শিৱসাগৰ নগৰৰ গিৰিন্দ্ৰ নাথ গগৈ পথৰ কাষত উপেন্দ্ৰ নাথ গগৈ নামৰ এজন খিলঞ্জীয়া ব্যক্তিৰ নামত থকা মাটি মনিষ দাস নামৰ এজন ব্যক্তিয়ে বেদখল কৰি থকা বিষয়টোক কেন্দ্ৰ কৰি শিৱসাগৰত তীব্ৰ প্ৰতিক্ৰিয়াৰ সৃষ্টি হৈছে।
পৈতৃক মাটি-ভেটি হেৰুৱাই নি:স্ব হৈ পৰা পৰিয়ালটোৱে পৈতৃক মাটি ঘূৰাই পোৱাৰ দাবী তুলি বিগত ৩১ জুলাই আৰু ১৫ আগষ্টত অৱস্থান ধৰ্মঘট কাৰ্যসূচী ৰূপায়ন কৰিছিল।
পৰিয়ালটোৱে শিৱসাগৰ জিলাৰ উপায়ুক্তক তেওঁলোকৰ পৈতৃক মাটি অসাধু বণিয়াই বেদখল কৰি ৰখাৰ বিৰুদ্ধে শিৱসাগৰ জিলাৰ উপায়ুক্তক অভিযোগ দাখিল কৰিছিল।
পৰিয়ালটোৰ অভিযোগৰ ভিত্তিত শিৱসাগৰৰ উপায়ুক্তই শিৱসাগৰ ৰাজহ চক্ৰ বিষয়াৰ কাৰ্যালয় আৰু শিৱসাগৰ সদৰ আৰক্ষী থানালৈ বিষয়টো তদন্ত কৰিবৰ বাবে লিখিত ভাবে নিৰ্দেশ দিয়ে।
কিন্তু শিৱসাগৰৰ ৰাজহ চক্ৰ বিষয়াৰ কাৰ্যালয় আৰু সদৰ আৰক্ষী থানাই আজিকোপতি কোনো তদন্ত নকৰাত জনসাধাৰণৰ মাজত ব্যাপক প্ৰতিক্ৰিয়াৰ সৃষ্টি হৈছে।
আনহাতে, অসাধু ব্যৱসায়ীৰ হাতত পৈতৃক মাটি হেৰুৱাই নি:স্ব হৈ পৰা পৰিয়ালটোৰ ন্যায়ৰ দাবীত বীৰ লাচিত সেনাই এলানি আন্দোলনৰ কাৰ্যসূচী ঘোষণা কৰিছে।
বৃহস্পতিবাৰে এই আন্দোলনৰ কাৰ্য্যসূচী অনুসৰি সংগঠনটোৰ কেন্দ্ৰীয় সমিতিয়ে শিৱসাগৰৰ উপায়ুক্ত কাৰ্য্যালয়ৰ সন্মুখত তিনি ঘণ্টীয়া অৱস্থান ধৰ্মঘট কাৰ্যসূচী সম্পন্ন কৰে।
প্ৰতিবাদ স্থলীত সংগঠনটোৱে “আমাক মাটিৰ অধিকাৰ লাগিবই ,অসমত বহিৰাগতৰ অতপালি নচলিব, অসম চৰকাৰ হায় হায়, শিৱসাগৰ জিলা প্ৰশাসন হায় হায়” আদি বিভিন্ন ধৰণৰ শ্লগান দি উত্তাল পৰিৱেশৰ সৃষ্টি কৰে।
প্ৰতিবাদস্থলীত উপস্থিত থাকি সংগঠনটোৰ কেন্দ্ৰীয় সভাপতি কবীন্দ্ৰ চেতিয়া ফুকনে, চিতু বৰুৱা, শৃংখল চলিহা ,মহানন্দ গগৈ ,পংকজ দাস, অনন্ত আৰান্ধৰাকে ধৰি বহু সদস্য উপস্থিত থাকে।
প্ৰতিবাদৰ অন্তত বীৰ লাচিত সেনাই জিলা উপায়ুক্তৰ যোগেদি অসমৰ মুখ্য মন্ত্ৰীলৈ এখন স্মাৰক পত্ৰ প্ৰেৰণ কৰে।
স্মাৰক পত্ৰত সংগঠনটোৱে সোনকালে দৰিদ্ৰ পৰিয়ালটোক মাটিখিনি ঘূৰাই দিয়াৰ ব্যৱস্থা কৰিবলৈ দাবী জনায়।
