৫০ টা পৰিৱৰ্তনেৰে সংশোধন কৰা হ’ব দীৰ্ঘ প্ৰত্যাশিত শ্ৰম বিধেয়ক!
সংসদৰ ষ্টেণ্ডিং কমিটিয়ে ইতিমধ্যে শ্ৰমিক বিলখনৰ সন্দৰ্ভত ৫৬ টা সংশোধনীৰ পৰাৰ্মশ আগবঢ়াইছে।
জীৱিকাৰ নিৰাপত্তা, স্বাস্থ্য আৰু কৰ্মৰ নিশ্চিতিকৰণ কোড আদিকে কৰি প্ৰায় ৫০ টা সংশোধনী কৰা হ’ব ধাৰণা কৰা হৈছে।
বিলখন অধ্যয়নৰ পিছত ষ্টেণ্ডিং কমিটিৰ পেনেলে চৰকাৰক ৫৬ টা সংশোধনী পৰামৰ্শৰ অন্ততঃ ৫০ টা অন্তভুৰ্ক্ত কৰিব আশা প্ৰকাশ কৰিছে।
উল্লেখ্য যে, বিজু জনতা দলৰ নেতা ভাৰ্ট্ৰুহাৰী মেহতাব নেতৃত্বাধীন ষ্টেণ্ডিং কমিটিয়ে যোৱা ১১ ফেব্ৰুৱাৰীত বিলখনৰ প্ৰতিবেদন দাখিল কৰিছিল।
নাম প্ৰকাশত অনিচ্ছুক এক সূত্ৰৰ মতে বিলখনৰ সংশোধনীত অ’ এছ এইছ কোডকে আদি কৰি বিলখনত বিভিন্ন সংশোধনী তথা পৰিৱৰ্তন আহিব।
দক্ষ আৰু অদক্ষ শ্ৰমিকৰ মজুৰি সম্পৰ্কীয়, মহিলা শ্ৰমিকৰ খাদ্যৰ যোগান নিশ্চিতকৰণ আদিয়ো পৰিৱৰ্তন কৰা হ’ব বুলি ধাৰণা কৰা হৈছে।
শ্ৰমিক আৰু কৰ্মচাৰীৰ মাজত থকা বৃত্তিগত ব্যৱধান এই বিলে হ্ৰাস কৰিব বুলি আশা কৰা হৈছে।
বিভিন্ন প্ৰতিষ্ঠানত কৰ্মচাৰীৰ বাবে কেন্টিন, জিৰণী চ’ৰা ব্যৱস্থা থকাৰ দৰে শ্ৰমিকসকলৰ বাবে ৰাজহুৱা আৰু ব্যক্তিখণ্ডৰ লঘু, মধ্যম আৰু গুৰু আদি সকলো কাৰখানা তথা উদ্যোগতে এইসমূহ প্ৰদান কৰাৰ ব্যৱস্থা কৰা হ’ব বুলি সূত্ৰত প্ৰকাশ।
ষ্টেণ্ডিং কমিটিখনে শ্ৰমিকৰ কৰ্তব্যৰ সময় ৮ ঘণ্টা নিশ্চিত কৰাৰ বাবেও পৰামৰ্শ আগবঢ়াইছে। বিশেষকৈ ছফ্টবেৱৰ কোম্পানীসমূহৰ শ্ৰমিক আৰু কৰ্মচাৰীক দৈনিক ৮ ঘন্টাতকৈ অধিক সময় ডিউটী কৰিবলৈ বাধ্য কৰা দেখা যায়।
শ্ৰমিকৰ স্বাস্থ্য, ছুটি, অ’ভাৰ টাইম, বন্ধদিন আদিৰ ক্ষেত্ৰত ব্যাপক সংশোধনী আনি শ্ৰমিকৰ কল্যাণৰ বাবে বিলখনত ব্যৱস্থা কৰা হৈছে বুলি নিৰ্ভৰযোগ্য সূত্ৰত প্ৰকাশ পাইছে।
অৱেশ্যে শ্ৰমিক কল্যাণৰ বাবে বিলখনত যথেষ্ট উপবন্ধ থাকিব যদিও সেইসমূহ কাৰ্যকৰী কৰিলেহে সেয়া সঁচা অৰ্থত শ্ৰমিকসকল উপকৃত হ’ব পাৰিব।
