ধলাই সমষ্টিত মন্ত্ৰী জয়ন্তমল্লই ভোট বিচাৰি মুকলিভাৱে সাধাৰণ ৰাইজক ভয়-ভাবুকি প্ৰদান কৰা কাৰ্যক তীব্ৰ ভাষাৰে গৰিহণা দিছে অসম প্ৰদেশ কংগ্ৰেছ কমিটিয়ে।
ভোট নিদিলে ৰেচন কাৰ্ড কটা যাব আৰু অৰুণোদয় নাপাব বুলি মন্ত্ৰীজনে ৰাজহুৱাকৈ ঘোষণা কৰা কাৰ্যক অশোভনীয় আখ্যা দিছে কংগ্ৰেছে।
এই সন্দৰ্ভত প্ৰতিক্ৰিয়া প্ৰকাশ কৰি অসম প্ৰদেশ কংগ্ৰেছ কমিটিৰ মিডিয়া বিভাগৰ অধ্যক্ষ বেদব্ৰত বৰাই কয়, ”মন্ত্ৰী জয়ন্তমল্লই সীমা চেৰাই গৈ এইবুলিও কৈছে যে বিজেপিয়ে যদি অধিক ভোট লাভ নকৰে তেতিয়াহ’লে অৰুণোদয়ৰ নামত অহা ফাইলত অভিভাৱক মন্ত্ৰী হিচাপে তেওঁ চহী নকৰে। জামালপুৰত এখন নিৰ্বাচনী সভাত অংশগ্ৰহণ কৰি জয়ন্তমল্লই কয় যে যোৱা লোকসভা নিৰ্বাচনত এই এলেকাৰ পৰা ২৭৫৮টা ভোট লাভ কৰিছিল। এইবাৰ যদি ভোটৰ সংখ্যা বৃদ্ধি নাপায় তেতিয়াহ’লে অৰুণোদয় কৰ্তন কৰিব চৰকাৰে। অভিভাৱক মন্ত্ৰী হিচাপে তেওঁ কোনো ফাইলতে চহী নকৰে বুলি ৰাইজক ব্লেকমেইলিং কৰা আৰম্ভ কৰিছে মন্ত্ৰীজনে। এয়া দেখদেখকৈ বিজেপিৰ ব্লেকমেইলিঙৰ ৰাজনীতি।’’
ইয়াৰ পূৰ্বেও ধলাই সমষ্টিত মন্ত্ৰীজনে সংখ্যালঘু ৰাইজক কাম-বন পাবলৈ হ’লে বিজেপিক ভোট দিবলৈ দাবী জনাইছিল বুলি উল্লেখ কৰি সকলোৰে প্ৰতি সমভাৱ দেখুওৱাৰ সাংবিধানিক শপত লোৱা মন্ত্ৰীজনৰ এনে বৈষম্যমূলক আচৰণ গণতন্ত্ৰৰ বাবে বিপদজনক বুলি মন্তব্য কৰে বৰাই।
সাধাৰণ ৰাইজক ভোট বিচৰাৰ নামত ব্লেকমেইলিং কৰাতো নিৰ্বাচনী আচৰণ বিধিৰ পৰিপন্থী বুলি উল্লেখ কৰি বিষয়টো নিৰ্বাচন আয়োগৰো দৃষ্টিগোচৰ কৰে প্ৰদেশ কংগ্ৰেছৰ মিডিয়া বিভাগৰ অধ্যক্ষগৰাকীয়ে। বৰাই কয় যে, ধলাই সমষ্টিত বিজেপিৰ প্ৰাৰ্থীজনৰ শোচনীয় পৰাজয় নিশ্চিত হোৱাৰ পিছতে গাদী ৰক্ষাৰ স্বাৰ্থত জয়ন্তমল্ল বৰুৱাই নিজৰ সাংবিধানিক মৰ্যাদাৰ কথা পাহৰি পেলাইছে।
অসাংবিধানিক কাম-কাজত জড়িত মন্ত্ৰীজনৰ বিৰুদ্ধে ব্যৱস্থা গ্ৰহণ কৰিবলৈকো বৰাই আয়োগক আহ্বান জনাইছে।
