণীয় হ’ব।
