অনলাইন গেম প্ৰচাৰ কৰাৰ বাবে ভাৰতীয় ক্ৰিকেট দলৰ অধিনায়ক বিৰাট কোহলী, দক্ষিণৰ অভিনেত্ৰী তামান্না ভাটিয়া আৰু মালায়ালম অভিনেতা অজু ভাৰ্গিজক কেৰালা উচ্চ ন্যায়ালয়ে জাননী প্ৰেৰণ কৰিছে।
অনলাইন ৰামি গেমৰ ব্ৰেণ্ড এম্বেছাডৰ হোৱা বাবে তেওঁলোক তিনিজনে এই জাননী লাভ কৰিছে।
এই ধৰণৰ অনলাইন গেম বন্ধ কৰিবলৈ অনুৰোধ জনোৱা এটা আবেদনৰ ভিত্তিত কেৰালা উচ্চ ন্যায়ালয়ে এই বিষয়টোত তিনিওজনকে জাননী প্ৰেৰণ কৰাৰ লগতে কেৰালা চৰকাৰকো উত্তৰ দিবলৈ কোৱা হৈছে।
বুধবাৰে এই বিষয়টো সন্দৰ্ভত কেৰালা উচ্চ ন্যায়ালয়ৰ বিশেষ বিচাৰপীঠৰ নেতৃত্বত মুখ্য ন্যায়াধীশ এছ মণিকুমাৰ আৰু ন্যায়াধীশ অনিল কে নৰেন্দ্ৰনে শুনানি গ্ৰহণ কৰিছিল।
উল্লেখ্য যে ত্ৰিশূৰৰ বাসিন্দা পিয়ুল ভডক্কন নামৰ এজন লোকে আদালতত অনলাইন ৰামি গেমৰ আইনী নিষেধাজ্ঞা বিচাৰি এই আবেদনখন দাখিল কৰিছিল।
আবেদনখনত কৈছিল যে সময় বাঢ়ি যোৱাৰ লগে লগে এইটো অধিক জনপ্ৰিয় হৈ পৰিছে। ইয়াত বহুতে জালিয়াতিৰ বাবে আহে আৰু খেলি থকা লোকে নিজৰ সঞ্চয় হেৰুৱাই আছে।
পিয়ুল ভডক্কনে তিৰুবনন্তপুৰমৰ এজন ইছৰো কৰ্মচাৰীৰ উদাহৰণ দি অনলাইন গেমত কেইবাটাও জালিয়াতি হোৱা বুলি অভিযোগ কৰিছিল। লোকজনে ২১ লাখ টকা ধাৰত পোত খাইছিল আৰু পিছত আত্মহত্যা কৰিবলৈ বাধ্য হয় বুলিও তেওঁ উল্লেখ কৰে।
ইয়াৰ উপৰি তেওঁ লগতে কয় যে অনলাইন ৰামি গেম কেৰালা গেমিং আইন ১৯৬০ৰ অধীনত নাহে।
