কৃষক মুক্তিয়ে শুভেচ্ছা দিলে যদিও নতুন ৰাজনৈতিক দল গঠনত সুখী নহয় সংগঠনটো।
বিপৰীতে “আঞ্চলিক শক্তি ঐক্যবদ্ধ নোহোৱাতো ঐতিহাসিক ভুল” বুলিহে উল্লেখ কৰিলে কৃষক মুক্তিয়ে।
আনহাতে, সংগঠনটোৱে ২০ছেপ্টেম্বৰলৈ অপেক্ষা কৰিব যদিও তাৰ পাছত নতুন ৰাজনৈতিক দল গঠনৰ প্ৰস্তুতি চলাব বুলি জানিব দিয়ে।
অসম জাতীয় পৰিষদ নামৰে নতুন আঞ্চলিক ৰাজনৈতিক দল গঠনৰ পাছতে সংবাদমেলত কৃষক মুক্তি সংগ্ৰাম সমিতিৰ সভাপতি ভাস্ক”ডি শইকীয়াই এইদৰে প্ৰতিক্ৰিয়া প্ৰকাশ কৰিছে।
সংবাদমেলত তেওঁ কয়, “আমাৰ নতুন দললৈ শুভেচ্ছা আছে যদিও কৃষক মুক্তি সংগ্ৰাম সমিতি সুখী নহয়।”
শইকীয়াৰ মতে “আঞ্চলিক শক্তি ঐক্য বদ্ধ নোহোৱাতো ঐতিহাসিক ভূল ।”
ইপিনে, অহা ২০তাৰিখলৈ আহ্বায়ক সমিতি, আছু, AJYCP লৈ অপেক্ষা কৰিব বুলি উল্লেখ কৰি তেওঁ লগতে কয় “তাৰ পাছত সঁহাৰি নাপালে কৃষক মুক্তি, অসমৰ সকলো জাতীয় সংগঠন, জনগোষ্ঠীয়-জনজাতীয় সংগঠন, কা-বিৰোধী ছাত্র সমাজ, শিল্পী সমাজ, বুদ্ধিজীৱি সমাজৰ সৈতে আলোচনাত মিলিত হ’ম। সঁহাৰি নাপালে আমি সকলো মিলি নতুন দল প্ৰস্তুত কৰিবলৈ বাধ্য হ’ম।”
আনহাতে, পৃথক পৃথক দল খোলাত বিজেপি-আৰ এছ এছ সুখী হ’ব বুলি শইকীয়াই দাবী কৰে।
আমাৰ উদাৰতাক দুৰ্বলতা বুলি নাভাবিব বুলি উল্লেখ কৰি শইকীয়াই কয়,‘’আছু, এজেৱাইচিপি আমি একলগ হোৱাৰ আহ্বান জনাইছিলো যদিও মতাদৰ্শৰ প্ৰশ্নৰে মূল বিষয়ৰ পৰা তেওঁলোকে ফালৰি কাটি থাকিল।”