সুৰাৰ হ’ম ডেলিভাৰিত এইখন ৰাজ্যই দিলে অনুমতি
মহাৰাষ্ট্ৰ চৰকাৰে ৰাজ্যখনত সুৰাৰ হ’ম ডেলিভাৰি কৰাৰ বাবে মঙলবাৰে অনুমতি প্ৰদান কৰিছে।
অৱশ্যে তাত কিছু নিৰ্দিষ্ট নিৰ্দেশনা থাকিব আৰু লকডাউন চলি থকা সময়লৈকেহে এই নিৰ্দেশ প্ৰযোজ্য হ’ব।
মদৰ দোকানসমূহে তেওঁলোকৰ বিক্ৰীৰ অনুমতি থকা এলেকাৰ ভিতৰতহে সুৰাৰ হ’ম ডেলিভাৰি কৰিব পাৰিব।
তাৰোপৰি সুৰাৰ ডেলিভাৰিৰ বাবে যোৱা ব্যক্তিয়ে মাস্ক পৰিধান কৰাটো বাধ্যতামূলক আৰু তেওঁ ছেনিটাইজাৰেৰে সঘনে হাত পৰিষ্কাৰ কৰিব লাগিব।
তাৰোপৰি সুৰা বিক্ৰীৰ অনুমতি থকা সময় আৰু দিনতহে সুৰাৰ হ’ম ডেলিভাৰি কৰিব পাৰিব।
ক’ভিড-১৯ত দেশৰ ভিতৰতে আটাইতকৈ ক্ষতিগ্ৰস্ত ৰাজ্যখনে সুৰাৰ দোকানত ভিৰ কমোৱাৰ লগতে সামাজিক দূৰত্ব বজাই ৰখাৰ বাবে এই পদক্ষেপ লৈছে।
উচ্চতম ন্যায়ালয়ে লকডাউনৰ সময়ত সুৰা বিক্ৰীৰ ওপৰত নিষেধাজ্ঞা আৰোপ কৰি কোনোধৰণৰ নিৰ্দেশ জাৰি নকৰে বুলি যোৱা ৮ মে’ত নিৰ্দেশনা দিছিল।
উচ্চতম ন্যায়ালয়ে সুৰাৰ প্ৰচলন বন্ধ কৰাৰ পৰিৱৰ্তে ৰাজ্যসমূহে সুৰাৰ অনলাইন বিক্ৰী আৰম্ভ কৰাৰ কথা ভাবিব পাৰে বুলি মন্তব্য কৰিছিল।
চৰকাৰী তথ্য মতে ৰাজ্যখনত এতিয়ালৈকে ২৩,৪০১গৰাকী ক’ভিড-১৯ ৰোগী চিনাক্ত হৈছে।
ইয়াৰে ৪,৭৮৬ গৰাকী ব্যক্তিয়ে আৰোগ্য লাভ কৰাৰ বিপৰীতে ৮৬৮গৰাকীৰ মৃত্যু হৈছে।