নতুন দিল্লীৰ জৱাহৰলাল নেহৰু বিশ্ববিদ্যালয় (জে এন ইউ)ত প্ৰথমবাৰৰ বাবে অসমৰ বৈষ্ণৱ গুৰু, সমাজ সংস্কাৰক শ্ৰীমন্ত শংকৰদেৱৰ শিক্ষা আৰু দৰ্শন প্ৰসাৰৰ উদ্দেশ্যে তেওঁৰ জীৱন আধাৰিত এখন নাট মঞ্চস্থ হ’ব।
দ্য টেলিগ্ৰাফ কাকতত প্ৰকাশিত এটি বাতৰিত কোৱা হৈছে যে এই গোটেই পৰিকল্পনাটো গ্ৰহণ কৰিছে আন্তৰ্জাতিক সত্ৰীয়া সংস্কৃতিৰ খ্যাতনামা ব্যক্তি ভবানন্দ বৰবায়নে। বৰবায়নে জানিবলৈ দিয়ে যে অক্টোবৰত মঞ্চস্থ হ’বলগীয়া ‘ধন্যতহু শ্ৰীমন্ত শংকৰদেৱ’ জে এন ইউৰ বিদ্যাৰ্থীসকলৰ মাজত মহাপুৰুষগৰাকীৰ দৰ্শন দাঙি ধৰাৰ প্ৰথমটো পদক্ষেপ।
বাতৰিটোত লগতে কোৱা হৈছে যে বৰবায়নে লগতে বিশ্ববিদ্যালয়খনৰ জ্যেষ্ঠ বিষয়ববীয়াসকলৰ সৈতে বিশ্ববিদ্যালয়খনৰ স্কুল অফ সংস্কৃত এণ্ড ইণ্ডিক ষ্টাডিজৰ পাঠ্যক্ৰমত ‘শংকৰদেৱ’ এটা বিষয় হিচাপে ৰখাৰ বাবে প্ৰস্তাৱ আগবঢ়াইছে আৰু তেওঁলোকৰ সৈতে সম্পৰ্ক ৰক্ষা কৰি চলিছে।
বিশ্ববিদ্যালয়খনৰ কনভেনশ্বন চেন্টাৰত অহা ২৭ অক্টোবৰত মঞ্চস্থ হ’বলগীয়া নাটখনত জে এন ইউ আৰু তেওঁৰ দিল্লীস্থিত বিদ্যালয়ৰ ২৫ গৰাকী অভিনেতাৰ এটা দলৰ লগতে বৈষ্ণৱ সংস্কৃতিৰ পীঠস্থান মাজুলীৰ সত্ৰীয়া ভকতেও অংশ ল’ব। পৰম্পৰাগত সত্ৰীয়া সংগীতৰ আন এটা দলেও ব্ৰজবুলি ভাষাত মঞ্চস্থ হ’বলগীয়া নাটখনত ভাগ ল’ব। অহা ১৫ ছেপ্টেম্বৰৰ পৰা কৰ্মশালা তথা আখৰা আৰম্ভ হ’ব।