লিভ ইন ৰিলেশ্যন আৰু সমলৈংগিক সম্পৰ্কক লৈ তীব্ৰ আপত্তি ব্যক্ত কৰে কেন্দ্ৰীয় মন্ত্ৰী তথা বিজেপিৰ জ্যেষ্ঠ নেতা নীতিন গাডকাৰীয়ে।
আৰ এছ এছৰ প্ৰাক্তন প্ৰচাৰক গাডকাৰীৰ ভাষাত সমাজৰ নিজস্ব নিয়ম, নীতি আছে। সেইবোৰ পালন নকৰিলে সমাজ ব্যৱস্থা ধ্বংস হৈ যাব।
ইউটিউব চেনেল এটাক দিয়া এক সাক্ষাৎকাৰত গাডকাৰীয়ে লিভ-ইন ৰিলেশ্যনৰ বিষয়ে স্পষ্টকৈ কয় যে এনে সম্পৰ্ক একেবাৰেই গ্ৰহণযোগ্য নহয়। ই ভুল আৰু সমাজৰ বাবে বিপদজনক।
তেওঁ কয়, “প্ৰতিখন সমাজৰ নিজস্ব নিয়ম আছে। সেইবোৰ অনুসৰণ কৰিব লাগিব। এই নিয়মবোৰ পালন নকৰিলে সমাজখন ধ্বংস হৈ যাব।”
গাডকাৰীয়ে লগতে কয়, “বিয়া নকৰিলে সন্তান কেনেকৈ হ’ব?” সেই শিশুটিৰ ভৱিষ্যত যদি কি হ’ব? সামাজিক ব্যৱস্থাক এনেদৰে আওকাণ কৰিলে ভৱিষ্যত প্ৰজন্মৰ ওপৰত কি প্ৰভাৱ পৰিব?”
গাডকাৰীয়ে অলপ খঙাল সুৰত কয়, “যদি আপুনি ভাবিছে যে আপুনি কেৱল ধেমালিৰ বাবে সন্তান জন্ম দিব, আৰু আন কোনো দায়িত্ব পালন নকৰিব, তেন্তে সেয়া কাম নহয়। সন্তান জন্ম দি সঠিকভাৱে ডাঙৰ-দীঘল কৰাটো প্ৰতিজন পিতৃ-মাতৃৰ কৰ্তব্য।”
গাডকাৰীয়ে দাবী কৰে যে এবাৰ ব্ৰিটিছ প্ৰধানমন্ত্ৰী আৰু বৈদেশিক মন্ত্ৰীয়েও তেওঁক কৈছিল যে মানুহৰ বিবাহৰ অনিচ্ছা ইউৰোপীয় সমাজৰ আটাইতকৈ ডাঙৰ সমস্যা।
গাডকাৰীয়ে কেৱল লিভ-ইন ৰিলেশ্যনৰেই নহয়, সমকামিতাৰ প্ৰতিও তীব্ৰ আপত্তি কৰিছিল। তেওঁ কয়, এনে সম্পৰ্ক গঢ় লৈ উঠিলে সমগ্ৰ সামাজিক ব্যৱস্থাটো ভাঙি যাব।
অৱশ্যে শেষত গডকাৰীয়ে কৈছিল, এই সকলোবোৰ তেওঁৰ ব্যক্তিগত মতামত। তেওঁৰ দল বা চৰকাৰৰ স্থিতি নহয়।
