সদ্য সমাপ্ত নিৰ্বাচনত বিটিচিত হাগ্ৰামা মহিলাৰীৰ সুদীৰ্ঘ ১৫ বছৰীয়া ৰাজত্বৰ অন্ত পৰাৰ পাছত কাইলৈ বিটিচিত নতুনকৈ চৰকাৰ গঠন কৰিব বিজেপি, য়ুপিপিএল আৰু গণ সুৰক্ষা পাৰ্টিৰ সন্মিলিত এন ডি এই।
মুখ্য মন্ত্ৰী সৰ্বানন্দ সোণোৱালে য়ুপিপিএলৰ অধ্যক্ষ প্ৰমোদ বড়ো পৰৱৰ্তী বিটিচি প্ৰধান হ’ব বুলি স্পষ্ট কৰি দিছে।
আনহাতে, মঙলবাৰে অনুষ্ঠিত হ’বলগীয়া শপত গ্ৰহণ অনুষ্ঠানৰ বাবে বিটিআৰৰ চাৰিওখন জিলাত স্থানীয় বন্ধ ঘোষণা কৰা হৈছে।
মঙলবাৰে ৰাতিপুৱা ১১ বজাত কোকৰাঝাৰৰ বডোফা নগৰৰ গ্ৰীণ ফিল্ডত প্ৰমোদ বড়োৱে পৰৱৰ্তী বিটিচি প্ৰধান হিচাপে শপত গ্ৰহণ কৰিব।
ইপিনে, স্থানীয় বন্ধ ঘোষণা কৰা বাবে কাইলৈ বিটিআৰৰ চাৰিওখন জিলাত চৰকাৰী কাৰ্য্যালয় তথা শিক্ষানুষ্ঠান সমূহ বন্ধ থাকিব।
কাইলৈ শপত গ্ৰহণ অনুষ্ঠানক কেন্দ্ৰ কৰি কোকৰাঝাৰ চহৰত ব্যপক নিৰাপত্তা ব্যৱস্থা গঢ়ি তোলা হৈছে।
য়ুপিপিএল, বিজেপি আৰু গণ সুৰক্ষা পাৰ্টিৰ দলীয় সমৰ্থক সকলে কোকৰাঝাৰত ব্যপক হাৰত ভিৰ কৰিব বুলি দল কেইটাৰ নেতৃত্বই আশা প্ৰকাশ কৰিছে।
সদ্য সমাপ্ত বিটিচি নিৰ্বাচনত বিপিএফে ১৭ খন, য়ুপিপিএলে ১২ খন, বিজেপিয়ে ৯ খন, গণ সুৰক্ষা পাৰ্টিয়ে এখন আৰু অন্যান্যই এখন আসন লাভ কৰিছিল।
