England avoid whitewash ভাৰতে ইতিমধ্যে শৃংখলাটো হস্তগত কৰিছিল। দেওবাৰৰ খেলখন কেৱল নিয়ম ৰক্ষাৰ খেল আছিল। খেলখনত ইংলেণ্ডে ২১৬ ৰাণৰ পাহাৰ ভাৰতৰ সন্মুখত লক্ষ্য হিচাপে নিৰ্দ্ধাৰণ কৰে। প্ৰত্যুত্তৰত ভাৰতে পাৱাৰ প্লে’ৰ ভিতৰতে তিনিটাকৈ উইকেট হেৰুৱায়।
দেওবাৰে টছত জয়ী হৈ ইংলেণ্ডে প্ৰথম বেটিং কৰাৰ সিদ্ধান্ত লয়। ভাৰতৰ অধিনায়ক ৰোহিত শৰ্মাই নিয়মৰক্ষাৰ এই খেলখনত দলটোত কেইবাটাও পৰিৱৰ্তন আনিছিল। ৰোহিতে যশপ্ৰীত বুমৰাহ, যুজবেন্দ্ৰ চাহালক বাহিৰত ৰাখি দলটো গঢ়িছিল। ভুৱনেশ্বৰ কুমাৰ আৰু হাৰ্দিক পাণ্ডিয়াকো বিশ্ৰাম দিয়া হৈছিল।
কিন্তু সকলোৰে চকু উমৰণ মালিকৰ ওপৰত আছিল। তেওঁ ধ্বংসাত্মক অপেনাৰ জেচন ৰয়ক ঘূৰাই পঠিয়াইছিল যদিও চাৰি অভাৰত ৫৬ ৰাণ দিছিল।
এপিনে ক্ৰমাগতভাৱে উইকেট পৰিছিল যদিও ডাভিদ মালানে শীতল মস্তিস্কৰে বেটিং কৰিছিল। তেওঁ মাত্ৰ ৩০ টা বলত অৰ্ধশতক অৰ্জন কৰে। অৱশেষত মালানে ৭৭ ৰাণৰ ব্যক্তিগত স্ক’ৰত পেভলিয়নমুখী হয়। তেওঁ চতুৰ্থ উইকেটৰ যুটীত লিয়াম লিভিংষ্টনৰ সৈতে ৮৪ ৰাণৰ পাৰ্টনাৰশ্বিপ গঢ়ে।
লেগস্পিনাৰ ৰবি বিষ্ণোই এটা অভাৰত দুটা উইকেট লৈ ভাৰতক খেলখনৰ মাজলৈ ঘূৰাই আনিছিল যদিও শেষত লিভিংষ্টনে পুনৰ ধুমুহাৰ সৃষ্টি কৰে। ইংলেণ্ডৰ ইনিংছ ২১৫ ৰাণত সমাপ্ত হয়।
ঋষভ পন্তে অধিনায়ক ৰোহিতৰ সৈতে ইনিংছ আৰম্ভ কৰিবলৈ আহি দ্বিতীয়টো অভাৰতে পেভলিয়নলৈ ওভতে। বিৰাট কোহলীয়ে মাত্ৰ ১১ ৰাণ কৰি পেভিলিয়নলৈ উভতি যায়। একেটা স্ক’ৰতে উভতি যায় অধিনায়ক ৰোহিতো।
তাৰ পিছত সূৰ্যকুমাৰ যাদৱে দলৰ হৈ যুঁজৰ নেতৃত্ব দিয়ে। ইংলেণ্ডত দেওবাৰে যেন সূৰ্যোদয়ৰ দিনহে আছিল। শ্ৰেয়াস আয়াৰৰ সৈতে শতকীয় পাৰ্টনাৰশ্বিপ গঢ়ি সূৰ্যকুমাৰে ভাৰতক খেলখনলৈ ঘূৰাই আনিবলৈ চেষ্টা কৰে। সূৰ্যকুমাৰে ৪৮ টা বলত শতক অৰ্জন কৰিছিল। আন কোনো বেটাৰে তেনেদৰে ৰাণ তুলিব নোৱাৰিলে। ভাৰতৰ ইনিংছ ১৯৮ ৰাণত সমাপ্ত হয়।
💯
A magnificent CENTURY from @surya_14kumar 👏👏
His first in international cricket!
Live – https://t.co/hMsXyHNzf8 #ENGvIND pic.twitter.com/LwZVee9Ali
— BCCI (@BCCI) July 10, 2022
মহেন্দ্ৰ সিং ধোনীও দেওবাৰে খেলখন চাবলৈ উপস্থিত হৈছিল। দৰ্শকৰ মাজত উপস্থিত আছিল টীম ইণ্ডিয়াৰ প্ৰাক্তন প্ৰশিক্ষক ৰবি শাস্ত্ৰীও। ভাৰতে তেওঁলোকৰ সন্মুখতে টি-২০ ট্ৰফী জিকিলে যদিও অন্তিম খেলখনত হাৰিল।