লাভ জেহাদীক শাস্তিযোগ্য অপৰাধ হিচাপে শ্ৰেণীভুক্ত কৰা হ’ব! লাভ জেহাদীয়ে ভোগ কৰিব লাগিব পাঁচ বছৰ পৰ্যন্ত কাৰাবাস।
লাভ জেহাদীৰ বিৰুদ্ধে এই কঠোৰ আইন প্ৰণয়ন কৰাৰ বাবে আগবাঢ়িছে দেশৰ এখন বিজেপি শাসিত ৰাজ্যই।
মংগলবাৰে মধ্য প্ৰদেশৰ গৃহমন্ত্ৰী নৰোত্তম মিশ্ৰই ঘোষণা কৰিছে যে প্ৰেমৰ ফান্দত পেলাই ধৰ্মান্তৰিত কৰাৰ অভিযোগত অভিযুক্তই ৫ বছৰ পৰ্যন্ত কাৰাবাস খাটিব লাগিব!
অতি শীঘ্ৰেই বিধান সভাত এই সম্পৰ্কীয় বিল অনা হ’ব বুলিও প্ৰকাশ কৰে মধ্যুপ্ৰদেশৰ গৃহমন্ত্ৰী গৰাকীয়ে।
অতি সম্প্ৰতি দেশৰ বিভিন্ন ৰাজ্যত লাভ জেহাদ বৃদ্ধি পোৱা বুলি অভিযোগ উত্থাপন কৰি আহিছে হিন্দুত্ববাদী সংগঠনসমূহে।
অৰ্থাৎ ভুৱা পৰিচয়েৰে প্ৰেমৰ ফান্দত পেলাই যুৱতীক অন্য ধৰ্মলৈ ধৰ্মান্তৰিত কৰাৰ অভিযোগ উত্থাপন কৰি আহিছে গোড়া হিন্দু ধৰ্মাৱলম্বী লোকে।
আনকি তেওঁলোকৰ অভিযোগ যে ভুৱা পৰিচয়েৰে প্ৰেমত পেলাই যুৱতীক ধৰ্মান্তৰিত হ’বলৈ বাধ্য কৰা হয়।
বহু হিন্দুত্ববাদী সংগঠনে ইয়াৰ বিৰুদ্ধে কঠোৰ আইন প্ৰণয়ন কৰি লাভ জেহাদক শাস্তিযোগ্য অপৰাধ ৰূপে ঘোষণা কৰিবলৈ কেন্দ্ৰীয় চৰকাৰক দাবী জনাই আহিছে।
ইফালে কেন্দ্ৰীয় চৰকাৰে সংবিধানত লাভ জেহাদ সংক্ৰান্তীয় কোনো আইন নাই বুলি স্পষ্টৰূপত জনাইছিল।
ইয়াৰ পিছতে শিৱৰাজ সিং চৌহানৰ বিজেপি চৰকাৰে মধ্যপ্ৰদেশত লাভ জেহাদৰ বিপক্ষে আইন কাৰ্যকৰী কৰাৰ বাবে ‘মধ্যপ্ৰদেশ স্বাধীনতা বিল, ২০২০’ প্ৰণয়ন কৰাৰ বাবে সাজু হৈছে।
আগন্তুক মধ্যপ্ৰদেশ বিধানসভাৰ অধিৱেশনত এই বিল পেচ কৰি পাছ কৰা হ’ব বুলি জনাইছে মধ্যপ্ৰদেশৰ গৃহমন্ত্ৰী গৰাকীয়ে। এই বিল আইনলৈ পৰিণত হ’লে ৰাজ্যখনত লাভ জেহাদক অপৰাধ বুলি গণ্য কৰি অভিযুক্তক ৫ বছৰ পৰ্যন্ত কাৰাদণ্ড বিহা হ’ব।
“বিয়াৰ সময়ত ভিন্ন ধৰ্মৰ লোকক যদি জোৰকৈ ধৰ্মান্তৰিত হ’বলৈ বাধ্য কৰা হয়, তেনে অভিযুক্তৰ বিৰুদ্ধে আইনী প্ৰক্ৰিয়া আৰম্ভ কৰা হ’ব।” মধ্যপ্ৰদেশৰ গৃহমন্ত্ৰী নৰোত্তম মিশ্ৰই সংবাদ মাধ্যমৰ আগত কয়।
উল্লেখ্য যে ইতিমধ্যে হিমাচল প্ৰদেশত লাভ জেহাদৰ বিৰুদ্ধে আইন প্ৰণয়ন কৰা হৈছে আৰু উত্তৰ প্ৰদেশ, হাৰিয়ানা আৰু অসমতো এই আইন অনাৰ বাবে প্ৰচেষ্টা চলি আছে।
