ৰাজ্যত ক’ভিড-১৯ ৰ সংক্ৰমণ আৰু চোৱাইন ফিভাৰৰ সংক্ৰমণৰ মাজতে কাজিৰঙাৰ বন্যপ্ৰাণী যাতে কোনো কাৰণতে কোনো ৰোগৰ দ্বাৰা সংক্ৰমিত নহয় তাৰ বাবে সদা সতৰ্ক কাজিৰঙা ৰাষ্ট্ৰীয় উদ্যান কৰ্তৃপক্ষ।
আজিৰ কথা নহয় বিগত সময়ছোৱাত কাজিৰঙাৰ কৰ্তৃপক্ষই কাজিৰঙা ৰাষ্ট্ৰীয় উদ্যানৰ কাষৰীয় পশুধনৰ কল্যাণ আৰু বন্য প্ৰাণীৰ সুৰক্ষাৰ বাবে জনসাধাৰণৰ পশুধনৰ ৰোগ প্ৰতিষেক প্ৰদানৰ কাম কৰি আহিছে।
বিগত বৰ্ষৰ দৰে এই বছৰো ১ মে’ৰ পৰা প্ৰতিষেধক প্ৰদানৰ কাৰ্য আৰম্ভ কৰিছে কাজিৰঙা ৰাষ্ট্ৰীয় উদ্যান কৰ্তৃপক্ষই। কাজিৰঙাত কৰ্মৰত বেচৰকাৰী সংগঠন আৰণ্যক, বিশ্ব প্ৰকৃতি নিধি, ৱাইল্ড লাইফ ট্ৰাষ্ট অব ইণ্ডিয়া, ভূমি আৰু কৰবেট ফাউণ্ডেশ্যনৰ সহযোগত আৰম্ভ কৰা পশুধনৰ প্ৰতিষেধক প্ৰদান অভিযান ইতিমধ্যেই ৰাষ্ট্ৰীয় উদ্যানখনৰ বোকাখাত বনাঞ্চলত সম্পূৰ্ণ হৈছে।
বোকাখাত বনাঞ্চলত কাষৰীয় গাঁৱৰ পশুধনৰ প্ৰতিষেধক প্ৰদান অভিযানেৰে ব্ৰহ্মপুত্ৰ নদীৰ ৫ টা চাপৰি আৰু ৩ খন গাঁৱৰ মুঠ ৩,৩৭৬ টা গৰু ম’হক প্ৰতিষেধক প্ৰদান কৰে।
বোকাখাত মহকুমা পশু চিকিৎসা বিভাগৰ বিশেষ সহযোগত বোকাখাত বনাঞ্চলৰ ভক্তে চাপৰিত ২৪২ টা, গাভৰু চাপৰিৰ ৭২৭ টা লালুং চাপৰিৰ ৭৪৪ টা, বিলতীয়া চাপৰিৰ ৩৬৬ টা, চহলা গাঁৱৰ ৪২১ টা, শিশুবাৰীৰ ৫২২ টা আৰু ধোবাআটি গাঁৱৰ ৩৫৪ টা গৰু-ম’হক প্ৰতিষেধক প্ৰদানৰ কাম সমাপ্ত কৰিছে উদ্যান কৰ্তৃপক্ষই।
নদীৰ চাপৰি বোৰত নিশা কটায় প্ৰতিষেধক প্ৰদানৰ কাম সম্পাদন কৰা দলটোত বোকাখাত মহকুমা পশু চিকিৎসা বিভাগৰ ডাঃ জানমনি শ্যাম, ডাঃ চৈয়দ মেহতাজ, ডাঃ বিশ্বজিত বৰুৱা, ডাঃ প্ৰণিতা কোঁৱৰ, ডাঃ দেৱব্ৰত ফুকন, ডাঃ অম্লান ফুকন আৰু দীপজ্যোতি হাঞ্চেৰ লগতে বিভাগটোৰ ক্ষেত্ৰ সহায়ক, গোপাল মিত্ৰ আৰু মৈত্ৰী সেৱক সকলে সহযোগ কৰে।
সমন্বয়ক হিচাপে দলটোৰ নেতৃত্ব দিয়ে গোলাঘাট জিলাৰ অনাৰেৰী ৱাইল্ড লাইফ ৱাৰ্ডেন তথা বোকাখাত প্ৰেছ ক্লাবৰ সম্পাদক উত্তম শইকীয়াই।
জনসাধাৰণৰ পশুধন কল্যানৰ বাবে সম্পূৰ্ণ বিনামূলীয়াকৈ কৰা এই প্ৰতিষেধক প্ৰদানৰ বাবে বিশ্ব প্ৰকৃতি নিধিৰ তৰফৰ পৰা ঔষধৰ যোগান ধৰা হয়।
ট্ৰায়’ ভেক নামৰ এই ঔষধে জহৰ বাত, গল ফুলা আৰু নামৰ ৰোগৰ পৰা পশুধনক প্ৰতিৰক্ষা দিব বুলি বিভাগীয় তথ্যত প্ৰকাশ।
উল্লেখ্য যে ২০১৭ চনৰ পৰা ধাৰাবাহিকভাৱে কাজিৰঙাৰ কাষৰীয় গাঁও আৰু চাপৰিবোৰত এই অভিযান চলাই আহিছে কাজিৰঙা ৰাষ্ট্ৰীয় উদ্যানৰ কৰ্তৃপক্ষই।
ইয়াৰ দ্বাৰা কাজিৰঙাৰ বন্যপ্ৰাণীৰ সুৰক্ষাই নহয় কাষৰীয় গাঁৱৰ জনসাধাৰণৰ পশুধনো সংক্ৰমিত ৰোগৰ পৰা সুৰক্ষিত হৈছে বুলি জনাইছে কাজিৰঙাৰ ডি এফ অ’ ৰমেশ কুমাৰ গগৈয়ে।
