খিলঞ্জীয়াক ভূমিৰ পট্টা প্ৰদানৰ বাবে ৰাজ্য চৰকাৰে তৎপৰতা চলাইছে। লোকসভা নিৰ্বাচনৰ পূৰ্বে ভূমিহীন তথা পট্টাহীন লোকসকলক ভূমিপট্টা দিয়াৰ বাবে প্ৰস্তুতি প্ৰায় সম্পূৰ্ণ হোৱা বুলি জানিব পৰা গৈছে। অৱশ্যে প্ৰথম পৰ্যায়ত অতি কম সংখ্যক লোককহে পট্টা প্ৰদান কৰি ৰাইজৰ মাজত ভূমি পট্টা লাভৰ আশা সজীৱ কৰি তুলিব বিচৰা হৈছে।
উল্লেখযোগ্য যে ভূমিপট্টাৰ দাবীত ইতিমধ্যে কেইবাটাও সংগঠনে ৰাজ্যজুৰি আন্দোলন চলাই আহিছে যদিও পূৰ্বৰে পৰা চৰকাৰে ভূমিপট্টা প্ৰদানক ৰাজনীতিৰ বিষয় হিচাপে ব্যৱহাৰ কৰি আহিছে।
বৰ্তমান ৰাজ্যৰ বিজেপি চৰকাৰে ইতিমধ্যে ভূমি পট্টা প্ৰদানৰ প্ৰক্ৰিয়া আৰম্ভ কৰিছে আৰু মুষ্টিমেয় কিছুসংখ্যক লোকে পট্টা লাভ কৰিবলৈ সক্ষম হৈছে। কংগ্ৰেছ চৰকাৰেও পূৰ্বতে কিছুসংখ্যক পৰিয়ালক ভূমি পট্টা প্ৰদান কৰিছিল। ইপিনে, চৰকাৰৰ স্পষ্ট ভূমিনীতিৰ অভাৱৰ বাবে পট্টা প্ৰদানৰ বিষয়টোৱে জটিলতাৰহে সৃষ্টি কৰিছে।
ভূমি অধিকাৰ সংগ্ৰাম সমিতি, অসমৰ সভাপতি প্ৰবীণজ্যোতি কলিতাই জানিবলৈ দিয়া মতে, গুৱাহাটীৰ ৮৫ হাজাৰৰো অধিক পৰিয়ালৰ ভূমি পট্টা নাই। তদুপৰি, গুৱাহাটীৰ ১৯খন পাহাৰত বসবাস কৰি থকা ৬৫ হাজাৰ পৰিয়ালেও ভূমি পট্টা অবিহনে বাস কৰি আছে। পট্টাৰ বাবে দীৰ্ঘদিন ধৰি সংগ্ৰাম চলাই অহা ভূমি অধিকাৰ সংগ্ৰাম সমিতি, অসমে ইতিমধ্যে পট্টাৰ প্ৰদানৰ বাবে ত্ৰিছ হাজাৰ আৱেদন কৰিছে।
জানিব পৰা মতে, চৰকাৰে মহানগৰীৰ পাঁচশ পট্টাহীন পৰিয়ালক পট্টা দিয়াৰ বাবে যাৱতীয় প্ৰস্তুতি গ্ৰহণ কৰিছে। অৱশ্যে কিহৰ ভিত্তিত পট্টা প্ৰদান কৰিব সেয়া স্পষ্ট হৈ পৰা নাই।
চৰকাৰে ভূমি পট্টা দিয়াৰ প্ৰক্ৰিয়া গ্ৰহণ কৰা বুলি জানিব পৰাৰ পাছতে একাংশ দালাল চক্ৰই পট্টাহীন লোকক পট্টা দিয়াৰ নামত ধন সংগ্ৰহৰ বাবে নামি পৰা বুলি জানিব পৰা গৈছে। এনে দালাল চক্ৰৰ পৰা সাৱধান নহ’লে পট্টাহীন লোকসকলে গাঁঠিৰ ধন অৱাবতে হেৰুৱাবলগীয়া হ’ব পাৰে বুলি মন্তব্য কৰিছে একাংশ সচেতন ব্যক্তিয়ে।