বৃহৎ নদীবান্ধ বন্ধ কৰা, নীপকোৰ বানপানীত ক্ষতিগ্ৰস্ত কৃষকক ক্ষতিপুৰণ দিয়া, ক্ষতিগ্ৰস্ত কৃষকৰ কৃষি ঋণ ৰেহাই দিয়া, দৈয়াং জলবিদ্যুৎ প্ৰকল্পৰ দোষী বিষয়াক গ্ৰেপ্তাৰ কৰা আদি বিভিন্ন দাবীত আজি বোকাখাতত কৃষক মুক্তি সংগ্ৰাম সমিতিয়ে তীব্ৰ প্ৰতিবাদ সাব্যস্ত কৰে।
বোকাখাতৰ ৰাজপথেৰে প্ৰতিবাদকাৰী সকলে সমদল বাহিৰ কৰি বোকাখাতৰ মহকুমাধিপতিৰ কাৰ্যালয়ত উপস্থিত হৈ তেওঁলোকৰ দাবীসমূহৰ সমৰ্থন বিভিন্ন শ্লোগান দি পৰিৱেশ উত্তাল কৰি তোলে।
কৃষক মুক্তিৰ ভাতৃ সংগঠন গণ মুক্তি সংগ্ৰাম সমিতিৰ আহ্বায়ক বেদান্ত লস্কৰে কেৰেলাত হোৱা বানপানীৰ পিছত কেন্দ্ৰীয় চৰকাৰে ৫০০ কোটি টকা তৎকালেই ঘোষণা কৰিলে বুলি মন্তব্য কৰি বছৰ বছৰ ধৰি অসমত হৈ থকা বানপানীৰ বাবে কেন্দ্ৰ চৰকাৰে সাহাৰ্যৰ নামত আজিও কিয় এটকাও ঘোষণা নকৰিলে বুলি প্ৰশ্ন উত্থাপন কৰে ৷
তদুপৰি অসমৰ জলবিদ্যুৎ প্ৰকল্প সমূহে প্ৰতি বছৰেই অসমৰ ৰাইজক বেয়াকৈ ক্ষতিগ্ৰস্ত কৰি আহিছে বুলি অভিযোগ কৰি তেওঁ ক্ষতিগ্ৰস্ত ৰাইজক নিৰাপত্তা আৰু উচিত ক্ষতিপূৰণৰো দাবী তোলে।
আনহাতে কৃষক মুক্তিৰ গোলাঘাট জিলা সমিতিৰ সম্পাদক ৰতন দাৱে গ্ৰেটাৰ কাজিৰঙা পানীযোগান আঁচনিৰ জৰিয়তে ৰাইজক বিশুদ্ধ খোৱাপানী যোগান ধৰা, কহঁৰা ৰাজ্যিক চিকিৎসালয় শীঘ্ৰে মুকলি কৰা, ধনশিৰি নদীৰ গৰাখহনীয়া প্ৰতিৰোধ কৰা, বিদ্যুত নথকা গাঁৱত বিদ্যুৎ যোগান, বানপীড়িত অঞ্চলত পানপানীৰ সময়ত বিদ্যুতৰ মিটাৰ বিনামুলীয়াকৈ যোগান ধৰা, সুলভ মূল্যৰ চাউলৰ কেলেংকাৰীত জড়িত মহুৰা সমবায় সমিতিৰ সভাপতিক গ্ৰেপ্তাৰ কৰা আদি বিভিন্ন দাবীত মহকুমাধিপতিলৈ দণ্ডাধীশৰ জৰিয়তে এখন স্মাৰক পত্ৰ প্ৰেৰণ কৰে ৷
আজিৰ উক্ত প্ৰতিবাদী সমদলত কৃষক মুক্তি সংগ্ৰাম সমিতি, নাৰী মুক্তি সংগ্ৰাম সমিতি আৰু ছাত্ৰ মুক্তি সংগ্ৰাম সমিতিৰ প্ৰায় তিনি শতাধিক কৰ্মীয়ে অংশগ্ৰহণ কৰে।
