Japan’s Upper House Poll জাপানৰ প্ৰাক্তন প্ৰধানমন্ত্ৰী শিনজো আবেৰ হত্যাৰ পিছতে দেওবাৰে নিৰ্বাচন অনুষ্ঠিত হয়। এই নিৰ্বাচনৰ প্ৰচাৰৰ সময়ত ভাষণ দি থকাৰ সময়তে শিনজো আবেক গুলীয়াই হত্যা কৰা হৈছিল। দেওবাৰৰ নিৰ্বাচনৰ ফলাফলত আবেৰ দল বৰ্তমান জাপানৰ শাসকীয় দলে এক বৃহৎ বিজয় সাৱ্যস্ত কৰিছে।
কম ক্ষমতাপূৰ্ণ উচ্চ সদনৰ আধা আসনৰ বাবে হোৱা নিৰ্বাচনত লিবাৰেল ডেম’ক্ৰেটিক পাৰ্টি আৰু ইয়াৰ মিত্ৰজোঁটৰ অংশীদাৰ কোমেইটোৰ আসনৰ সংখ্যা ২৪৮ আসনৰ চেম্বাৰত হৈছেগৈ ১৪৬ খন। ফলস্বৰূপে তেওঁলোকে লাভ কৰা আসনৰ সংখ্যা সংখ্যাগৰিষ্ঠতাৰ বাবে প্ৰয়োজনীয় আসনৰ সংখ্যাতকৈ অধিক হৈছে।
লগতে পঢ়ক: Sri Lanka crisis: অতি দৰ্পে হত লংকা! কিদৰে উত্থান ঘটিছিল ৰাজপাক্ষে পৰিয়ালৰ, কেনেদৰে ঘটিল পতন?
ইয়াৰ ফলত জাপানৰ বৰ্তমানৰ প্ৰধানমন্ত্ৰীয়ে ২০২৫ চনত নিৰ্ধাৰিত নিৰ্বাচনৰ সময়লৈকে চৰকাৰখন সুৰক্ষিতভাৱে চলাবলৈ সক্ষম হ’ব।
এই জয়েৰে কিছিদাই ৰাষ্ট্ৰীয় সুৰক্ষা, নৱ্য-পুঁজিবাদী অৰ্থনীতি, অৰ্থনৈতিক নীতি আৰু সাংবিধানিক সংশোধনৰ দৰে দীৰ্ঘম্যাদী নীতিগত বিষয়ত কাম কৰাৰ সুযোগ পাব। তেওঁৰ দলে দীৰ্ঘদিন ধৰি আমেৰিকা যুক্তৰাষ্ট্ৰৰ দ্বাৰা প্ৰস্তুত কৰা যুদ্ধোত্তৰ শান্তিবাদী সংবিধান সংশোধন কৰিবলৈ প্ৰচেষ্টা চলাই আহিছে।
কিছিদাই এই জয়ক আদৰণি জনাইছে যদিও আবেক হেৰুৱাৰ বাবে এই জয়ত উৎফুল্লিত হোৱা নাই। তেওঁ জানে যে আবেৰ অবিহনে তেওঁৰ দলক একত্ৰিত কৰাৰ কামটো যথেষ্ট কঠিন।
আবেৰ হত্যাৰ পিছত দেওবাৰৰ নিৰ্বাচনে এক নতুন মাত্ৰা লাভ কৰে। নিৰ্বাচনটোত জাপানৰ সকলো ৰাজনৈতিক নেতাই মুক্ত বাক স্বাধীনতাৰ প্ৰয়োজনীয়তা আৰু হিংসাৰ বিৰুদ্ধে গণতন্ত্ৰৰ সুৰক্ষাৰ ওপৰত গুৰুত্ব আৰোপ কৰে।
শিনজো আবেৰ হত্যাই তেওঁৰ দলৰ প্ৰতি সহানুভূতিসূচক ভোটৰ পৰিমাণ বৃদ্ধি কৰিছে। দেওবাৰে ভোটদানৰ হাৰ আছিল প্ৰায় ৫২ শতাংশ। ২০১৯ চনত ই আছিল ৪৮.৮ শতাংশ। অৰ্থাৎ পূৰ্বৰ তুলনাত প্ৰায় ৩% অধিক ভোটদান হৈছে।