খাচি ছাত্ৰ সন্থাই মেঘালয়ৰ ইষ্ট জয়ন্তীয়া হিলছত চিমেণ্ট কোম্পানি এটাক খনন অনুমতি প্ৰদানৰ প্ৰস্তাৱত তীব্ৰ আপত্তি দৰ্শাইছে।
নাৰ্পু বন অভয়াৰণ্য আৰু লুখা নৈৰ সমীপত জিলাখনৰ বৃচিৰনট গাঁৱত চিমেণ্ট কোম্পানিটোৰ খননে সমগ্ৰ পৰিৱেশটোকে ধ্বংস কৰিব বুলি মন্তব্য কৰিছে ছাত্ৰ সংগঠনটোৱে।
“আমি বৃচিৰনট গাঁৱৰ ভূ-সম্পদত খনি লীজ/ খনন সম্প্ৰসাৰণত তীব্ৰ আপত্তি কৰো। কোনো কোম্পানিক খননৰ অনুমতি দানে পৰিৱেশটো, ইয়াৰ বন আৰু প্ৰাণীকুললৈ অধিক ধ্বংস মাতিব,” মেঘালয় ৰাজ্যিক প্ৰদূষণ নিয়ন্ত্ৰণ ব’ৰ্দৰ সদস্য সচিবক কে এছ ইউৱে দিয়া স্মাৰকপত্ৰত প্ৰকাশ।
সমগ্ৰ এলেকাটো “ইক’-চেনচিটিভ এৰিয়া” বুলি সদৰী কৰি ছাত্ৰ সংগঠনটোৱে কৈছে যে তাৰ পিছতো বন বিভাগে চিমেণ্ট কোম্পানিটোক অনুমতি দিয়াত তেওঁলোক আচৰিত হৈছে।
চিমেণ্ট কোম্পানিটোৱে বিভাগীয় অনুমতি লাভ কৰা বুলি দাবী কৰিছে, কে এছ ইউৱে কয়।
কোম্পানিটো স্থাপনক লৈ বৃচিৰনট গাঁৱত ৰাজ্যিক প্ৰদূষণ নিয়ন্ত্ৰণ ব’ৰ্দে আয়োজন কৰা লোক শুনানিত ভাগ নল’বলৈ কে এছ ইউৱে ব’ৰ্দক আহ্বান জনাইছে।
উদ্যোগটোৰ স্বাভাৱিকতেই প্ৰদূষণকাৰী হোৱাৰ উপৰি কে এছ ইউৰ মতে নাৰ্পু অঞ্চলৰ কোনো এটা চিমেণ্ট ফেক্তৰিৰে ই টি পি (Effluent Treatment Plant) ব্যৱস্থা নাই।
“ই টি পিৰ অনুপস্থিতি পৰিৱেশৰ বাবে বৃহত্তৰ বিপদ আৰু ভাবুকি কাৰণ, ফেক্তৰিসমূহৰ আৱৰ্জনাসমূহ পৰিৱেশৰ কাৰণে ক্ষতিকাৰক আৰু বিপদজনক,” কে এছ ইউৱে কয়।
সংগঠনটোৱে লগতে কৈছে যে লুখা নৈ ইতিমধ্যে প্ৰদূষিত হৈছে, আৰু প্ৰস্তাৱিত খনি সম্প্ৰসাৰণে ইয়াৰ অস্তিত্বলৈকে প্ৰত্যাহ্বান মাতিব।
প্ৰস্তাৱিত খনন স্থলীৰ পৰা লুখা নৈৰ দূৰত্ব কেৱল ৫০০ মিটাৰ। “সকলো ধৰণৰ প্ৰদূষক প্ৰত্যক্ষ বা পৰোক্ষভাৱে নৈখনলৈকে আহিব,” কে এছ ইউৱে কয়।
“নৈ আৰু বায়ু প্ৰদূষিত হ’লে সমগ্ৰ অঞ্চলটো যিকোনো জীৱৰ বাবেই বাচি থকা অসম্ভৱ হৈ পৰিব।”
তাৰোপৰি কৃষিভূমিৰ ওপৰতো ইয়াৰ গুৰুতৰ আৰু মাৰাত্মক প্ৰভাৱ পৰিব, ছাত্ৰ সংগঠনটোৰ মত।
কে এছ ইউৱে আশংকা প্ৰকাশ কৰে যে চিমেণ্ট কোম্পানিবোৰক এইদৰে খননৰ অনুমতি দি থাকিলে এদিন সমগ্ৰ অঞ্চলটোৱেই পতিত ভূমিত পৰিণত হ’ব।
ইতিমধ্যেই অঞ্চলটোৰ উষ্ণতা আৰু বায়ু প্ৰদূষণ ভয়াৱহভাৱে বৃদ্ধি পাইছে, স্মাৰকপত্ৰত উল্লেখ।
প্ৰস্তাৱিত খননস্থলীৰ সমীপৰ নাৰ্পু বন অভয়াৰণ্য আন জীৱৰ লগতে প্ৰধানকৈ হুলক গিবনৰ বাবে বিখ্যাত।
