অভিযোগ অনুসৰি ৰাজ্যত শেহতীয়াকৈ বিদ্যালয় একত্ৰীকৰণৰ ফলত ২৫০০ খন বিদ্যালয় বন্ধ কৰি দিয়াৰ যো-জা চলাইছে ৰাজ্য চৰকাৰে। তাৰ ভিতৰত ৩০০ খন হাইস্কুলো অন্তৰ্ভুক্ত হৈ আছে।
ৰাজ্যৰ শিক্ষা ব্যৱস্থাক সম্পূৰ্ণৰূপে তচনচ কৰি কেৱল বেচৰকাৰী প্ৰতিষ্ঠানবোৰক সুবিধা দিয়াৰ বাবে হিমন্ত বিশ্ব চৰকাৰে এখনৰ পাছত আনখন বিদ্যালয় বন্ধ কৰা বুলি কৃষক মুক্তি সংগ্রাম সমিতি আৰু ছাত্র মুক্তি সংগ্ৰাম সমিতিৰ বিষয়ববীয়াই অভিযোগ উত্থাপন কৰে।
লগতে পঢ়ক: অসমৰ বিদ্যালয় বন্ধ কৰাক লৈ দিল্লীৰ মুখ্যমন্ত্ৰী অৰবিন্দ কেজৰিৱালৰ টুইট
সংগঠন দুটাৰ নেতৃত্বৰ মতে “যিখন ৰাজ্যত মুখ্যমন্ত্ৰীয়ে চৰকাৰী স্কুলৰ আন্তঃগাঁথনি বিশ্বমানৰ কৰি গঢ়ি তোলাৰ পৰিৱৰ্তে নিজৰ ব্যক্তিগত বিদ্যালয় খোলাৰ সপোন দেখে সেই অসম ৰাজ্যৰ শিক্ষা ব্যৱস্থা এতিয়া খোদ মুখ্যমন্ত্ৰীৰ নেতৃত্বতে শ্মশান যাত্ৰা আৰম্ভ হৈছে”।
“বিশ্ববিদ্যালয় পৰিচালনাৰ বাবে পুঁজিৰ অভাৱত ডিব্ৰুগড় বিশ্ববিদ্যালয় কর্তৃপক্ষই ছাত্ৰ-ছাত্ৰীৰ মাচুল বৃদ্ধি কৰাৰ দৰে পদক্ষেপ ল’ব লগা হৈছে”। সংগঠন দুটাৰ নেতৃত্বই লগতে কয়।
হিমন্ত বিশ্ব শৰ্মাই সম্পূৰ্ণৰূপে এখন দেউলীয়া চৰকাৰ চলাই থকাৰ অভিযোগ উত্থাপন কৰি সংগঠন দুটাৰ শীৰ্ষ নেতৃত্বই ছাত্ৰ-ছাত্ৰীৰ ভোটাধিকাৰ নাই বাবে উপযুক্ত শিক্ষাৰ পৰা বঞ্চিত কৰিব বিচাৰিছে বুলি উল্লেখ কৰে।
লগতে পঢ়ক: বিধায়ক ভাঙিবলৈ ৮০০ কোটি টকা খৰচ কৰিব বিচাৰিছে বিজেপিয়ে: কেজৰিৱালৰ বিস্ফোৰণ
ভোটৰ স্বাৰ্থত অৰুণোদয় আঁচনিৰ বাবে মুখ্যমন্ত্রীয়ে ভিডিঅ’ বিজ্ঞাপন দিব পাৰে, চৰকাৰী বিদ্যালয়ত ছাত্ৰ-ছাত্ৰীক পঢ়োৱাব লাগে বুলি ভিডিঅ’ বিজ্ঞাপন কিয় নিদিয়ে?” সংগঠন দুটাৰ নেতৃত্বৰ প্ৰশ্ন।
তেওঁলোকে লগতে কয়, “যিসময়ত ২০২১ চনৰ ফেব্ৰুৱাৰী মাহত নতুনকৈ বিটিআৰ চুক্তি কৰি বিটিচি অধ্যুষিত অঞ্চলৰ ৰাইজৰ সৰ্বাংগীন উন্নতিৰ বাবে নৰেন্দ্ৰ মোডী, অমিত শ্বাহ, সর্বানন্দ সোণোৱাল, হিমন্তবিশ্ব শৰ্মাই আমোল পৰিৱৰ্তনৰ দাবী কৰিছিল, আজি সেই বিটিআৰ অঞ্চলৰ চিৰাং জিলাৰ বিজনীৰ এখন হাইস্কুল বন্ধ কৰাৰ পদক্ষেপ লৈছে ৰাজ্য চৰকাখনে। এয়া কেৱল বিটিআৰ আঞ্চলৰ ৰাইজকে নহয়, সমগ্ৰ অসমবাসীক কৰা প্ৰতাৰণা।”
লগতে পঢ়ক: কোচবিহাৰ কেন্দ্ৰীয় শাসিত ৰাজ্যত বিটিআৰ অঞ্চল; অনন্ত ৰায় মহাৰাজৰ মন্তব্যক লৈ তুমুল প্ৰতিক্ৰিয়া
এই ক্ষেত্ৰত বিটিআৰৰ প্ৰধান প্রমোদ বড়ো বার্থ হোৱা বুলি সংগঠন দুটাই উল্লেখ কৰে।
অতিশীঘ্ৰে বিদ্যালয় বন্ধ কৰাৰ সিদ্ধান্ত বাতিল কৰি বিদ্যালয়সমূহৰ উপযুক্ত আন্তঃগাঁথনি আৰু শিক্ষক নিযুক্তি দিয়াৰ বাবে সংগঠন দুটাৰ নেতৃত্বই দাবী উত্থাপন কৰে।
