কেন্দ্ৰীয় চৰকাৰে সমগ্ৰ দেশতে ৰূপায়ণ কৰা কৃষক বিৰোধী আইন শীঘ্ৰে বাতিলৰ দাবীৰে বুধবাৰে মৰিগাঁও চহৰ উত্তাল প্ৰতিবাদ সাৱ্যস্ত কৰে জিলা কৃষক মুক্তি সংগ্ৰাম সমিতি আৰু ছাত্ৰ মুক্তিৰ সদস্যসকলে।
মৰিগাঁও বিহুতলি প্ৰাংগনত অনুষ্ঠিত হোৱা প্ৰতিবাদী কাৰ্যসূচীত সংগঠন কেইটাই বিজেপি নেতৃত্বাধীন উভয় চৰকাৰখনক কঠোৰ ভাষাৰে সমালোচনাৰে থকা-সৰকা কৰি দিল্লীৰ প্ৰতিবাদী কৃষকৰ দাবী মানি লওক, কৃষকৰ ব্যাপক ক্ষতিসাধন কৰা কৃষক তথা কৃষি বিৰোধী আইন বৰ্জন কৰক,EIA বাতিল কৰক আদি শ্ল’গানেৰে উত্তপ্ত কৰি তোলে মৰিগাঁও চহৰৰ সামগ্ৰিক পৰিবেশ।
প্ৰতিবাদস্থলীৰ পৰাই সংগ্ৰামী সদস্য সকলে কেন্দ্ৰীয় আৰু ৰাজ্যিক ফেচিষ্ট চৰকাৰখনক সকীয়াই দি কয় যে বনিয়া গোষ্ঠীক সকাহ দিয়া কাৰ্য-কলাপসমূহ বন্ধ কৰি যদি চৰকাৰে তৎকালে কৃষক বিৰোধী আইন আৰু কৃষকসকলৰ জলন্ত সমস্যাসমূহ সমাধান ন’কৰে তেতিয়া হ’লে আগন্তুক সময়ত দিল্লী,পাঞ্জাৱৰ দৰে অসমতো শদিয়াৰ পৰা ধুবুৰীলৈ ৰাইজৰ সহযোগত ব্যাপক গণ আন্দোলন গঢ়ি তোলা হ’ব।
প্ৰতিবাদী কাৰ্যসূচীত অংশ গ্ৰহণ কৰে জিলা কৃষক মুক্তি সংগ্ৰাম সমিতিৰ সম্পাদক দেৱজিৎ পাটৰ,সদৌ অসম কৃষক সংঘৰ কাৰ্যকৰী সভাপতি তুলসী ডেকা, কে এম এছ এছৰ প্ৰাক্তন সভাপতি ৰাতুল হাজৰিকাকে ধৰি ছাত্ৰ মুক্তি সংগ্ৰাম সমিতিৰ প্ৰায় সহস্ৰাধিক সদস্যই উক্ত কাৰ্যসূচীত অংশগ্ৰহণ কৰে।