জম্মু-কাশ্মীৰ বিষয়ক সংবিধানৰ ৩৭০নং প্ৰবন্ধ “বাতিলকৰণ” প্ৰসংগত নিজ দলৰ চৰকাৰৰ পদক্ষেপত পৰম আনন্দ প্ৰকাশেৰে শুকুৰবাৰে এক সংবাদমেল সম্বোধন কৰে বিজেপি, অসমৰ সভাপতি ৰঞ্জিত দাসে।
সংবাদমেলত দাসে অসমৰ তিনি সাংসদ কুইন ওজা, তপন গগৈ আৰু দিলীপ শইকীয়াকো সংগী হিচাপে লয়।
দাসৰ মতে, (কাশ্মীৰত) সন্ত্ৰাসবাদ বৃদ্ধি হোৱাৰ “মূল কাৰণ আছিল ৩৭০ ধাৰা।”
এতিয়া এই প্ৰবন্ধ “বাতিল” হ’ল যেতিয়া, তেওঁৰ মতে, সম্পূৰ্ণৰূপে সন্ত্ৰাসবাদ নিৰ্মূল হ’ব।
ৰঞ্জিত দাসে কয়, “অসম প্ৰদেশৰ লাখ লাখ কাৰ্যকৰ্তাৰ হৈ অভিনন্দন। ভাৰতীয় জনতা পাৰ্টীৰ কোটি কোটি সদস্যৰ মন দুখেৰে ভৰি আছিল। সকলোৱে ৩৭০ অনুচ্ছেদ কাশ্মীৰৰ পৰা বাতিল হোৱাটো বিচাৰি আছিল। শ্যামা প্ৰসাদ মুখাৰ্জীয়ে এক দেশ এক নিচান হোৱাটো বিচাৰিছিল।”
তেওঁৰ মতে, কিছুমান ৰাজনৈতিক দলে মানুহক বিভ্ৰান্ত কৰিবলৈ চেষ্টা কৰি আছে। “কাশ্মীৰত গৈ অন্য প্ৰান্তৰ লোকেও এতিয়া ভাৰতীয় সন্তান হিচাপ গৌৰৱ কৰিব পাৰিব।”
সাধাৰণ ব্যৱসায়ী, জনতায়ো “লাদাখৰ এই সিদ্ধান্তৰ শুভেচ্ছা জনাইছে” বুলি উল্লেখ কৰি তেওঁ কয় যে “৩৭০ temporary আইন আছিল। গতিকে অসমৰ লোকো বিৰোধীৰ কথাত ভুল নাযাবলৈ আহ্বান জনাইছো।”
সংবাদমেলত উপস্থিত প্ৰথমবাৰৰ সাংসদকেইজনেও সংসদত তেওঁলোকৰ অভিজ্ঞতা আৰু “বাতিলকৰণ” বিষয়টো সন্দৰ্ভত তেওঁলোকৰ বক্তব্য দাঙি ধৰে।
দিলীপ শইকীয়া:
এই ঐতিহাসিক ৩৭০ ধাৰা বন্ধ কৰাৰ সিদ্ধান্তৰ সোৱাদ প্ৰথমবাৰ সাংসদ হৈয়ে পালো। এই আইন আছিল অতি বৈষম্যমূলক। বহু বছৰ ধৰি এই বিষয়টো চৰ্চিত হৈ আছিল। পাকিস্তানে তৃতীয় পক্ষৰ দ্বাৰা জম্মু-কাশ্মীৰত হস্তক্ষেপ চলোৱাৰ চেষ্টা কৰি আছিল। এতিয়া এই সুযোগ পাকিস্তানক দিয়া নহ’ব। দেশৰ অন্য প্ৰান্তৰ লোকে লাভ কৰা সকলো অধিকাৰ জম্মু-কাশ্মীৰৰ লোকে লাভ কৰিব।
প্ৰায় ৭ লাখ কাশ্মীৰী পণ্ডিতৰ মুখত হাঁহি বিৰিঙিছে। প্ৰধান মন্ত্ৰীয়ে এই ঐতিহাসিক সিদ্ধান্তৰ জৰিয়তে জম্মু-কাশ্মীৰৰ একাংশ লোকৰ দাবী পূৰণ হ’ল।
১৫৩খন আইনৰ পৰিপন্থী বিধেয়কক কাশ্মীৰ সংশোধনী আইন ২০১৯ এ ধৰাশায়ী কৰিছে।
জম্মু-কাশ্মীৰৰ ডেৰ কোটি জনসাধাৰণে ভাৰতৰ বাসিন্দা বুলি কোৱাৰ সুযোগ লাভ কৰিছে। জম্মু-কাশ্মীৰৰ বিষয়টোত কোনো তৃতীয় পক্ষৰ হস্তক্ষেপ নাথাকিব।
জম্মু কাশ্মীৰৰ ১২খন জিলাৰ ৰাইজে নিজৰ মনৰ পছন্দৰ প্ৰাৰ্থী নিৰ্বাচন কৰিব পাৰিব বিধানসভালৈ।
তৰুণ গগৈ, ৰাহুল গান্ধীকে ধৰি অন্য কংগ্ৰেছ নেতাৰ ওঁঠৰ ভাষা পাকিস্তানৰ লোকে কোৱা ভাষাৰ দৰে। গতিকে তেওঁলোকে নিজৰ ভাষা সলনি কৰিব লাগে।
তপন গগৈ:
এখন বৈষম্যমূলক আইন বাতিল কৰিবলৈ সক্ষম হ’ল। শ্যামা প্ৰসাদ মুখাৰ্জীৰ সপোন বাস্তৱত ৰূপায়ণ কৰিবলৈ সক্ষম হ’ল নৰেন্দ্ৰ মোদী। লাদাখৰ সাংসদে কোৱাৰ দৰে তাৰ লোকে ৭২টা বছৰে কেন্দ্ৰীয় শাসিত অঞ্চলৰ দাবী কৰি আহিছিল। সেই সপোন আজি পূৰণ হ’ল।
কুইন ওজা:
আমি নিজকে ধন্য মানিছো। ৩৩খন বিল গৃহীত হৈছে লোকসভাত। এই বিল পাছ কৰোঁতে অসমৰ পৰা আটাইবোৰ উপস্থিত থাকিবলৈ চেষ্টা কৰিছিলো। আমাৰ মহিলাসকলক কথা কোৱাৰ সুযোগ দিছিল।
