ম্যানমাৰ দক্ষিণ-পূব এছিয়াৰ অশান্ত ৰাষ্ট্ৰ ম্যানমাৰত দেওবাৰৰ পৰা তিনিটা পৰ্যায়ত নিৰ্বাচন অনুষ্ঠিত হৈছে। ২০২১ চনৰ সামৰিক অভ্যুত্থানৰ পাছত দেশখনত যি চৰম অস্থিৰতাৰ সৃষ্টি হৈছিল সেই অচলাৱস্থা প্ৰশমিত কৰাৰ দোহাই দি সামৰিক জুন্টা চৰকাৰে ২০২৫ চনত দেশখনত সাধাৰণ নিৰ্বাচন অনুষ্ঠিত কৰাৰ ব্যাপক প্ৰস্তুতি চলাইছে। দেশখনৰ বিভিন্ন বিদ্ৰোহী সংগঠনবোৰ সক্ৰিয় হৈ অঞ্চলসমূহক বাদ ২৮ ডিচেম্বৰ, ১১ জানুৱাৰী আৰু ২৫ জানুৱাৰীত তিনিটা পৰ্যায়ত নিৰ্বাচন অনুষ্ঠিত কৰিছে জুণ্টাই।
ম্যানমাৰৰ সামৰিক শাসক মিন অং হ্লাইঙৰ নেতৃত্বাধীন সামৰিক প্ৰশাসনে ঘোষণা কৰিছে যে দেশখনত এক ‘মুক্ত আৰু নিকা’ নিৰ্বাচন অনুষ্ঠিত হ’ব। এই লক্ষ্যৰে বৰ্তমান দেশজুৰি আৰম্ভ হৈছে ভোটাৰ তালিকা প্ৰস্তুতৰ বাবে লোকপিয়লৰ কাম।নিৰ্বাচনৰ বাবে সামৰিক চৰকাৰে ঘৰে ঘৰে গৈ তথ্য সংগ্ৰহ কৰিছে, যদিও বিদ্ৰোহী নিয়ন্ত্ৰিত অঞ্চলসমূহত এই কামত বাধা আহি পৰিছে।
নতুন নিৰ্বাচনী নিয়ম অনুসৰি কেৱল সেইবোৰ দলকহে নিৰ্বাচনত অংশ ল’বলৈ দিয়া হৈছে যিবোৰ দলে সামৰিক বাহিনীৰ কঠোৰ চৰ্তসমূহ মানি লৈছে। সেয়ে এই নিৰ্বাচনক গণতন্ত্ৰৰ মুখা পিন্ধি নিৰ্বাচনী ব্যৱস্থাৰে সামৰিক বাহিনীয়ে ক্ষমতা দখলৰ নতুন কৌশল বুলিও অভিহিত কৰা হৈছে।
এই নিৰ্বাচনত দেশখনৰ সবাতোকৈ জনপ্ৰিয় নেত্ৰী তথা শান্তিৰ নোবেল বিজয়ী আং চান চ্যু কী দল ‘নেচনেল লীগ ফৰ ডেম’ক্ৰেচী’য়ে নিৰ্বাচনত প্ৰতিদ্বন্দ্বিতা কৰা নাই। কাৰাৰুদ্ধ আং চান চ্যু কীৰ দলটোক সামৰিক শাসকে ইতিমধ্যে অবৈধ ঘোষণা কৰিছে।
ইপিনে ম্যানমাৰৰ চৰকাৰৰ ছাঁৰ দৰে পৰিচিত ‘নেচনেল ইউনিটী গভৰ্ণমেণ্ট’ আৰু বিভিন্ন সশস্ত্ৰ বিদ্ৰোহী গোষ্ঠীয়ে এই নিৰ্বাচনক এক ‘প্ৰহসন’ বুলি আখ্যা দি বিৰোধিতা কৰিছে। তেওঁলোকৰ মতে সামৰিক চৰকাৰে নিজৰ ক্ষমতা স্থায়ী কৰিবলৈহে এই নিৰ্বাচনৰ নাটক ৰচনা কৰিছে।
ইপিনে অশান্তজৰ্জৰ দেশৰ প্ৰায় আধাতকৈ অধিক অংশ বৰ্তমান সামৰিক বাহনীৰ সম্পূৰ্ণ নিয়ন্ত্ৰণত নাই। তেনেস্থলত নিৰ্বাচন অনুষ্ঠিত কৰাটো কিমান সম্ভৱ, তাক লৈও প্ৰশ্ন উত্থাপন হৈছে। দেশখনৰ প্ৰভাৱশালী বিভিন্ন বিদ্ৰোহী গোটসমূহে সতৰ্ক কৰি দিছে যে তেওঁলোকে সামৰিক চৰকাৰৰ এই নিৰ্বাচনী প্ৰক্ৰিয়াক বাধা দিব।
আনহাতে, ৰাষ্ট্ৰসংঘ আৰু পশ্চিমীয়া দেশসমূহেও ম্যানমাৰৰ এই নিৰ্বাচনক লৈ সন্দেহ প্ৰকাশ কৰিছে। আমেৰিকা যুক্তৰাষ্ট্ৰই স্পষ্ট কৰি দিছে যে বিৰোধীহীন আৰু দমনমূলক পৰিৱেশত হোৱা কোনো নিৰ্বাচনক আন্তঃৰাষ্ট্ৰীয় সম্প্ৰদায়ে স্বীকৃতি নিদিয়ে। অৱশ্যে চীন আৰু ৰাছিয়াৰ দৰে দেশসমূহে ম্যানমাৰৰ এই পদক্ষেপক সমৰ্থন কৰাৰ ইংগিত দিছে।
এনে পৰিস্থিতিত এই নিৰ্বাচনে দেশখত গণতন্ত্ৰ প্ৰতিষ্ঠা কৰাৰ বিপৰীতে অধিক হিংসাজৰ্জ আৰু অশান্ত কৰি তুলিব বুলিহে আশংকা কৰা হৈছে। নিৰ্বাচনত সকলো পক্ষই অংশগ্ৰহণ নকৰাত এই নিৰ্বাচনে দেশখনক অধিক গৃহযুদ্ধৰ ফালেহে ঠেলি দিয়াৰ সম্ভাৱনা আছে বুলিও আন্তঃৰাষ্ট্ৰীয় স্তৰত চৰ্চা চলিছে।
