জাপানৰ প্ৰধানমন্ত্ৰীৰ প্ৰস্তাৱিত অসম ভ্ৰমণসূচী বাতিল কৰা হৈছে বুলি আজি সদৰী কৰিছে অসমৰ মুখ্যমন্ত্ৰী হিমন্ত বিশ্ব শৰ্মাই। অৱশ্যে জাপানী চৰকাৰৰ মুৰব্বীগৰাকীৰ নতুন দিল্লী ভ্ৰমণৰ পূৰ্বনিৰ্ধাৰিত কাৰ্যসূচী অপৰিৱৰ্তিত থাকিব। সোমবাৰে নিশা প্ৰায় ১০:৩০ বজাত ভাৰতৰ বৈদেশিক সচিব বিক্ৰম মিছৰিয়ে অসমৰ মুখ্য সচিবক এই ভ্ৰমণসূচী বাতিল হোৱাৰ সন্দৰ্ভত আনুষ্ঠানিকভাৱে অৱগত কৰে বুলি মুখ্যমন্ত্ৰীয়ে সংবাদ মাধ্যমৰ আগত প্ৰকাশ কৰে।
সংবাদমেলক সম্বোধন কৰি মুখ্যমন্ত্ৰী শৰ্মাই কয় যে বৈদেশিক সচিবে জনোৱা অনুসৰি কিছুমান সমস্যাৰ বাবে জাপানৰ প্ৰধানমন্ত্ৰীৰ প্ৰস্তাৱিত অসম ভ্ৰমণ বাতিল কৰিবলগীয়া হৈছে আৰু এতিয়া এই ভ্ৰমণ কেৱল নতুন দিল্লীতে সীমাবদ্ধ থাকিব। ইয়াৰ উপৰিও, দুয়োপক্ষৰ সন্মতিমৰ্মে এটা পাৰস্পৰিকভাৱে সুবিধাজনক তাৰিখত প্ৰস্তাৱিত বিনিয়োগ সন্মিলনখন অনুষ্ঠিত হ’ব বুলি ৰাজ্য চৰকাৰক নিশ্চিতভাৱে আশ্বাস প্ৰদান কৰা হৈছে। অৱশ্যে বৈদেশিক পৰিক্ৰমা মন্ত্ৰালয়ৰ তৰফৰ পৰা এই বাতিলকৰণৰ কোনো বিতং কাৰণ এতিয়ালৈকে ৰাজ্য চৰকাৰক জনোৱা হোৱা নাই।
মুখ্যমন্ত্ৰীগৰাকীয়ে স্পষ্ট কৰি দিয়ে যে বাতিলকৰণৰ আঁৰৰ প্ৰকৃত কাৰণ ৰাজ্য চৰকাৰক বুজাই কোৱা হোৱা নাই আৰু তেওঁলোকে ইয়াৰ প্ৰকৃত কাৰণ নিশ্চিত কৰিব লাগিব। পৰৱৰ্তী সময়ত যেতিয়া তেওঁ নতুন দিল্লী ভ্ৰমণ কৰিব আৰু বৈদেশিক পৰিক্ৰমা মন্ত্ৰী এছ জয়শংকৰক সাক্ষাৎ কৰিব, তেতিয়া এই সমগ্ৰ বিষয়টোৰ এক স্পষ্ট ছবি লাভ কৰিব বুলি আশা প্ৰকাশ কৰে। এই সমগ্ৰ ঘটনাটোক অত্যন্ত হতাশাজনক বুলি বৰ্ণনা কৰি শৰ্মাই ২০১৯ চনৰ অনুৰূপ এক ঘটনাৰ কথা স্মৰণ কৰে, য’ত জাপানৰ প্ৰধানমন্ত্ৰীৰ তেনে এক প্ৰস্তাৱিত অসম ভ্ৰমণো অন্তিম মুহূৰ্তত বাতিল হৈছিল।
প্ৰস্তুতিৰ সন্দৰ্ভত উল্লেখ কৰি মুখ্যমন্ত্ৰীয়ে কয় যে বিগত এক মাহ ধৰি জাপান দূতাবাসৰ বিষয়াসকলে গুৱাহাটীত বাহৰ পাতি আছিল আৰু ভ্ৰমণৰ প্ৰতিটো দিশ সূক্ষ্মভাৱে পৰ্যবেক্ষণ কৰিছিল। হোটেলৰ ব্যৱস্থা, খাদ্য আৰু অন্যান্য সকলো লজিষ্টিকেল প্ৰস্তুতি ইতিমধ্যে চূড়ান্ত কৰা হৈছিল। অৱশ্যে সংশ্লিষ্ট কৰ্তৃপক্ষৰ পৰা আনুষ্ঠানিক তথ্য লাভ নকৰালৈকে এই সন্দৰ্ভত কোনো ধৰণৰ জল্পনা-কল্পনা কৰিবলৈ তেওঁ অস্বীকাৰ কৰে আৰু পৰৱৰ্তী সময়ত সঠিক তথ্য লাভ কৰাৰ পাছতহে পৰিস্থিতিৰ মূল্যায়ন কৰিব বুলি জানিবলৈ দিয়ে।
এই অনাকাংক্ষিত প্ৰত্যাহ্বানৰ স্বত্বেও, অসম চৰকাৰে জাপানৰ অংশগ্ৰহণেৰে হ’ব লগা প্ৰস্তাৱিত বিনিয়োগ সন্মিলনখন পৰৱৰ্তী সময়ত এক পাৰস্পৰিক সন্মতিৰ তাৰিখত অনুষ্ঠিত হ’ব বুলি আশাবাদী। বৰ্তমান ৰাজ্য চৰকাৰে কেন্দ্ৰীয় চৰকাৰ আৰু সংশ্লিষ্ট বিভাগৰ পৰা অধিক স্পষ্টীকৰণ লাভ কৰাৰ বাবে যোগাযোগ অব্যাহত ৰাখিছে।
