গুৱাহাটী উ. ন্যায়ালয়ৰ মুখ্য বিচাৰপতি ৰূপে ন্যায়াধীশ অজয় লাম্বাৰ শপত গ্ৰহণ
ন্যায়াধীশ অজয় লাম্বাই সোমবাৰে গুৱাহাটী উচ্চ ন্যায়ালয়ৰ মুখ্য বিচাৰপতি হিচাপে শপত গ্ৰহণ কৰিছে।
৫ অক্টোবৰত মুখ্য বিচাৰপতিৰূপে নিযুক্ত ন্যায়াধীশ লাম্বাক অসমৰ ৰাজ ভৱনত আয়োজিত অনুষ্ঠানত ৰাজ্যপাল জগদীশ মুখীয়ে শপত বাক্য পাঠ কৰোৱায়।
আৰু উচ্চ ন্যায়ালয়খনৰ ভাৰপ্ৰাপ্ত মুখ্য ন্যায়াধীশ অৰূপ কুমাৰ গোস্বামীৰ পৰা আনুষ্ঠানিকভাৱে দায়িত্বভাৰ গ্ৰহণ কৰে।
শপতগ্ৰহণ অনুষ্ঠানটোত অসমৰ মুখ্য মন্ত্ৰী সৰ্বানন্দ সোণোৱালৰ লগতে আইনী মহলৰ বহু লোকে অংশ গ্ৰহণ কৰে।
১৯৫৮ চনত জন্মলাভ কৰা অজয় লাম্বাই পঞ্জাৱ বিশ্ববিদ্যালয়ৰ পৰা আইনৰ স্নাতক ডিগ্ৰী অৰ্জন কৰে আৰু অধিবক্তা হিচাপে নিজৰ কৰ্মজীৱন আৰম্ভ কৰে।
২০০৬ চনত পঞ্জাৱ আৰু হাৰিয়ানা উচ্চ ন্যায়ালয়ত লাম্বাই ন্যায়াধীশ হিচাপে নিযুক্তি লাভ কৰে আৰু ২০১১ চনত তেওঁক এলাহাবাদ উচ্চ ন্যায়ালয়লৈ ন্যায়াধীশ হিচাপে বদলি কৰা হয়।
ন্যায়াধীশ অৰূপ কুমাৰ গোস্বামীয়ে ২০১৮ চনৰ ৬ ছেপ্টেম্বৰৰ পৰা গুৱাহাটী উচ্চ ন্যায়ালয়ৰ মুখ্য বিচাৰপতি হিচাপে কাৰ্য্যনিৰ্বাহ কৰি আছিল।
ন্যায়াধীশ গোস্বামীক অলপতে ছিকিম উচ্চ ন্যায়ালয়ৰ মুখ্য ন্যায়াধীশ হিচাপে নিযুক্তি দিয়া হৈছিল।