খালিস্তানী উগ্ৰপন্থীয়ে পুনৰ এয়াৰ ইণ্ডিয়াৰ বিমানত কূটাঘাত চলোৱাৰ ষড়যন্ত্ৰ কৰিছে। ১ নৱেম্বৰৰ পৰা ১৯ নৱেম্বৰৰ ভিতৰত এয়াৰ ইণ্ডিয়াৰ বিমানত আক্ৰমণ চলোৱা হ’ব পাৰে। যাৰ বাবে খালিস্তানী উগ্ৰপন্থী সংগঠনৰ মুৰব্বী গুৰপতৱন্ত সিং পান্নুনে যাত্ৰীসকলক আগতীয়াকৈ সকীয়াই দিছে।
খালিস্তানী সংগঠন শিখছ ফৰ জাষ্টিছৰ নেতা পান্নুনে সোমবাৰে সকীয়াই দিয়ে যে, ‘১ নৱেম্বৰৰ পৰা ১৯ নৱেম্বৰলৈ এয়াৰ ইণ্ডিয়াৰ বিমানত যাত্ৰা নকৰিব। এই সময়ত এয়াৰ ইণ্ডিয়াৰ বিমানত আক্ৰমণ হ’ব পাৰে।‘ উক্ত সময়ছোৱাত শিখ গণহত্যাৰ ৪০তম বৰ্ষপূৰ্তি চলিব।
শেহতীয়াকৈ ভাৰতৰ কেইবাখনো বিমান সংস্থাৰ বিমানত বোমা বিস্ফোৰণৰ ভাবুকি দিয়া হৈছে। বিগত সপ্তাহত ৭০টা আৰু কেৱল শনিবাৰে ৩২টা বোমা বিস্ফোৰণৰ ভাবুকি দিয়া হৈছে। যাৰ ফলত যাত্ৰীসকলৰ মাজত আতংক বিয়পি পৰিছে।
এনে পৰিস্থিতিত খালিস্তানী উগ্ৰপন্থী সংগঠনটোৱে এয়াৰ ইণ্ডিয়াৰ বিমানত বৃহৎ কূটাঘাত সংঘটিত কৰাৰ ভাবুকি দিছে। যাক কেন্দ্ৰ কৰি আকৌ চাঞ্চল্য বিয়পি পৰিছে।
উল্লেখ্য যে ২০২০ চনত ইউএপিএ আইনৰ অধীনত পান্নুনক সন্ত্ৰাসবাদী ঘোষণা কৰা হৈছিল। শিখছ ফৰ জাষ্টিছ সংগঠনৰ ওপৰতোত নিষেধাজ্ঞা আৰোপ কৰা হৈছিল। ভাৰতত গ্ৰেপ্তাৰ হোৱাৰ আশংকাত তেওঁ আমেৰিকালৈ পলাই যায়। বৰ্তমান তেওঁৰ আমেৰিকা আৰু কানাডাৰ নাগৰিকত্ব আছে।
লগতে পঢ়কঃ সাপৰ বিষৰ বিৱৰ্তন, মোকাবিলাৰ বাবে নতুন আশাৰ সঞ্চাৰ কৰিছে ভাৰতীয় বিজ্ঞানীয়ে
বিগত বৰ্ষৰ নৱেম্বৰ মাহত তেওঁ দিল্লীৰ ইন্দিৰা গান্ধী আন্তঃৰাষ্ট্ৰীয় বিমানবন্দৰৰ নাম সলনি নকৰিবলৈ সকীয়াই দিছিল। আনকি সেইদিনা এয়াৰ ইণ্ডিয়াৰ বিমানত উঠাৰ পূৰ্বেও উগ্ৰপন্থী সংগঠনটোৱে যাত্ৰীসকলক সকীয়াই দিছিল। পান্নুনে কেতিয়াবা সংসদত আক্ৰমণৰ, কেতিয়াবা পঞ্জাৱৰ মুখ্যমন্ত্ৰী ভগৱন্ত মানক হত্যাৰ ভাবুকিও দিছে।
