প্ৰথম পৰ্যায়ৰ লোকসভা নিৰ্বাচনৰ দিন চমু চাপি অহাৰ লগে লগে প্ৰচাৰ অভিযান তীব্ৰতৰ হৈ উঠিছে কলিয়াবৰ লোকসভা সমষ্টিত। আজি চামগুৰি বিধান সভা সমষ্টিৰ বিভিন্ন স্থানত প্ৰচাৰ চলাই অগপ আৰু মিত্ৰজোঁটৰ প্ৰাৰ্থী মনিমাধৱ মহন্তই।
চামগুৰিৰ বকুলতল আৰু ভেলেউগুৰিৰ নিৰ্বাচনী সভাত অংশগ্ৰহণ কৰি মহন্তই কংগ্ৰেছ দলৰ প্ৰাৰ্থী গৌৰৱ গগৈক অদৃশ্য সাংসদ আখ্যা দিয়ে। কেবল নিৰ্বাচনৰ সময়তহে গৌৰৱ গগৈয়ে সমষ্টিলৈ আহে বুলি সমালোচনা কৰে অগপ প্ৰাৰ্থীগৰাকীয়ে।
আনহাতে, প্ৰাক্তন মুখ্য মন্ত্ৰী তৰুণ গগৈ সততে তেওঁৰ গাত লাচিতৰ তেজ আছে বুলি কৈ অহা কথাক কটাক্ষ কৰি মহন্তই তৰুণ গগৈৰ গাত আচলতে ভেজাল তেজহে আছে যাৰ বাবে এ আই য়ু ডি এফৰ হাতত জাতিটো বিক্ৰী কৰিব বিচাৰিছে বুলি কয়। ভাষণত মহন্তই ৮৫ বছৰ বয়সত গগৈৰ তীৰ্থ ভ্ৰমণ কৰাৰহে সময় কিন্তু ক্ষমতাৰ খকত ৰাজনীতিৰ লেকাম খামুচি আছে বুলিও মন্তব্য কৰে।
অগপ নেতা প্ৰমোদ বৰাই আঁতধৰা সভা দুখনত চামগুৰি জিলা পৰিষদৰ সদস্য ৰীতা কাকতি বৰা, ভেলউগুৰি গাঁও পঞ্চায়তৰ সভাপতি সভানেত্ৰী নিৰমাই দস, আঞ্চলিক সদস্য পিণ্টু ডেকা হাচেন আলীকে ধৰি ভালে সংখ্যক অগপ আৰু বিজেপিৰ নেতা উপস্থিত থাকে।
উল্লেখযোগ্য যে, সভাত আজি বাহাৰুল ইছলামৰ নেতৃত্বত বহুকেইজন কংগ্ৰেছ কৰ্মীয়ে বিজেপিত যোগদান কৰে। মনিমাধৱ মহন্তই আজি ৰঙাগড়া, কাৱৈমাৰি, ভাৰাগুৰি আদিকে ধৰি বহুকেইটা স্থানত প্ৰচাৰ চলাই।
