যোগী আদিত্যনাথ শাসিত ৰাজ্য উত্তৰ প্ৰদেশত পুনৰ ভূমি বিবাদকলৈ হোৱা সংঘৰ্ষত নিহত হৈছে দুই পিতা-পুত্ৰ।
মৃত লোক দুজনৰ নাম হৈছে দয়াশংকৰ মিশ্ৰ আৰু তেওঁৰ পুত্ৰ আনন্দ মিশ্ৰ।
ঘটনাৰ বিৱৰণী অনুসৰি উত্তৰ প্ৰদেশৰ প্ৰতাপগড় জিলাৰ ৰাণীগঞ্জ আৰক্ষী থানাৰ অন্তৰ্গত শেখৰপুৰ গাঁৱত সংঘটিত হৈছে লোমহৰ্ষক হত্যাকাণ্ড।
শেখৰপুৰ নিৱাসী দয়াশংকৰ মিশ্ৰ আৰু চন্দ্ৰমিণ মিশ্ৰ নামৰ দুজন ব্যক্তিৰ মাজত কিছুদিনৰ পৰা ভূমি বিবাদ চলি আহিছিল।
দুই ব্যক্তিৰ মাজৰ ভূমি বিবাদ মীমাংসা কৰাৰ বাবে দুই পক্ষৰ আইনজীৱীৰ পৰাৰ্মশ ক্ৰমে পঞ্চায়তৰ উদ্যোগত এখন মধ্যস্থাকাৰী সভা অনুষ্ঠিত হয়।
সভা চলি থকা অৱস্থাতে হঠাতে দুয়োপক্ষৰ মাজত কাজিয়া সূত্ৰপাত হয় আৰু বাঁহৰ লাঠিৰে দুয়োপক্ষৰ মাজত আক্ৰমণ-প্ৰত্যাক্ৰমণ চলে।
এই আক্ৰমণত দয়াশংকৰ মিশ্ৰ আৰু তেওঁৰ পুত্ৰ আনন্দ মিশ্ৰ নিহত হোৱাৰ লগতে দুয়ো পক্ষৰ কেবাজনো লোক আহত হৈছে।
ইফালে আক্ৰমণত গুৰুতৰভাৱে আহত হোৱা ইটো পক্ষৰ চন্দ্ৰমণি মিশ্ৰক সংকটজনক অৱস্থাত চিকিৎসালয়ত ভৰ্তি কৰোৱা হৈছে।
আৰক্ষীয়ে ইতিমধ্যে দয়াশংকৰ মিশ্ৰ আৰু আনন্দ মিশ্ৰৰ হত্যাৰ অভিযোগত চন্দ্ৰমণি মিশ্ৰৰ পুত্ৰ আৰু নাতিয়েক গ্ৰেপ্তাৰ কৰিছে।
আনহাতে পঞ্চায়তৰ সভাত দুয়োটা পক্ষৰ মাজত কেনেকৈ কাজিয়াৰ সূত্ৰপাত হ’বলৈ পালে তাকেলৈ প্ৰশ্নৰ উদ্ৰেক হৈছে।
আৰক্ষীয়ে জানিবলৈ দিয়া মতে পঞ্চায়তৰ সভাৰ সম্পৰ্কে স্থানীয় আৰক্ষী থানাক অৱগত কৰা নাছিল।
ইতিমধ্যে স্থানীয় আৰক্ষী থানাৰ উপ-পৰিদৰ্শকসহ তিনিজন আৰক্ষীক কৰ্তব্যত গাফিলতি কৰাৰ অভিযোগত চাকৰিৰ পৰা নিলম্বন কৰা হৈছে।
উল্লখ্যে যে, কিছুমাহ পূৰ্বে উত্তৰ প্ৰদেশত ভূমি বিবাদক কেন্দ্ৰ কৰি এটা পৰিয়ালৰ লোকে আন এটা পৰিয়ালৰ দুজন লোকক গুলীয়াই হত্যা কৰিছিল।
