নিউজ ৱেব পৰ্টেল নিউজক্লিক আৰু পৰ্টেলৰ প্ৰতিষ্ঠাপকসকলৰ বিৰুদ্ধে দেশদ্ৰোহিতাৰ অভিযোগ উত্থাপনৰ পিছতে গভীৰ উদ্বেগ প্ৰকাশ কৰিছে প্ৰেছ ক্লাব অৱ ইণ্ডিয়া, প্ৰেছ এছ’চিয়েশ্যন, দিল্লী ইউনিয়ন অৱ জাৰ্নেলিষ্টছ আৰু ইণ্ডিয়ান ৱ’মেনছ প্ৰেছ কৰ্পছ- এ।
এই আৰোপক ৰাজনৈতিক লক্ষ্যভিত্তিক অভিযান হিচাপে অভিহিত কৰিছে প্ৰেছ সংগঠনসমূহে। এক প্ৰেছ বিবৃতি যোগে প্ৰেছ সংগঠনকেইটাই কয় যে শেহতীয়াকৈ সংসদৰ একাংশ সদস্যকে ধৰি জ্যেষ্ঠ ৰাজনৈতিক ব্যক্তিয়ে নিউজক্লিকে চুবুৰীয়া দেশ এখনৰ মুখপাত্ৰ হিচাপে কাম কৰে বুলি উত্থাপন কৰা অভিযোগ অযুক্তিকৰ আৰু নিন্দনীয়।
নিউজক্লিকৰ সমৰ্থনত যুক্তি আগবঢ়াই প্ৰেছ সংগঠনকেইটাই কয় যে, সংবাদ সংস্থাটোৱে আন সংবাদ মাধ্যমৰ দৰে চৰকাৰী কাৰ্য্যক সমালোচনাত্মকভাৱে পৰীক্ষা কৰা কাৰ্যৰ বাবে পৰ্টেলটোক দেশপ্ৰেমহীন বা কোনো বিদেশী ৰাষ্ট্ৰৰ আহিলা বুলি গণ্য কৰা নহয়।
প্ৰকাশিত কোনো প্ৰবন্ধই আন দেশৰ নীতিৰ ওপৰত সমালোচনাত্মক অথবা প্ৰশংসাসূচক দৃষ্টিভংগী আগবঢ়ালেই লেখাসমূহৰ জৰিয়তে সেই দেশৰ পোষকতা কৰা বুলি গণ্য কৰা উচিত নহয় আৰু সেয়ে ৰাষ্ট্ৰবিৰোধী বা ৰাষ্ট্ৰদ্ৰোহী আখ্যা দিয়া সঠিক নহয় বুলিও সংবাদ সংস্থাসমূহে উল্লেখ কৰে।
প্ৰেছ সংস্থাসমূহে লগতে নিউজক্লিক ধনৰ উৎস যিদৰে নিৰীক্ষণৰ অধীনত ৰখা হৈছে, তেনেদৰে স্বচ্ছতাপূৰ্ণভাৱে বিভিন্ন পৰ্টেলৰ ক্ষেত্ৰতো নিৰীক্ষণ কৰা উচিত বুলি দাবী জনায়। অন্যথা নিউজক্লিকক লক্ষ্য কৰি শেহতীয়াকৈ চলোৱা অভিযানক উদ্দেশ্যপ্ৰণোদিত বুলি চিহ্নিত কৰিব পৰা যাব বুলি দোহাৰে প্ৰেছ সংগঠনকেইটাই।
বিবৃতিটোত লগতে নিউজক্লিক আৰু প্ৰতিষ্ঠানটোৰ প্ৰতিষ্ঠাপকসকলৰ বিৰুদ্ধে লক্ষ্য কৰি লোৱা অভিযান বন্ধ কৰাৰ লগতে সংবাদ মাধ্যমক মুক্ত আৰু স্বতন্ত্ৰভাৱে কাৰ্য সম্পাদনৰ বাবে অনুমতি দিবলৈ চৰকাৰক আহ্বান জনায়। গণতন্ত্ৰৰ সজীৱতা এক স্বতন্ত্ৰ সংবাদ মাধ্যমৰ সৈতে অবিচ্ছেদ্যভাৱে জড়িত বুলি উল্লেখ কৰে বিবৃতিটোত।
নিউজক্লিকৰ মুখ্য সম্পাদক প্ৰবীৰ পুৰকায়স্থয়ো পৰ্টেলটোৰ বিৰুদ্ধে উত্থাপিত অভিযোগ নাকচ কৰি এক বিবৃতি প্ৰকাশ কৰিছে। পুৰকায়স্থই নিউজক্লিকৰ বিৰুদ্ধে চলি থকা উদ্দেশ্যপ্ৰণোদিত অভিযান বন্ধ কৰিবলৈ আৰু সংবাদ মাধ্যমক মুক্ত আৰু স্বতন্ত্ৰভাৱে কাম কৰিবলৈ অনুমতি দিবলৈ চৰকাৰক আহ্বান জনায়।
উল্লেখ্য যে, শাসকীয় বিজেপিয়ে শেহতীয়াকৈ দ্য নিউয়ৰ্ক টাইমছৰ এক প্ৰতিবেদনৰ উদ্ধৃতি দি নিউজক্লিকক চীনৰ সৈতে জড়িত একাংশ কোম্পানীয়ে অৰ্থ বিনিয়োগ কৰে বুলি দাবী কৰিছিল। ইয়াৰ দ্বাৰা সংবাদ সংস্থাটোৰ বিপক্ষে দেশবিৰোধী আৰু চীনৰ প্ৰচাৰ চলোৱা বুলি অভিযোগ আৰোপ কৰা হৈছিল।
