বুধবাৰে উজনি অসমৰ ডিব্ৰুগড় জিলাৰ লেপেটকটাস্থিত ডিব্ৰুগড় ব্ৰহ্মপুত্ৰ ক্ৰেকাৰ আৰু পলিমাৰ লিমিটেড(BCPL)ৰ উৎপাদন বিভাগত মুক্তভাৱে বিচৰণ কৰি ফুৰা এটা প্ৰাপ্ত বয়স্ক নাহৰফুটুকী বাঘ বন্দী কৰা হৈছে।
উল্লেখ্য যে প্ৰতিষ্ঠানটোত নিৰাপত্তাৰ দায়িত্বত থকা কেন্দ্ৰীয় ঔদ্যোগিক নিৰাপত্তা বাহিনী(CISF)ৰ কৰ্মৰত জোৱানে কৰ্তব্যৰত অৱস্থাত উদ্যোগ প্ৰতিষ্ঠানটোৰ উৎপাদন বিভাগত দুসপ্তাহৰ পূৰ্বে এটা প্ৰাপ্ত বয়স্ক নাহৰফুটুকী বাঘে মুক্তভাৱে বিচৰণ কৰা প্ৰত্যক্ষ কৰে।
নাহৰফুটুকীটো মুক্তভাৱে ঔদ্যোগিক প্ৰতিষ্ঠানটোৰ উৎপাদন কক্ষত প্ৰত্যক্ষ কৰাৰ লগে লগে বন বিভাগক খবৰ দিয়া হয়।
খবৰ লাভ কৰাৰ পিছতে বনবিভাগৰ এটা দলে গেছ ক্ৰেকাৰলৈ গৈ নাহৰফুটুকী বাঘটো বন্দী কৰিবলৈ দুসপ্তাহৰ পূৰ্বে তিনিটাকৈ পিঞ্জৰা স্থাপন কৰিছিল।
দুসপ্তাহৰ পিছত আজি বুধবাৰে দিনৰ ভাগত তাৰে এটা পিঞ্জৰাত বন্দী হয় মুক্তভাৱে বিচৰণ কৰি থকা নাহৰফুটুকীটো।
বন্দী কৰা নাহৰফুটুকীটো দিহিং পাটকাই বনাঞ্চলত মুকলি কৰি দিয়া হ’ব বুলি বনবিভাগৰ সূত্ৰই জানিবলৈ দিছে।
“বিচিপিএলত কৰ্মৰত চিআইএছএফৰ জোৱানে প্ৰথমে নাহৰফুকুটী বাঘটো প্ৰত্যক্ষ কৰাৰ পিছতে আমি গৈ তাতে তিনিটা পিঞ্জৰা স্থাপন কৰো আৰু দুসপ্তাহৰ পিছত আজি তাৰে এটা পিঞ্জৰাত মুক্তভাৱে বিচৰণ কৰি ফুৰা নাহৰফুটুকীটো বন্দী হয়।” ডিব্ৰুগড় বন বিভাগৰ ৰেঞ্জাৰ পল্লৱ শইকীয়াই সংবাদ মাধ্যমৰ আগত কয়।
