দেশৰ সৰ্বোচ্চ ন্যায়ালয়ৰ মুখ্য ন্যায়াধীশৰ পদত কাক নিযুক্তি দিয়া হ’ব তাক লৈ দেশজুৰি চৰ্চা চলি থকাৰ সময়তে ৰাষ্ট্ৰপতি ৰামনাথ কোবিন্দে উচ্চতম ন্যায়ালয়ৰ পৰৱৰ্তী মুখ্য ন্যায়াধীশ হিচাপে নিযুক্তি দিছে ন্যায়াধীশ এন ভি ৰমনক।
মুখ্য ন্যায়াধীশ এছ এ বুবদে-এ অৱসৰ লোৱাৰ পিছতে ন্যায়াধীশ ৰমনে মুখ্য ন্যায়াধীশৰ দায়িত্ব গ্ৰহণ কৰিব।
উল্লেখ্য যে অহা ২৩ এপ্ৰিলত মুখ্য ন্যায়াধীশ এছ এ বুবদে-এ অৱসৰ গ্ৰহণ কৰিব। ইয়াৰ পিছ দিনা অৰ্থাৎ ২৪ এপ্ৰিলত দেশৰ মুখ্য ন্যায়াধীশ হিচাপে শপত গ্ৰহণ কৰিব ন্যায়াধীশ ৰমনে।
১৯৫৭ চনৰ ২৭ আগষ্টত অন্ধপ্ৰদেশৰ এটা কৃষক পৰিয়ালত জন্মগ্ৰহণ কৰা এন ভি ন্যায়াধীশ ৰমনে এবছৰ চাৰি মাহৰ বাবে দেশৰ মুখ্য ন্যায়াধীশ হিচাপে কাৰ্যনিৰ্বাহ কৰিব। ন্যায়াধীশ ৰমনে ২০২২ চনৰ ২৬ আগষ্টত মুখ্য ন্যায়াধীশৰ পদৰ পৰা অৱসৰ গ্ৰহণ কৰিব।
চাৰি দশক ধৰি ন্যায়াধীশৰ অভিজ্ঞতালব্ধ ন্যায়াধীশ ৰমনে ২০০০ চনৰ ২৭ জুনত অন্ধপ্ৰদেশৰ উচ্চ ন্যায়ালয়ৰ ন্যায়াধীশ হিচাপে নিযুক্তি লাভ কৰিছিল আৰু ২০১৩ চনৰ ১০ মাৰ্চৰ পৰা ২০ মে’লৈ অন্ধ্ৰপ্ৰদেশৰ উচ্চ ন্যায়ালয়ৰ মুখ্য ন্যায়াধীশৰূপে কাৰ্যনিৰ্বাহ কৰিছিল।
ইয়াৰ পিছতে ২০১৩ চনতে তেওঁ দিল্লী উচ্চ ন্যায়ালয়ৰ মুখ্য ন্যায়াধীশ হিচাপে নিযুক্তি লাভ কৰে আৰু ২০১৪ চনত উচ্চতম ন্যায়ালয়ৰ ন্যায়াধীশ হিচাপে যোগদান কৰে।
স্মৰ্তব্য যে ৬৩ বছৰীয়া এন ভি ৰমন হৈছে অন্ধ্ৰপ্ৰদেশৰ পৰা নিযুক্তি লাভ কৰা দ্বিতীয়গৰাকী দেশৰ মুখ্য ন্যায়াধীশ। ইয়াৰ পূৰ্বে ১৯৬৬-৬৭ত অন্ধ্ৰপ্ৰদেশৰ ন্যায়াধীশ কে শুভ ৰাওৱে দেশৰ মুখ্য ন্যায়াধীশ হিচাপে কাৰ্যনিৰ্বাহ কৰিছিল।