পুনৰ ৰাজনৈতিক হিংসাই জোকাৰি গৈছে বিহাৰৰ পাটনা। বিধানসভা নির্বাচনৰ পূর্বে দলৰ প্রার্থীৰ পক্ষত প্রচাৰ চলাই থকা অৱস্থাত গুলীয়াই হত্যা কৰা হৈছিল জন সুৰজ পাৰ্টিৰ এগৰাকী কর্মীক৷ নিহত লোকজনৰ নাম দুলাৰচান্দ যাদৱ। পাটনাৰ মকামা বিধান সভা সমষ্টিৰ তাল অঞ্চলত সংঘটিত হৈছিল এই ঘটনা।
বিহাৰ আৰক্ষীয়ে হত্যাকাণ্ডৰ লগত জড়িত থকাৰ অভিযোগত গ্ৰেপ্তাৰ কৰিছে মকামাৰ জেডিইউৰ প্ৰাৰ্থী অনন্ত সিঙক। শনিবাৰে মাজ নিশা এক নাটকীয় অভিযানত তেওঁক গ্ৰেপ্তাৰ কৰে।
পাটনাৰ উপ আৰক্ষী অধীক্ষক কাৰ্তিকে শৰ্মাই অনন্ত সিঙৰ গ্ৰেপ্তাৰৰ খবৰ নিশ্চিত কৰিছে। তেওঁ কয়, “এই ঘটনা সংঘটিত হৈছে প্ৰাৰ্থী অনন্ত সিঙৰ উপস্থিতিত। প্ৰমাণ, প্ৰত্যক্ষদৰ্শীৰ বক্তব্য আৰু মৰণোত্তৰ পৰীক্ষাৰ প্ৰতিবেদনত সেই তথ্য পোহৰলৈ আহিছে। সেয়েহে তেওঁক আৰু তেওঁৰ দুই সহযোগীক গ্ৰেপ্তাৰ কৰা হৈছে।”
আৰক্ষী সূত্ৰৰ পৰা জানিব পৰা মতে, শনিবাৰে মাজ নিশা প্ৰায় ১৫০ জনীয়া আৰক্ষীৰ এটা দলে পাটনাৰ সমীপৰ বৰা অঞ্চলত অনন্ত সিঙৰ বাসগৃহত ব্যাপক অভিযান চলায়। স্বয়ং এছ এছ পি শৰ্মাই ইয়াৰ নেতৃত্ব দিছিল। তাৰ পৰাই অনন্ত সিঙক জিম্মাত লোৱা হয়। লগতে তেওঁৰ দুই ঘনিষ্ঠ মণিকান্ত ঠাকুৰ আৰু ৰঞ্জিত ৰামকো গ্ৰেপ্তাৰ কৰে আৰক্ষীয়ে। তিনিওজনকে সোধা-পোছাৰ বাবে পাটনালৈ অনা হৈছে।
এই ঘটনাৰ পিছত নিৰ্বাচন আয়োগেও প্ৰতিবেদন বিচাৰিছে। আয়োগৰ তথ্য অনুসৰি নিৰ্বাচনী আচৰণ বিধি উলংঘা কৰাৰ উপৰিও এইটো অতি গুৰুতৰ অপৰাধ।
মন কৰিবলগীয়া যে বৃহস্পতিবাৰে দুলাৰচন্দ যাদৱৰ হত্যাকাণ্ডৰ পিছত জন সুৰজ পাৰ্টিয়ে জেডিইউৰ বিৰুদ্ধে সৰৱ হৈছিল। দলটোৰ প্ৰতিষ্ঠাপক প্ৰশান্ত কিশোৰে এটা টুইটৰ জৰিয়তে পোনপটীয়াকৈ জেডিইউক দোষাৰোপ কৰে। ইয়াৰ পিছতে এফআইআৰ দাখিল কৰা হয়।
জন সুৰজ পাৰ্টিৰ মকামাৰ প্ৰাৰ্থী পীয়ুষ প্ৰিয়দৰ্শীয়ে অনন্ত সিঙৰ গ্ৰেপ্তাৰক ‘বিলম্বিত পদক্ষেপ’ বুলি অভিহিত কৰিছে। সংবাদ সংস্থাক তেওঁ কয়, “আৰক্ষীৰ কাৰ্য্য নিশ্চিতভাৱে সঠিক আছিল, কিন্তু বহু দেৰিকৈ আহিছে। কালিও অনন্ত সিঙে ৫০খন বাহনৰ কনভয়ত প্ৰচাৰ চলাবলৈ ওলাইছিল। তেওঁৰ বিৰুদ্ধে এফআইআৰ দাখিল হোৱাৰ পিছত তেওঁক গ্ৰেপ্তাৰ কৰা উচিত আছিল। এতিয়া আমি চাব লাগিব যে তদন্ত কিমান নিৰপেক্ষ হয়।”
৬ নৱেম্বৰত বিহাৰত প্ৰথম পৰ্যায়ৰ বিধানসভা নিৰ্বাচন।তাৰ আগেয়ে পাটনাত সংঘটিত হোৱা হত্যাকাণ্ডই ৰাজ্যজুৰি তীব্ৰ ৰাজনৈতিক উত্তেজনা বিয়পাইছে।
আৰক্ষীয়ে জনোৱা মতে, বৃহস্পতিবাৰে জন সুৰজ পাৰ্টিৰ প্ৰাৰ্থী পীযুষ প্ৰিয়দৰ্শীৰ সমৰ্থনত মকামাত এক শোভাযাত্ৰাৰ আয়োজন কৰা হৈছিল। একে সময়তে তাত জেডিইও প্ৰচাৰ চলাইছিল। দুয়োটা শোভাযাত্ৰা মুখামুখি হোৱাৰ লগে লগে সংঘৰ্ষ আৰম্ভ হয়। সেই সময়ত গুলীচালনা হৈছিল। গুলীবিদ্ধ হৈ থিতাতে মৃত্যু হয় দুলাৰচান্দ যাদৱৰ।
নিৰ্বাচনৰ ঠিক আগতে সংঘটিত এই হত্যাকাণ্ড এতিয়া বিহাৰৰ ৰাজনীতিৰ কেন্দ্ৰবিন্দু। বিৰোধীয়ে কয় যে নিৰ্বাচনৰ পূৰ্বে জেডিইউৰ পৃষ্ঠপোষকতাত ‘আতংকৰ ৰাজনীতি’ চলি আছে। আনহাতে, এই পৰ্যন্ত শাসকীয় জেডিইউ দলৰ কোনো আনুষ্ঠানিক প্ৰতিক্ৰিয়া পোৱা হোৱা নাই।
