সকলো ঠিকে ঠাকে থাকিলে তেওঁ দেশৰ প্ৰথমগৰাকী মহিলা মুখ্য ন্যায়াধীশ হ’ব। সেই বি ভি নাগাৰত্নাৰ এটা মন্তব্যই আইনী মহলত আলোড়নৰ সৃষ্টি কৰিছে। উচ্চতম ন্যায়ালয়ৰ ভৱিষ্যত মুখ্য ন্যায়াধীশগৰাকীয়ে কয়, “বোৱাৰী নহালৈকে পুত্ৰ নিজৰ হৈ থাকে।কিন্তু আপোনাৰ ছোৱালীজনী সদায় আপোনাৰ ছোৱালী হৈয়েই থাকিব।”
বি ভি নাগাৰত্না কেৱল এগৰাকী ন্যায়াধীশ নহয়, এগৰাকী মহিলা উন্নয়ন কৰ্মীও। দেশৰ ভৱিষ্যত মুখ্য ন্যায়াধীশগৰাকীয়ে শনিবাৰে এক অনুষ্ঠানত মহিলা সবলীকৰণ সন্দৰ্ভত কেইবাটাও উল্লেখযোগ্য মন্তব্য আগবঢ়ায়।
তেওঁ কয়, বিবাহ নামৰ অনুষ্ঠানটোক জীয়াই ৰখাৰ প্ৰয়োজন। কিন্তু সেই অনুষ্ঠানত নাৰীৰ অস্তিত্বৰ সংকট হ’ব নালাগে। নাৰীসকল যাতে পুৰুষৰ অধীন হৈ থাকি নাযায়। মহিলাসকলো পৰিয়ালৰ সকলোৰে প্ৰতি যথাযথ সন্মানৰ যোগ্য। এজন সফল পুৰুষৰ আঁৰত কেৱল মহিলাই নহয় গোটেই পৰিয়ালটোৱে থাকক।
ন্যায়াধীশ নাগাৰত্নাই কয়, আজিও দেশৰ বহু অঞ্চলত নাৰী ঘৃণাৰ বলি হৈছে। আজিও মহিলাসকলক গৰ্ভৱতী হয় নে, শেষ মাহেকীয়া কেতিয়া হৈছিল সেই প্ৰশ্ন কৰা হয়। আজিও এগৰাকী মহিলাই যেতিয়া প্ৰসূতিকালীন ছুটীত গৈ উভতি আহে, দেখা পায় যে তেওঁৰ ঠাইত আন কোনোবা এজনে চাকৰি কৰি আছে। ব্যক্তিগত খণ্ডৰ এই বিভাজন দূৰ কৰাৰ সময় আহি পৰিছে। এই সকলোবোৰ ৰোধ কৰিবলৈ ন্যায়পালিকাৰ ভূমিকাও গুৰুত্বপূৰ্ণ বুলি ন্যায়াধীশগৰাকীয়ে ভাবে।
লগতে পঢ়কঃ অপ্ৰতিৰোধ্য ISRO! ভাৰতে ৰচনা কৰিলে ইতিহাস; চূড়ান্ত কক্ষপথত বহি আদিত্য এল ১ ৰ সূৰ্য নমস্কাৰ
২০২৭ চনত দেশৰ প্ৰথমগৰাকী মহিলা মুখ্য ন্যায়াধীশ হ’ব পাৰে ন্যায়াধীশ বি ভি নাগাৰাত্না। বৰ্তমান কৰ্ণাটক উচ্চ ন্যায়ালয়ৰ ন্যায়াধীশ হিচাপে কাৰ্যনিৰ্বাহ কৰি আছে বি ভি নাগাৰত্না। ২০০৮ চনত তেওঁ উচ্চ ন্যায়ালয়ৰ অতিৰিক্ত ন্যায়াধীশ হিচাপে নিযুক্তি লাভ কৰে। দুবছৰমান পিছত তেওঁ স্থায়ী ন্যায়াধীশ হয়। অৱশেষত যদি তেওঁ দেশৰ মুখ্য ন্যায়াধীশ হয় তেন্তে সেয়া নিঃসন্দেহে এক ঐতিহাসিক মুহূৰ্ত হ’ব। সেই ন্যায়াধীশৰ পুত্ৰসকলক লৈ কৰা মন্তব্যক কেন্দ্ৰ কৰি সম্প্ৰতি তুমুল চৰ্চা চলি আছে।