নতুন দিল্লীত অনুষ্ঠিত হৈ যোৱা কৃষক ভাৰতী কো-অপাৰেটিভ লিমিটেড চমুকৈ কৃভকোৰ ৪৬ সংখ্যক বাৰ্ষিক সাধাৰণ সভাত প্ৰতিষ্ঠানটোৱে এক বৃহৎ সফলতাৰ কথা ৰাজহুৱা কৰিছে। ভাৰতৰ অন্যতম অগ্ৰণী সাৰ উৎপাদনকাৰী এই সমবায় প্ৰতিষ্ঠানটোৱে ২০২৫-২৬ বিত্তীয় বৰ্ষত ৮২৪.৬৮ কোটি টকাৰ কৰ-পূৰ্ব লাভ অৰ্জন কৰিবলৈ সক্ষম হৈছে। কেৱল সেয়াই নহয়, এই অভাবনীয় সাফল্যৰ পাছতে প্ৰতিষ্ঠানটোৱে ইয়াৰ সদস্য সমবায়সমূহৰ মূলধনৰ ওপৰত ২০ শতাংশ লভ্যাংশও ঘোষণা কৰিছে। নতুন দিল্লীত অনুষ্ঠিত এই গুৰুত্বপূৰ্ণ সভাত সভাপতিত্ব কৰে কৃভকোৰ অধ্যক্ষ ভি সুধাকৰ চৌধুৰীয়ে। দেশৰ ভিন্ন প্ৰান্তৰ পৰা অহা প্ৰতিনিধি আৰু পৰিচালনা সমিতিৰ সদস্যসকলৰ উপস্থিতিত এই সভাতেই বাৰ্ষিক হিচাপ-নিকাচতো অনুমোদন জনোৱা হয়।
যোৱা বিত্তীয় বৰ্ষটোত কৃভকোৱে উৎপাদনৰ দিশতো এক অভিলেখ সৃষ্টি কৰিছে। প্ৰতিষ্ঠানটোৱে এই সময়ছোৱাত ২১.৩৪ লাখ মেট্ৰিক টন ইউৰিয়া আৰু ১২.৩৯ লাখ মেট্ৰিক টন এমোনিয়া উৎপাদন কৰি নিজৰ উৎপাদন ক্ষমতাৰ ক্ৰমে ৯৭.২৬ শতাংশ আৰু ৯৯.৩৬ শতাংশ ব্যৱহাৰ কৰিবলৈ সক্ষম হৈছে। কৃষকসকলৰ সুবিধাৰ্থে প্ৰতিষ্ঠানটোৱে নিম-কোটেড ইউৰিয়া, জৈৱ সাৰ, উন্নত মানৰ বীজ, জিংক ছালফেটকে ধৰি বহুতো অত্যাৱশ্যকীয় সামগ্ৰী বজাৰত উপলব্ধ কৰিছে। এই বিত্তীয় বৰ্ষত কৃভকোৱে সৰ্বমুঠ ৪৫.৩৭ লাখ মেট্ৰিক টন সাৰ বিক্ৰী কৰি কৃষকৰ বিশ্বাস অৰ্জন কৰিবলৈ সক্ষম হৈছে।
মূল প্ৰতিষ্ঠানটোৰ লগতে ইয়াৰ সহযোগী প্ৰতিষ্ঠানসমূহেও ব্যৱসায়িক ক্ষেত্ৰত চমকপ্ৰদ প্ৰদৰ্শন দাঙি ধৰিছে। কৃভকো ফাৰ্টিলাইজাৰ্ছ লিমিটেডে এই বৰ্ষত ১১.০২ লাখ মেট্ৰিক টন ইউৰিয়া উৎপাদন কৰি ১৪.৪০ কোটি টকাৰ লভ্যাংশ ঘোষণা কৰিছে। একেদৰে, কৃভকো এগ্ৰি বিজনেছ লিমিটেডে অভিলেখসংখ্যক ১,৯১৯.৩৫ কোটি টকাৰ ব্যৱসায় কৰিছে, য’ত ঘৰুৱা আৰু ৰপ্তানি দুয়োটা খণ্ডতেই বৃহৎ উত্থান দেখা গৈছে। আনহাতে, কৃভকো গ্ৰীণ এনাৰ্জী প্ৰাইভেট লিমিটেডে গুজৰাট আৰু অন্ধ্ৰপ্ৰদেশত স্থাপন কৰি থকা নতুন উদ্যোগ দুটা অহা ২০২৬-২৭ বৰ্ষত কাৰ্যক্ষম হৈ উঠিব বুলি আশা কৰা হৈছে। সভাত পৰিচালন সঞ্চালক এছ এছ যাদৱে এই সকলোবোৰ কাৰ্যকৰী সফলতাৰ বিষয়ে অংশগ্ৰহণকাৰীসকলক বিস্তাৰিতভাৱে অৱগত কৰে।
কেৱল ব্যৱসায়িক লাভালাভেই নহয়, গ্ৰাম্য উন্নয়ন আৰু সামাজিক দায়বদ্ধতাৰ ক্ষেত্ৰতো কৃভকোৱে গ্ৰামীণ বিকাশ ট্ৰাষ্টৰ জৰিয়তে পিছপৰা শ্ৰেণীৰ লোকসকলৰ জীৱন ধাৰণৰ মান উন্নত কৰাৰ বাবে অহৰহ প্ৰচেষ্টা চলাই আহিছে। ভাৰত চৰকাৰৰ ‘সহকাৰ সে সমৃদ্ধি’ আঁচনিৰ সৈতে সংগতি ৰাখি প্ৰতিষ্ঠানটোৱে সমবায় খণ্ডক অধিক শক্তিশালী কৰি তুলিছে। এই উৎকৃষ্ট সেৱাৰ বাবেই প্ৰতিষ্ঠানটোৱে ইতিমধ্যে বহুতো ৰাষ্ট্ৰীয় বঁটা লাভ কৰিবলৈ সক্ষম হৈছে। এই সাধাৰণ সভাৰ মজিয়াতে সমবায় আন্দোলনলৈ আগবঢ়োৱা অনবদ্য অৱদানৰ স্বীকৃতি স্বৰূপে গুজৰাটৰ শংকৰভাই চৌধুৰীক সহকাৰিতা শিৰোমণি বঁটা আৰু মধ্যপ্ৰদেশৰ ভগৱান সিং যাদৱক সহকাৰিতা বিভূষণ বঁটাৰে সন্মানিত কৰা হয়।
