লকডাউন উলংঘা কৰাসকলক নাকী লগোৱাৰ বাবে ৰাজস্থানৰ এক জিলাৰ প্ৰশাসনে উলিয়াইছে এক অভিনৱ উপায়।
ৰাজ্যখনৰ ঝুনঝুনু অঞ্চলত লকডাউন উলংঘাকাৰীসকলক দেওবাৰৰ পৰা পঠিওৱা হ’ব কৰ’না আক্ৰান্ত ৰোগীৰ আছুতীয়া কক্ষলৈ।
আৰু তাত তেওঁলোকক চেনিটাইজিঙৰ লগতে ৰোগীৰ শুশ্ৰূষাৰ কাম কৰিবলৈ দিয়া হ’ব।
জে জে টি বিশ্ববিদ্যালয় আৰু সিংহানিয়া বিশ্ববিদ্যালয়ত থকা ৰোগীৰ আছুতীয়া কক্ষত তেওঁলোকক কামত লগোৱা হ’ব।
নাৱলগড়ৰ মহকুমাধিপতি মুৰাৰী লাল শৰ্মাই পথত অবাবত ঘূৰি ফুৰাসকলৰ ছবি পঠিয়াবলৈ ৰাইজক আহ্বান জনাইছে।
তেওঁ কয় যে লকডাউন অমান্য কৰি ঘূৰি ফুৰাসকলক গ্ৰেপ্তাৰ বা মাৰপিটৰ পৰিৱৰ্তে কামত লগোৱাৰ বাবে তেওঁ এই উপায় উলিয়াইছে।
বিষয়াগৰাকীয়ে এই সিদ্ধান্তৰ বিষয়ে চ’চিয়েল মিডিয়াৰ জৰিয়তেও ৰাইজক জনোৱাৰ ব্যৱস্থা কৰিছে।
তেওঁ কয় যে এই সিদ্ধান্তৰ ফলত সকলো পক্ষৰে লাভ হ’ব। কাৰণ কৰ’নাত আক্ৰান্তসকলৰ শুশ্ৰূষাৰ বাবে বৃহৎসংখ্যক লোকৰ প্ৰয়োজন হৈছে।
লকডাউন উলংঘাকাৰীক এই কামত লগালে ৰোগী শুশ্ৰূষাও হ’ব আৰু পথত এনে লোকৰ সংখ্যাও হ্ৰাস পাব।
