বাৰিষাৰ শেষত বিশ্বৰ পৰ্যটকৰ বাবে আজি পুৱা মুকলি হ’ল বিশ্বৰ ঐতিহ্য ক্ষেত্ৰ কাজিৰঙা ৰাষ্ট্ৰীয়৷ অসম চৰকাৰৰ বন মন্ত্ৰী পৰিমল শুক্লবৈদ্য, কৃষি মন্ত্ৰী অতুল বৰা আৰু জল সম্পদ বিভাগৰ মন্ত্ৰী কেশৱ মহন্ত, পৰ্যটন উন্নয়ন নিগমৰ সভাপতি জয়ন্তমল্ল বৰুৱা আৰু ধেমাজিৰ বিধায়ক ডা৹ ৰনোজ পেগুৰ উপস্থিতিত বনমন্ত্ৰীয়ে ফিটা কাটি আজিপুৱা কাজিৰঙাৰ মিহিমুখত আনুষ্ঠানিক ভাৱে পৰ্যটকৰ বাবে কাজিৰঙা মুকলি কৰে ৷
এই উপলক্ষে মিহিমুখৰ প্ৰৱেশদ্বাৰত আয়োজিত উদ্বোধনী অনুষ্ঠানত স্থানীয় লোক, ছাত্ৰ-ছাত্ৰীৰ উপৰিও বন বিভাগৰ উচ্চ পদস্থ বিষয়াসকলো উপস্থিত থাকে৷ বোকাখাতৰ পুৱতি সাহিত্য সভাৰ দ্বাৰা পৰিবেশিত এটা সমবেত সংগীতেৰে আৰম্ভ হোৱা অনুষ্ঠানত বিশ্বনাথ বন্যপ্ৰাণী সংমণ্ডলত বনৰীয়া হাতীৰ আক্ৰমণত নিহত গনেশ নেৱাৰৰ পৰিয়ালক ৱাইল্ড লাইফ ট্ৰাষ্ট অৱ ইণ্ডিয়াৰ তৰফৰ পৰা এক লাখ টকাৰ এককালীন সাহাৰ্য প্ৰদান কৰে৷ মিহিমুখৰ পাচতেই বনমন্ত্ৰী পৰিমল শুক্লবৈদ্য আৰু জলসম্পদ মন্ত্ৰী কেশৱ মহন্তই কাজিৰঙাৰ বাগৰি বনাঞ্চলো আনুষ্ঠানিক ভাৱে পৰ্যটকৰ বাবে মুকলি কৰে৷
বিশ্বৰ পৰ্যটকৰ বাবে কাজিৰঙা মুকলি কৰাৰ পাচত দিয়া ভাষণত বনমন্ত্ৰীগৰাকীয়ে কাজিৰঙাত গঁড় হত্যা ৰোধ কৰাত সৰ্বানন্দ সোণোৱালৰ চৰকাৰ সফল হোৱা বুলি মন্তব্য কৰে৷ মন কৰিবলগীয়া যে আজি কেৱল জীপছিৰে আংশিক ভাৱেহে উদ্যান দৰ্শনৰ সুবিধা প্ৰদান কৰে বন বিভাগে৷ বাৰিষাৰ পাচত উদ্যানখনৰ বাট-পথ এতিয়াও মেৰামতি কৰিব পৰা নাই বাবেই পৰ্যটকৰ বাবে আংশিকভাৱে পৰ্যটকৰ উদ্যান দৰ্শন সুবিধা দিয়া হৈছে বুলি বন মন্ত্ৰী গৰাকীয়ে জনায়৷
উল্লেখ্য যে আজি অকল কহঁৰা আৰু বাগৰিত ৰেঞ্জতহে পৰ্যটকৰ বাবে মুকলি কৰা হৈছে৷ পৰৱৰ্তী সময়তহে অগৰাতলি আৰু বুঢ়াপাহাৰ ৰেঞ্জ পৰ্যটকৰ বাবে মুকলি কৰা হ’ব বুলি বন বিভাগে জনাইছে ৷ মন কৰিব লগীয়া যে আজিৰ পৰা ৮২ বছৰৰ আগতে পৰ্যটকৰ বাবে মুকলি কৰা হৈছিল কাজিৰঙা ৰাষ্ট্ৰীয় উদ্যান ৷ আকবৰ আৰু ছাহজাহান নামৰ দুটা বন বিভাগৰ হাতীৰে সেই সময়ত কহঁৰাৰ মিহি বিলৰ সমীপৰ পৰা পৰ্যটকক হাতীৰে উদ্যান দেখুওৱাৰ ব্যৱস্থা আছিল৷ আজি বিদেশী পৰ্যটকৰ বিপৰীতে পশ্চিম বংগৰ পৰা অহা পৰ্যটকৰ সমাবেশ হয় কাজিৰঙাত৷
সম্প্ৰতি বিগত বছৰত কাজিৰঙালৈ ১,৮৯,১৯৯ জন দেশী পৰ্যটক আৰু ৮,৫৬৯ জন বিদেশী পৰ্যটকে কাজিৰঙা দৰ্শন কৰিছিল আৰু উদ্যান কৰ্তৃপক্ষই লাভ কৰিছিল ৫ কোটি, ৭৬ লাখ ২১ হেজাৰ টকাৰ ৰাজহ লাভ কৰিছিল৷
