ভাৰতীয় মহিলা ক্ৰিকেট দলৰ অভিজ্ঞ পেচাৰ ঝুলন গোস্বামীয়ে আজি আইচিচি মহিলা বিশ্বকাপত সৰ্বাধিক উইকেট দখলৰ এক নতুন অভিলেখ স্থাপন কৰিছে।
হেমিল্টনৰ ছেডন পাৰ্কত ৱেষ্ট ইণ্ডিজৰ বিৰুদ্ধে অনুষ্ঠিত মেচত আজি ঝুলনে এই কৃতিত্ব অৰ্জন কৰিছে। ৱেষ্ট ইণ্ডিজৰ নিম্নক্ৰমৰ বেটাৰ আনিছা মহম্মদক আউট কৰি এই সাফল্য অৰ্জন কৰে ঝুলন গোস্বামীয়ে।
এই ক্ষেত্ৰত গোস্বামীয়ে ভংগ কৰে অষ্ট্ৰেলিয়াৰ প্ৰাক্তন ক্ৰিকেটাৰ লিন ফুলষ্টনৰ ৩৪ বছৰীয়া পুৰণি অভিলেখ। ফুলষ্টনৰ নামত আছিল বিশ্বকাপত ৩৯ টা উইকেটৰ ৰেক’ৰ্ড।
আজি মেচখনত ঝুলন গোস্বামীয়ে বিশ্বকাপত দখল কৰা উইকেটৰ সংখ্যা ৪০ টালৈ বৃদ্ধি কৰে। বিশ্বকাপত ৩১ তম খেলত ঝুলন গোস্বামীয়ে এই কৃতিত্ব অৰ্জন কৰিছে।
৩৯ বৰ্ষীয় তাৰকা পেচাৰ গৰাকীয়ে এইবাৰ পঞ্চমবাৰৰ বাবে মহিলা এদিনীয়া বিশ্বকাপত ভাৰতক প্ৰতিনিধিত্ব কৰিছে। ইয়াৰ পূৰ্বে ঝুলন গোস্বামীয়ে ২০০৫, ২০০৯, ২০১৩ আৰু ২০১৭ সংস্কৰণত দেশৰ হৈ অৱতীৰ্ণ হৈছিল।
উল্লেখ্য যে আজি ভাৰতে ৱেষ্ট ইণ্ডিজক ১৫৫ ৰাণৰ বৃহৎ ব্যৱধানত পৰাস্ত কৰি চলিত বিশ্বকাপত দ্বিতীয় জয় সাব্যস্ত কৰে।প্ৰথম মেচত পাকিস্তানক পৰাস্ত কৰাৰ পিছত দ্বিতীয় মেচত নিউজিলেণ্ডৰ বিৰুদ্ধে পৰাস্ত হৈছিল ভাৰত।
আজি প্ৰথমে বেটিং কৰাৰ সিদ্ধান্ত লোৱাৰ পিছত ভাৰতে প্ৰাৰম্ভিক অৱস্থাতে উইকেট হেৰুৱালেও অপেনাৰ স্মৃতি মান্ধানা (১২৩) আৰু হৰমনপ্ৰীত কৌৰৰ (১০৯) দৰ্শনীয় শতকীয় ইনিংছৰ সহায়ত আঠ উইকেটত ৩১৭ ৰাণ সংগ্ৰহ কৰে।
ইয়াৰ প্ৰত্যুত্তৰত ৱেষ্ট ইণ্ডিজক ১৬২ ৰানতে অল আউট কৰি ১৫৫ ৰানৰ বিশাল জয় সাব্যস্ত কৰে ভাৰতে। ভাৰতৰ হৈ স্নেহ ৰানাই ৩ টা উইকেট দখল কৰে।