গুহা মন্দিৰত ভক্তৰ ভিৰ : শিৱৰাত্ৰিৰ চাৰিদিনৰ ভিতৰত গ’লে সিদ্ধি হয় মনোকামনা

মহা শিৱৰাত্ৰি সামৰণি পৰাৰ তিনিদিন পাছতো চামগুৰিৰ ন’নৈ চাহ বাগিচাৰ এটা বিশেষ মন্দিৰত ভক্তৰ লানি নিছিগা ভিৰ পৰিলক্ষিত হৈছে। প্ৰবাদ আছে শিৱৰাত্ৰিৰ পৰা চাৰিদিন পৰ্য্যন্ত এই মন্দিৰ দৰ্শন কৰিলে মনোকামনা পূৰ্ণ হয়। সেয়েহে ভগবানৰ আশিষ বিচাৰি মন্দিৰ চৌহদত উপস্থিত হৈছে হাজাৰ হাজাৰ ভক্তপ্ৰাণ ৰাইজ।

ন’নৈ চাহ বাগিচাৰ সমীপৰ পাহাৰত আঢ়ৈশ ফুট উচ্চতাত অৱস্থিত গুহা মন্দিৰ এবাৰ দৰ্শনৰ বাবেই এতিয়া দৰ্শনাৰ্থীৰ ভিৰ। লোককথা অনুসৰি বহু বছৰ পূৰ্বে এজন গৰখীয়াই প্ৰথমবাৰৰ বাবে পাহাৰৰ ওপৰত বৃহৎকায় শিলৰ মাজত এটা গুহা আৰু শিৱলিঙ্গ প্ৰত্যক্ষ কৰিছিল। সেই দিনৰ পৰাই সোমবাৰে আৰু মহা শিৱৰাত্ৰিৰ তিনি-চাৰি দিন পাছলৈ শিৱৰ আশীৰ্বাদ লাভৰ বাবে ভক্তসকলে শাৰী পাতে গুহা মন্দিৰত।

আনহাতে, চলিত বছৰতো ইয়াৰ ব্যতিক্ৰম নহ’ল। হাজাৰ হাজাৰ শিৱভক্তই শিৱৰাত্ৰিৰ দিনৰ পৰাই মন্দিৰটো দৰ্শনৰ বাবে ওলাই আহিছে। উদ্যোক্তা সমিতিৰ তৰফৰ পৰা জনোৱা মতে ন’নৈ চাহ বাগিচাৰ পৰা পাহাৰৰ ওপৰলৈ যাবৰ বাবে স্থানীয় ৰাইজে নিৰ্মান কৰি উলিওৱা পথটোৰ বাবে এতিয়া মন্দিৰলৈ যাতায়ত সুগম হৈ উঠিছে।