আজি আবু ধাবিত অনুষ্ঠিত আই পি এলৰ এখন অন্যতম গুৰুত্বপূৰ্ণ মেচত চেন্নাই ছুপাৰ কিংছ দলে কিংছ ইলেভেন পঞ্জাৱ দলক ৯ উইকেটত পৰাস্ত কৰে।
এই পৰাজয়ৰ লগে লগে প্ৰতিযোগিতাৰ প্লে অফৰ দৌৰৰ পৰা বাহিৰ হ’ল কিংছ ইলেভেন পঞ্জাৱ।
পঞ্জাৱে প্ৰথমে বেট ধৰি ৬ উইকেটৰ বিনিময়ত ১৫৩ ৰান সংগ্ৰহ কৰি চেন্নাইক জয়ৰ বাবে ১৫৪ ৰানৰ লক্ষ্য বান্ধি দিছিল।
পঞ্জাৱৰ হৈ দীপক হুডাই ৩০টা বলত ৬২ ৰানৰ আক্ৰমণাত্মক ইনিংছ খেলে।
আনহাতে চেন্নাই দলে ১৮.৫ অভাৰত নিৰ্ধাৰিত লক্ষ্যত উপনীত হৈ নিজৰ অন্তিমখন মেচ জয়ী হৈ চলিত আই পি এলৰ পৰা অভিযান সামৰে।
চেন্নাইৰ এই জয়ৰ আঁৰৰ নায়ক হৈছে যুৱ প্ৰতিভাৱান বেটছমেন ঋতুৰাজ গায়কোৱাড়। গায়কোৱাড়ে অপৰাজিতভাৱে ৬২ ৰানৰ ইনিংছ খেলি দলৰ বিজয়ত মুখ্য ভূমিকা পালন কৰে।
গায়কোৱাড়ৰ উপৰি ফাফ ডু প্লেছিছে ৪৮ আৰু অম্বাতি ৰায়ডুৱে ৩০ ৰানৰ বৰঙণি আগবঢ়ায়।
কিংছ ইলেভেন পঞ্জাৱৰ টুৰ্ণামেণ্টত এয়া অষ্টম পৰাজয়। পঞ্জাৱে ১৪খন মেচৰ পৰা ১২ পইণ্ট সংগ্ৰহ কৰে।
উল্লেখ্য যে চেন্নাই ছুপাৰ কিংছ দলৰ পিছত টুৰ্ণামেণ্টৰ পৰা বাহিৰ হোৱা কিংছ ইলেভেন পঞ্জাৱ হ’ল দ্বিতীয়টো দল।
