অসমৰ অন্যতম উচ্চ শিক্ষানুষ্ঠান গুৱাহাটী বিশ্ববিদ্যালয়ৰ সমীপত সুৰাৰ বিপণি স্থাপনৰ বাবে প্ৰদান কৰা হৈছে অনুমতি। শিক্ষানুষ্ঠানখনৰ সমীপতেই সুৰা বিপণি খোলাৰ অনুমতি প্ৰদান কৰাক লৈ সৃষ্টি হৈছে প্ৰতিক্ৰিয়াৰ । কামৰূপ মহানগৰ জিলা প্ৰশাসন আৰু আবকাৰী বিভাগে অনুমতি দিয়াৰ বিৰুদ্ধে জাঙুৰ খাই উঠিছে গুৱাহাটী বিশ্ববিদ্যালয় কৰ্তৃপক্ষ, স্নাতকোত্তৰ ছাত্ৰ সন্থা আৰু স্থানীয় ৰাইজ ।
উল্লেখ্য যে কামৰূপ মহানগৰ জিলা আবকাৰী বিভাগে বিশ্ববিদ্যালয়ৰ গাতে লাগি থকা ৰাষ্ট্ৰীয় ঘাইপথৰ সমীপত এই সুৰা বিপণি খোলাৰ অনুমতি দিছে । আবকাৰী বিভাগৰ এই সিদ্ধান্তৰ পাছতেই সৃষ্টি হৈছে তীব্র প্ৰতিক্ৰিয়াৰ ।
এই সন্দৰ্ভত গুৱাহাটী বিশ্ববিদ্যালয়ৰ ভাৰপ্ৰাপ্ত পঞ্জীয়ক উৎপল শৰ্মাই এই অনুমতিক লৈ আশ্চৰ্য প্ৰকাশ কৰি কয়, ‘২০২৪ চনতে আবকাৰী বিভাগে এই সুৰাৰ বিপণি খোলাৰ জাননী জাৰি কৰিছিল। তাৰ পাছত পুনৰ বিশ্ববিদ্যালয় কৰ্তৃপক্ষই বিৰোধিতা কৰি কামৰূপ মহানগৰ জিলা প্ৰশাসন আৰু গুৱাহাটী পৌৰ নিগম কৰ্তৃপক্ষলৈ পত্ৰ প্ৰেৰণ কৰিছিল । এতিয়া আকৌ আবকাৰী বিভাগে পুনৰ এই অনুমতি বাহাল ৰাখি সুৰাৰ বিপণিখন স্থাপনৰ বাবে অনুমতি দিছে।’
ইপিনে, বিশ্ববিদ্যালয়ৰ স্নাতকোত্তৰ ছাত্ৰ সন্থাৰ সভাপতি মানস প্ৰতীম কলিতা আৰু সম্পাদক কৌশিক বৰুৱাই এই সুৰা বিপণি স্থাপনৰ তীব্ৰ বিৰোধিতা কৰে ।
স্থানীয় ৰাইজে এই সুৰা বিপণি স্থাপনৰ তীব্ৰ বিৰোধিতা কৰে। একাংশ সচেতন স্থানীয় ব্যক্তিয়ে এই সুৰা বিপনী স্থাপনৰ বিৰোধিতা কৰি কয় যে চৰকাৰে এই সিদ্ধান্ত বাতিল নকৰিলে আইনগতভাৱে আদালতৰ দ্বাৰস্থ হ’ব উল্লেখ কৰে ।
তদুপৰি মুখ্যমন্ত্ৰী হিমন্ত বিশ্ব শৰ্মা পঢ়া শিক্ষানুষ্ঠানখনৰ ওচৰত এনে কাম কৰাক লৈ তেওঁৰ স্থিতি বহুজনে জানিব বিচাৰিছে।
