গোৱালপাৰাত বন বিভাগৰ অভিযানত জব্দ তিনিখন অবৈধ শিল সৰবৰাহকাৰী ট্ৰাক
গোৱালপাৰা জিলাৰ পাইকান-তুৰা ৰাষ্ট্ৰীয় ঘাইপথত নিশা বন বিভাগৰ এক অভিযানকাৰী দলে অবৈধভাৱে শিল সৰবৰাহ কৰা তিনিখন ট্ৰাক জব্দ কৰিবলৈ সক্ষম হয়।
কৃষ্ণাই বন বিভাগৰ নিয়মীয়া অভিযানৰ সময়তে এই তিনিখন ট্ৰাক জব্দ হয়। জানিব পৰা মতে গোৱালপাৰৰ গাতে লাগি থকা মেঘালয়ৰ পৰা গোৱালপাৰা হৈ চুবুৰীয়া ৰাষ্ট্ৰ ভূটানলৈ এইদৰে ট্ৰাকৰ জৰিয়তে শিলসমূহ কঢ়িয়াই নিয়াৰ পৰিকল্পনা ৰচিছিল শিল মাফিয়াই।
বন বিভাগৰ দলটোৱে গোপন সূত্ৰৰ পৰা এই তথ্য লাভ কৰাত পাইকান-বৰমোহৰাত অভিযানকাৰী দলটোৱে এক তালাচী অভিযান চলায়। আৰু এই তালাচীৰ সময়তে ট্ৰাক কেইখন আহি পাই যদিও বন বিভাগৰ নিৰ্দেশক অংগুষ্ঠ প্ৰদৰ্শন কৰি ঘটনাস্থলৰ পৰা পলাবলৈ চেষ্টা চলায়।
ইফালে আগৰে পৰা সষ্টম হৈ থকা বন বিভাগৰ লোকে লগে লগে খেদি গৈ কিছু দূৰত ট্ৰাককেইখন কৰায়ত্ত কৰিবলৈ সক্ষম হয়। আনহাতে চালানবিহীনভাৱে ট্ৰাককেইখনত মেঘালয়ৰ পৰা শিল কঢ়িয়াই অনা হৈছিল বুলি বন বিভাগৰ প্ৰাথমিক অনুসন্ধানত চালক কেইজনে সদৰী কৰে।
উল্লেখ্য যে প্ৰাকৃতিক সম্পদ ধ্বংসকাৰী মাফিয়াই এইদৰে বন বিভাগৰ নীতি নিৰ্দেশনা জলাঞ্জলি দি এনেদৰে দিনে-নিশাই চোৰাং ব্যৱসায় অব্যাহত ৰখা কাৰ্যই স্বাভাৱিকতে প্ৰকৃতি প্ৰেমীসকলক হতাশাগ্ৰস্ত কৰি তুলিছে।