হৃদপিণ্ডৰ যেতিয়া কোনো শিৰাত তেজ গোট বান্ধি হৃদপিণ্ডৰ ৰক্ত সঞ্চালনত বাধাৰ সৃষ্টি কৰে তেতিয়াই হাৰ্ট এটেক হয়।
বয়স, উচ্চ ৰক্তচাপৰ সমস্যা, উচ্চ কলেষ্টৰেল, অতিৰিক্ত চৰ্বি, অস্বাস্থ্যকৰ খাদ্যাভাস, মদ্যপান, মানসিক চাপ আদি হৈছে প্ৰধানকৈ হাৰ্ট এটেকৰ কাৰণ।
বহু সময়ত হাৰ্ট এটেক হ’লেও সঠিকভাৱে বুজা নাযায়। কেতিয়াবা বুকুত কোনো বিষ অনুভৱ নকৰাকৈয়ো হাৰ্ট এটেক হ’ব পাৰে। ইয়াৰ ফলত হাৰ্ট এটেক হৈছে নে নাই সেইটো ভালকৈ ধৰিব নোৱাৰি।
সেয়েহে হাৰ্ট এটেকৰ সক্ষণসমূহ জানি লোৱা ভালঃ
(ক) হৃদৰোগ বিশেষজ্ঞৰ মতে হাৰ্ট এটেকৰ প্ৰায় এমাহ পূৰ্বৰ পৰাই দুৰ্বলতা আৰু সঘন শ্বাস প্ৰশ্বাসৰ সমস্যা আৰম্ভ হয়।
কোনো কাৰণ নোহোৱাকৈ শাৰীৰিক দুৰ্বলতা আৰু খুব সহজেই ভাগৰি পৰি ঘনে ঘনে শ্বাস-প্ৰস্বাস ল’বলগীয়া সমস্যাৰ উদ্ভৱ হ’লে সতৰ্ক হোৱাৰ প্ৰয়োজন।
এনেধৰণৰ সমস্যা হ’লে বুজিব লাগিব যে হৃদপিণ্ডৰ জিৰণিৰ প্ৰয়োজন।
(খ) হঠাতে ঘামি যোৱাৰ সমস্যাৰ সৃষ্টি হ’লে সেয়া অৱহেলা কৰা উচিত নহয়। কিয়নো এইটোও হাৰ্ট এটেকৰ এটা লক্ষণ।
যেতিয়া হাৰ্ট ব্লক হয় তেতিয়া ৰক্ত সৰৱৰাহত হৃদপিণ্ডই অধিক বেছি কাম কৰিবলগীয়া হয়। এনে অতিৰিক্ত পৰিশ্ৰমৰ ফলত ঘামৰ সৃষ্টি হয় আৰু এই ঘাম সাধাৰণতে ঠাণ্ডা হয়।
এনে সমস্যাৰ উদ্ভৱ হ’লে ততাতয়াকৈ চিকিৎসকৰ পৰামৰ্শ গ্ৰহণ কৰা উচিত।
(গ) গৱেষণাৰ পৰা দেখা গৈছে যে হাৰ্ট এটেকৰ পূৰ্বৰে পৰা বেছিভাগ আক্ৰান্তৰে বদহজম আৰু গেষ্ট্ৰ’ইনটেষ্টিনেলৰ সমস্যা দেখা দিয়ে। আনহাতে, বুকু জ্বলা যাক আমি সাধাৰণতে বদহজমৰ সমস্যা বুলি ভাৱি অৱহেলা কৰো সেয়াও হাৰ্ট এটেকৰ পূৰ্বাভাস হ’ব পাৰে।
তদুপৰি, ইয়াৰ লগতে হঠাতে কোনো কাৰণ নোহোৱাকৈ মূৰ ঘৰোৱা, বমি বমি লগা ভাৱ আৰু বমি কৰাৰ বিষয়বোৰ অৱহেলা নকৰিব।
(ঘ) বহু সময়ত হাৰ্ট এটেকৰ সময়ত বুকুত বেদনা অনুভৱ নহয়। এনে ক্ষেত্ৰত বুকুত অস্বস্তিকৰ অনুভুতি আৰু বুকুত হেচা মাৰি ধৰা গধূৰ ভাৱ অনুভৱ কৰা বিষয়টো গুৰুত্ব দিয়া উচিত।
এনেকুৱা সময় শ্বাস লওতেও সমস্যা হ’ব পাৰে। এই সকলো বিষয় চকুত ধৰা পৰিলেই চিকিৎসকৰ ওচৰলৈ যোৱা উচিত।
( ঙ) কেবল বুকুৰ বিষেই নহয়, শৰীৰৰ আন কিছুমান অংগত বিষ অনুভৱ কৰিলেও সেয়া হাৰ্ট এটেকৰ লক্ষণ হ’ব পাৰে।
পেটৰ ওপৰৰ অংশ, কান্ধ, পিঠি,ডিঙি, দাঁত আৰু বাও বাহুত হঠাৎ অতিৰিক্ত বিষ বা চাপ অনুভৱ কৰিলে সেয়াও হাৰ্ট এটেকৰ লক্ষণ হ’ব পাৰে।
এইবোৰ সমস্যাৰ উদ্ভৱ হ’লে ইয়াক অৱহেলা নকৰি শীঘ্ৰেই চিকিৎসকৰ ওচৰলৈ গৈ পৰামৰ্শ কৰি চিকিৎসা গ্ৰহণ কৰা উচিত।
