অসমৰ চাৰিটা বাঁওপন্থী দল— চি পি আই, চি পি আই (এম), চি পি আই (এম এল) আৰু আৰ চি পি আইৰ এখন যৌথ সভা যোৱা ৯ অক্টোবৰৰ সন্ধিয়া চি পি আই (এম)ৰ ৰাজ্যিক কাৰ্যালয়ত অনুষ্ঠিত হৈ যায়।
চি পি আই দলৰ ৰাজ্যিক সম্পাদক মুনিন মহন্তৰ সভাপতিত্বত অনুষ্ঠিত আৰু কেউটা দলৰ ৰাজ্যিক নেতৃবৃন্দ উপস্থিত থকা সভাখনত ৰাজ্যৰ বৰ্তমান পৰিস্থিতি আলোচনা কৰা হয়। বিশেষকৈ বৰ্তমানৰ বিজেপি-নেতৃত্বাধীন ৰাজ্য চৰকাৰখনৰ বিভিন্ন জনবিৰোধী নীতি, ভয়ানক দুৰ্নীতি আৰু কেলেংকাৰী, সাম্প্ৰদায়িক- বিভাজনবাদী আৰু স্বেচ্ছাচাৰী কৰ্মকাণ্ড, কেন্দ্ৰৰ মোদী চৰকাৰৰ অসমবিৰোধী কামকাজ আৰু নীতিসমূহৰ প্ৰতি ৰাজ্য চৰকাৰৰ অন্ধ সমৰ্থন আদি বিষয়বোৰ আলোচনা কৰা হয়।
চি পি আই (এম)ৰ ৰাজ্যিক সম্পাদক দেবেন ভট্টাচাৰ্যই সভাৰ উদ্দেশ্য ব্যাখ্যা কৰি অন্যান্য বিষয়বোৰৰ লগতে আগন্তুক অসম বিধানসভাৰ নিৰ্বাচনত বাঁও দলসমূহে গ্ৰহণ কৰিব লগা উমৈহতীয়া স্থিতিৰ বিষয়টো উত্থাপন কৰে।
আলোচনাত চাৰিওটা বাঁও দলে দৃঢ়মত প্ৰকাশ কৰে যে বিভিন্ন ধর্ম-ভাষা-সম্প্ৰদায়-জাতি-জনগোষ্ঠীৰ বাসভূমি অসমৰ ঐক্য-সম্প্ৰীতি অটুট ৰখা আৰু ৰাজ্যখনৰ সৰ্বাংগীন উন্নয়নৰ হকে আগন্তুক বিধানসভাৰ নিৰ্বাচনত সাম্প্ৰদায়িক আৰু স্বেচ্ছাচাৰী বিজেপি তথা তেওঁলোকৰ সহযোগী শক্তিসমূহক যিকোনো মূল্যৰ বিনিময়ত ক্ষমতাৰ পৰা উৎখাট আৰু ৰাজ্যত এখন ধৰ্মনিৰপেক্ষ চৰকাৰ প্ৰতিষ্ঠা কৰিব লাগিব।
বিজেপিৰ শাসনত গণতান্ত্ৰিক অধিকাৰসমূহ আৰু নাগৰিক স্বাধীনতাৰ ওপৰতো ধাৰাবাহিক আক্ৰমণ চলিছে আৰু ইয়াক প্ৰতিৰোধ কৰা অত্যন্ত প্ৰয়োজন হৈ পৰিছে বুলি বাঁও দলসমূহে মত প্ৰকাশ কৰে।
আগন্তুক বিধানসভাৰ নিৰ্বাচনত বিজেপি বিৰোধী ভোটৰ বিভাজন ৰোধ কৰাৰ বাবে বাঁও দলসমূহে নিৰলস প্ৰচেষ্টা অব্যাহত ৰাখিব। এইক্ষেত্ৰত চাৰিওটা বাঁও দলে নৱগঠিত আঞ্চলিক দলবোৰকে ধৰি সকলো বিজেপি-বিৰোধী দলৰ মাজত নিৰ্বাচনী মিত্ৰতা বা বুজাবুজি গঢ়ি তোলাৰ পোষকতা কৰে।
সেয়ে বাঁও দলকেইটাই প্ৰকাশ কৰা এটা যৌথ বিবৃতিত বিজেপি আৰু তেওঁলোকৰ সহযোগী শক্তিবোৰক ক্ষমতাৰ পৰা অপসাৰণ কৰাৰ স্বাৰ্থত নিৰ্বাচনটোত সকলো বিজেপি-বিৰোধী ৰাষ্ট্রীয় আৰু আঞ্চলিক দলক একজোঁট হৈ মাৰবান্ধি ঠিয় দিবলৈ আহ্বান জনাইছে।
বিজেপিক পৰাস্ত কৰিব নোৱাৰিলে অসমৰ ভাষা-সংস্কৃতি-ঐক্য-সম্প্ৰীতি বিপন্ন হ’ব, তেওঁলোকৰ কৰ্পোৰেট বান্ধৱ আৰ্থিক নীতিৰ ফলত জনসাধাৰণৰ জীৱন-জীৱিকাৰ ওপৰত আক্ৰমণ বাঢ়িব, অসমৰ পৰিৱেশ ধ্বংস আৰু প্ৰাকৃতিক সম্পদৰ অবাধ লুণ্ঠনৰ উপৰি ৰাজ্যৰ সৰ্বাংগীন উন্নয়ন এক দুঃস্বপ্ন হৈ ৰ’ব।
বাওঁ গল সমূহে লগতে কয় যে বিজেপিয়ে গণতন্ত্ৰ নিধন যজ্ঞও আৰম্ভ কৰিছে। ইতিমধ্যে বলপূৰ্বক সাম্প্ৰদায়িক আৰু সংবিধানবিৰোধী ‘কা’ আইন প্ৰণয়ন কৰি বিজেপি দলে নিজৰ অসমবিৰোধী স্বৰূপ উন্মোচন কৰিছে। বাঁও দলসমূহে ‘কা’ প্ৰত্যাহাৰৰ দাবীও অব্যাহত ৰখা প্ৰয়োজন বুলি দৃঢ়মত প্ৰকাশ কৰে।
অনুষ্ঠিত বাঁও দলসমূহৰ সভাই অসম আৰক্ষীত এছ আই পদৰ নিযুক্তিত সংঘটিত অভূতপূৰ্ব কেলেংকাৰী সন্দৰ্ভত আলোচনা কৰি মত প্ৰকাশ কৰে যে দুৰ্নীতিৰ বিৰুদ্ধে ৰাজ্য চৰকাৰৰ তথাকথিত ‘শূন্য সহণশীলতা’ৰ স্বৰূপ নিযুক্তি কেলেংকাৰীসমূহে উদঙাই দিছে। এইবোৰ ভয়ানক দুৰ্নীতি আৰু কেলেংকাৰীত মন্ত্ৰী-বিধায়ক তথা শাসক দলৰ প্ৰভাৱশালী ৰাজনৈতিক নেতা জড়িত হৈ আছে। সেয়ে অপৰাধীক চিনাক্ত আৰু উচিত শাস্তি দিয়াৰ বাবে উচ্চ ন্যায়ালয়ৰ এজন কৰ্মৰত ন্যায়াধীশৰ নেতৃত্বত স্বাধীন ন্যায়িক তদন্ত হ’ব লাগিব। অন্যথা কেলেংকাৰীটোৰ মূল অপৰাধীবোৰ সাৰি যাব।
বাঁওপন্থী দলকেইটাই আন এক প্ৰস্তাৱৰ জৰিয়তে কেন্দ্ৰৰ মোদী চৰকাৰৰ জনবিৰোধী নীতিসমূহৰ প্ৰতিবাদত কেন্দ্ৰীয় শ্ৰমিক সংগঠনসমূহ আৰু বিভিন্ন কৃষক সংগঠনে আহ্বান জনোৱা অহা ২৬ নৱেম্বৰৰ ৰাষ্ট্ৰজোৰা ‘সাধাৰণ ধৰ্মঘট’ৰ প্ৰতি পূৰ্ণ সমৰ্থন আৰু সংহতি জ্ঞাপন কৰিছে। অসমত ২৬ নৱেম্বৰৰ ধৰ্মঘট সৰ্বাত্মক ৰূপত সফল কৰাৰ বাবে দলসমূহে ৰাজ্যৰ সৰ্বস্তৰৰ জনসাধাৰণৰ প্ৰতি আহ্বান জনাইছে।