বাংলা চলচ্চিত্ৰ জগতৰ কিংবদন্তি অভিনেতা সৌমিত্ৰ চেটাৰ্জীৰ দেওবাৰে দুপৰীয়া ১২বাজি ১৫ মিনিটত কলকাতাৰ বেলেভিউ হাস্পাতলত দেহাৱসান ঘটে।
বিগত ৪০দিন ধৰি জীৱন-মৃত্যুৰ সৈতে যুঁজ দিয়াৰ পাছত অৱশেষত নিয়তিৰ ওচৰত হাৰ মানিলে প্ৰসিদ্ধ অভিনেতাগৰাকীয়ে। মৃত্যুৰ সময়ত তেওঁৰ বয়স হৈছিল ৮৫বছৰ।
ছয় দশক ধৰি বাংলা চলচ্চিত্ৰ প্ৰেমী দৰ্শকৰ মনত গভীৰ সাঁচ বহুৱাই অভিনয় জগতত অদমনীয় প্ৰদৰ্শনেৰে সকলোৰে মন জয় কৰিছিল।
অভিনয় জীৱনকে সাৰোগত কৰি জীৱন সাৰ্থক কৰি তোলা ক্ষণজন্মা সৌমিত্ৰ চেটাৰ্জীয়ে লকডাউনৰ পৰৱৰ্তী সময়ত নিজৰ বায়’পিক অভিযানৰ শ্বুটিং সমাপ্ত কৰাৰ লগতে এখন তথ্যচিত্ৰৰ কামো কৰিছিল।
১৯৩৫ চনত পশ্চিমবংগৰ কৃষ্ণনগৰত জন্ম গ্ৰহণ কৰা সৌমিত্ৰ চেটাৰ্জীয়ে কলকাতাৰ চিটি কলেজৰ পৰা বাংলাত অনাৰ্ছ লৈ স্নাতক ডিগ্ৰী গ্ৰহণ কৰিছিল।
১৯৫১ চনত সত্যজিত ৰায়ৰ ‘অপুৰ সংসাৰ’ ছবিৰে নিজৰ অভিনয় জগতৰ স্বৰ্ণিল যাত্ৰা আৰম্ভ কৰা সৌমিত্ৰ চেটাৰ্জীয়ে সত্যজিত ৰায়ে নিৰ্মাণ কৰা ৩৪ খন চলচ্চিত্ৰৰ ভিতৰত ১৪খন ছবিতে অভিনয় কৰিছিল।
সত্যজিত ৰায়ৰ উপৰি সৌমিত্ৰ চেটাৰ্জীয়ে তপন সিনহা, মৃনাল সেন, তৰুণ মজুমদাৰৰ দৰে খ্যাতনামা পৰিচালকৰ পৰা আৰম্ভ কৰি শিৱপ্ৰসাদ মুখোপাধ্যায়, নন্দিতা ৰায়, সৃজিত মুখোপাধ্যায়, অতনু ঘোষ, সুমন ঘোষৰ দৰে নতুন প্ৰজন্মৰ পৰিচালকৰ ছবিতো অভিনয় কৰিছে।
নিজৰ ৬১বছৰীয়া সুদীৰ্ঘ চলচ্চিত্ৰৰ কেৰিয়াৰত তেওঁ প্ৰায় ২৫০খন চলচ্চিত্ৰত অভিনয় কৰিছিল।
যোৱা ৫ অক্টোবৰত কোভিড-১৯ পজিটিভ ধৰা পৰাৰ পাছত অভিনেতাগৰাকীক হাস্পাতলত ভৰ্তি কৰা হৈছিল। দুসপ্তাহ পাছত কৰ’নামুক্ত হ’লেও কোভিড পৰৱৰ্তী জটিলতা ভূগিছিল সৌমিত্ৰ চেটাৰ্জী।
বাংলা চলচ্চিত্ৰ প্ৰেমী তথা অজস্ৰ গুণমুগ্ধক শোকস্তব্ধ কৰি অৱশেষত আজি প্ৰসিদ্ধ অভিনেতাগৰাকীয়ে জীৱন নাটৰ সামৰণি মাৰে।
