মৰিগাঁও জিলাৰ মায়ং ৰাজহ চক্ৰৰ অন্তৰ্গত চনকা গাঁৱৰ এটুকুৰা ভূমিক কেন্দ্ৰ কৰি এটা দুষ্ট চক্ৰই অঞ্চলটোৰ উন্নয়নৰ হ’কে কাম কৰি অহা এগৰাকী স্থানীয় ব্যক্তিক অনা-অসমীয়াৰ অপবাদ জাপি দি হাৰাশাস্তি কৰাৰ প্ৰচেষ্টা চলোৱাৰ অভিযোগ উত্থাপিত হৈছে।
আনকি, উক্ত চক্ৰটোৱে একাংশ সাংবাদিকৰ হতুৱাই ব্যক্তিগৰাকীৰ বিৰুদ্ধে বাতৰি পৰিৱেশন কৰোৱাই ভাৱমূৰ্তি বিনষ্ট কৰাৰো চেষ্টা অব্যাহত ৰাখিছে।
পূৰ্ব পুৰুষৰে পৰা সুদীৰ্ঘ বছৰ চনকাত বাস কৰি অহা আৰু অসমীয়া জাতীয় জীৱনৰ সৈতে সংপৃক্ত হৈ পৰা বিনোদ সিং নামৰ ব্যক্তিজনক অনা-অসমীয়া বুলি অপবাদ দি তেওঁৰ বিৰুদ্ধে ভূমি বেদখলৰ অভিযোগ অনা হৈছে।
বিনোদ সিঙে গমাৰিগুৰি কিষাম ৰাজহ গাঁৱৰ অজিত ডেকা নামৰ ব্যক্তি এজনৰ পৰা পঞ্চাশ বছৰৰো অধিক কাল তেওঁৰ দখলত থকা ২৭ নম্বৰ দাগৰ এটুকুৰা ভূমি যোৱা ২০১৬ চনতে ক্ৰয় কৰিছিল।
ৰাজহ নীতি অনুসৰি মাটি টুকুৰাৰ চৰকাৰীভাৱে নিৰ্দ্ধাৰিত খাজনা আদিও আদায় দি অহা হৈছে।
কিন্তু দুষ্ট চক্ৰটোৱে এই ভূমি বিনোদ সিঙে বেদখল কৰা বুলি অভিযোগ তুলি বিভিন্ন সময়ত তেওঁৰ মাটিৰ চাৰি সীমাৰ বেৰ-খুটি আদি লণ্ডভণ্ড কৰি আহিছে।
দুষ্ট চক্ৰৰ এনে অত্যাচাৰৰ পাছত বিনোদ সিঙে কেইবাবাৰো আৰক্ষীক গোচৰ দিয়াৰ পাছতো কোনো ব্যৱস্থা গ্ৰহণ নকৰাত উপায়হীন হৈ তেওঁ মৰিগাঁও জিলা আদালতৰ কাষ চাপে। আদালতে MR 138/2019নম্বৰত এটা গোচৰ গ্ৰহণ কৰে।
আদালতে তেওঁৰ আবেদনৰ সকলো দিশ চালি-জাৰি চাই আৰু কাগজ-পত্ৰ পৰীক্ষা কৰি তথা গাঁওবুঢ়া আৰু গাঁওৰ লোকৰ সাক্ষ্য গ্ৰহণ কৰি মাটি টুকুৰা বিনোদ সিঙৰ বুলি ৰায় দিয়ে।
অৱশ্যে, এই ৰায়ৰ বিৰুদ্ধে একাংশই পুনৰীক্ষণৰ আবেদন জনাইছে যদিও ইয়াৰ শুনানি এতিয়ালৈ অনুষ্ঠিত হোৱা নাই।
সম্পূৰ্ণ আইনী প্ৰক্ৰিয়াৰে এটুকুৰা ভূমি ক্ৰয় কৰা বিনোদ সিঙক অনা-অসমীয়া অপবাদ জাপি দি এইদৰে হাৰাশাস্তি কৰাৰ আঁৰত আছে চনকাত বৰ্তমান এখন ৰিজ’ৰ্ট স্থাপন কৰি অঞ্চলটোত অশান্তিৰ বিষবাষ্প বিয়পাব খোজা শিবু তামাং নামৰ এজন প্ৰভাৱশালী ব্যক্তি।
নেপালী সম্প্ৰদায়ৰ এই ব্যক্তিগৰাকীয়ে চনকা অঞ্চলত নিজৰ প্ৰভুত্ব বিস্তাৰৰ উদ্দেশ্যে একাংশ লোকক উচটনি দি বিনোদ সিঙৰ বিৰুদ্ধে ব্যৱহাৰ কৰাৰ অভিযোগ উত্থাপিত হৈছে।
উল্লেখ্য যে বিনোদ সিঙে যোৱা ২০০৮চনত অসম গণ পৰিষদৰ পৰা মায়ং গাওঁ পঞ্চায়তৰ সদস্য হিচাপে নিৰ্বাচিত হৈ ২০১৩চনলৈকে কাৰ্যনিৰ্বাহ কৰিছিল।
অতিকৈ পাছপৰা চনকা অঞ্চলত যাতায়তৰ বাবে কোনো সুচল বাট-পথ নাছিল যদিও বিনোদ সিঙৰ নেৰানেপেৰা প্ৰচেষ্টাত মৰিগাওঁ জিলাৰ তদানীত্বন উপায়ুক্ত ৰাকেশ কুমাৰৰ হস্তক্ষেপত চনকাত আজি গাড়ী-মটৰ চলাচলৰ বাবে উপযুক্ত বাট-পথ গঢ় লৈ উঠিছে।
তদুপৰি, চনকা অঞ্চলত বসবাস কৰা লোকসকলৰ মাজত শান্তি-সম্প্ৰীতি অব্যাহত ৰখাৰ বাবেও বিনোদ সিঙে সদায় প্ৰচেষ্টা অব্যাহত ৰাখিছে।
কিন্তু পৰিতাপৰ কথা যে একাংশ ন্যস্তস্বাৰ্থ জড়িত লোকে তেওঁৰ ব্যক্তিত্বত কালিমা সনাৰ অপচেষ্টাৰে ভূমি বেদখলৰ দৰে মিছা অভিযোগ আনিছে।
আদালতৰ ৰায়ৰ পাছত নিজৰ সান্দহ খোৱা বালি তল যোৱাৰ ভয়ত দুষ্ট চক্ৰটোৱে এতিয়া পুনৰ আদালতত আবেদন জনাই মুখ বচোৱাৰ চেষ্টা চলাইছে।
